ଲକ୍ଷ୍ନୌ: ଉତ୍ତରପ୍ରଦେଶ ଓ ଉତ୍ତରାଖଣ୍ଡରେ ଶନିବାର ସୁଦ୍ଧା ବିଷାକ୍ତ ମଦପାନ ଜନିତ ମୃତ୍ୟୁସଂଖ୍ୟା ୮୨ରେ ପହଞ୍ଚିଛି । ଫଳରେ ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ନିର୍ଦେଶ କ୍ରମେ ପୁଲିସ୍ ପକ୍ଷରୁ ସ୍ବତନ୍ତ୍ର ଅଭିଯାନ ଆରମ୍ଭ ହୋଇଛି। ଏ କ୍ରମରେ ହରଦୋଇ ଜିଲାରେ ଶନିବାର ୨୧୦ଟି ସ୍ଥାନରେ ଚଢାଉ କରି ପୁଲିସ୍ ୨୨୧୨ ଲିଟର ମଦ ଜବତ କରିଛି। ଏଥିରେ ୧୭୮ ଜଣଙ୍କୁ ଗିିରଫ କରାଯାଇଛି।
ସୂଚନା ଅନୁସାରେ ପୁଲିସ୍ ବେଆଇନ ମଦ କାରବାର ଘଟଣାରେ ୧୫୮ଟି ମାମଲା ରୁଜୁ କରିଛି। ଏହି ଅଭିଯାନରେ ପୁଲିସ୍ ବେଆଇନ୍ ଭାବେ ମଦ ତିଆରି କରୁଥିବା ୭୫ଟି ଭାଟ୍ଟି ଭାଙ୍ଗିଛି। ୧୪୦୦ ଲିଟର ପୋଚ୍ ନଷ୍ଟ କରାଯାଇଛି। ଜିଲାରେ ଏତେ ପରିମାଣର ବେଆଇନ ମଦ କାରବାର ପୁଲିସ୍ ପାଇଁ ଚିନ୍ତାର ବିଷୟ ହୋଇଛି।
ଯୋଗୀ ମୃତବ୍ୟକ୍ତିଙ୍କ ପରିବାର ଲୋକଙ୍କ ପାଇଁ ୨ ଲକ୍ଷ ଟଙ୍କା ଏବଂ ଚିକିତ୍ସାଧୀନ ଲୋକଙ୍କ ପାଇଁ ୫୦,୦୦୦ ଟଙ୍କା କ୍ଷତିପୂରଣ ଘୋଷଣା କରିଛନ୍ତି। ଏଥିସହ ମୁଖ୍ୟମନ୍ତ୍ରୀ କୁଶିନଗର ଏବଂ ସାହାରନପୁର ଜିଲା ଅବକାରୀ ଅଧିକାରୀଙ୍କ ବିରୋଧରେ ବିଭାଗୀୟ କାର୍ଯ୍ୟାନୁଷ୍ଠାନ ନିର୍ଦେଶ ଦେଇଛନ୍ତି। ବିଷାକ୍ତମଦ ବ୍ୟବସାୟୀଙ୍କ ବିରୋଧରେ ୧୫ ଦିନ ମଧ୍ୟରେ କାର୍ଯ୍ୟାନୁଷ୍ଠାନ ପାଇଁ ଅବକାରୀ ଏବଂ ପୁଲିସ ଅଧିକାରୀଙ୍କୁ ଯୋଗୀ ନିର୍ଦେଶ ଦେଇଛନ୍ତି ।
