ମାଲକାନଗିରି : ନିର୍ବାଚନ ପୂର୍ବରୁ ମାଲକାନଗିରିରେ ମାଓବାଦୀଙ୍କ ବର୍ବରକାଣ୍ଡ ଦେଖିବାକୁ ମିଳିଛି। ସୋମବାର ରାତିରେ ମାଓବାଦୀମାନେ ଜଣେ ଯୁବକଙ୍କ ତଣ୍ଟି କାଟି ହତ୍ୟା କରିଛନ୍ତି। ଏହାସହ ରାସ୍ତା କାମରେ ନିୟୋଜିତ ହୋଇଥିବା ଗୋଟିଏ ଜେସିବି ଓ ଟ୍ରାକ୍ଟରକୁ ପୋଡି ଦେଇଥିବା ସୂଚନା ମିଳିଛି। ମାଓବାଦୀମାନେ ରାସ୍ତା କାମକୁ ବିରୋଧ କରି ଏପରି କାଣ୍ଡ ଘଟାଇଥିବା ଜଣାପଡିଛି।
ସୂଚନାଯୋଗ୍ୟ ଯେ, ସୋମବାର ସନ୍ଧ୍ୟା ସମୟରେ ମାଥିଲି ବ୍ଲକ ଅନ୍ତର୍ଗତ ଡୁମୁରିଗୁଡା ଠାରେ ୨୦ରୁ ୩୦ଜଣ ସଶସ୍ତ୍ର ମାଓବାଦୀ ପ୍ରଧାନମନ୍ତ୍ରୀ ସଡକ ଯୋଜନାରେ ଚାଲିଥିବା ଠିକାଦାରଙ୍କ ଶିବିରରେ ପହଞ୍ଚି ଥିଲେ। ସେଠାରେ ପହଞ୍ଚି ଜଣେ ସୁପରଭାଇଜରଙ୍କୁ ମାଡ ମାରିବା ସହ ତାଙ୍କ ତଣ୍ଟି କାଟି ହତ୍ୟା କରିଥିଲେ। ଏହାସହ ଅନ୍ୟ ଜଣଙ୍କୁ ମଧ୍ୟ ମାଡ ମାରିବା ସହ ତଣ୍ଟି କାଟିଥିଲେ। କିନ୍ତୁ ସେ ସୌଭାଗ୍ୟବଶତଃ ସେଠାରୁ ଖସି ଆସିଥିଲେ। ଆହତ ବ୍ୟକ୍ତି ଜଣକ ଡାକ୍ତରଖାନାରେ ଚିକିତ୍ସିତ ହେଉଥିବା ଜଣାପଡିଛି।
ମାଓବାଦୀମାନେ ରାସ୍ତା କାମରେ ନିୟୋଜିତ ହୋଇଥିବା ଗୋଟିଏ ଜେସିବି ଓ ଟ୍ରାକ୍ଟରକୁ ପୋଡି ଦେଇଥିଲେ। ତେବେ ନିର୍ବାଚନ ବିଗୁଲ ବାଜିବା ପରେ ମାଓବାଦୀମାନେ ଅଧିକ ସକ୍ରିୟ ହୋଇ ଏପରି କାଣ୍ଡ ଘଟାଇଥିବା କୁହାଯାଉଛି। ଏଥିପାଇଁ ଜିଲାରେ ଭୟର ବାତାବରଣ ଦେଖାଦେଇଛି।
