ଚଣ୍ଡିଗଡ଼: ସାମାଜିକ ଗଣମାଧ୍ୟମ ଇନ୍ଷ୍ଟାଗ୍ରାମରେ ପ୍ରେମ ହେବା ପରେ ବିବାହ ପାଇଁ ସଜବାଜ ହୋଇ ୧୫୦ ବରଯାତ୍ରୀଙ୍କୁ ଧରି ପଞ୍ଜାବର ମୋଗା ସହରକୁ ଯାଇଥିବା ଦୁବାଇ ଫେରନ୍ତା ଜଣେ ଯୁବକ ଶିଶୁପାଳ ହୋଇ ଫେରିବା ଘଟଣା ଚର୍ଚ୍ଚାର ବିଷୟ ପାଲଟିଛି।
ମିଳିଥିବା ସୂଚନାନୁଯାୟୀ, ଦୁବାଇରେ ଶ୍ରମିକ ଭାବେ କାମ କରୁଥିବା ଦୀପକ ନାମକ ଜଣେ ଯୁବକ ଗତମାସରେ ଜଳନ୍ଧରସ୍ଥିତ ନିଜ ଘରକୁ ଫେରିଥିଲା। ଦୁବାଇରେ ରହିବା ସମୟରେ ଇନ୍ଷ୍ଟାଗ୍ରାମ ଜରିଆରେ ଦୀପକର ମୋଗା ସହରରେ ରହୁଥିବା ମନପ୍ରୀତ କୌର ନାମ୍ନୀ ଜଣେ ଯୁବତୀଙ୍କ ସହ ପ୍ରେମ ସମ୍ପର୍କ ଗଢ଼ି ଉଠିଥିଲା। ଦୀର୍ଘ ୩ ବର୍ଷର ସମ୍ପର୍କ ପରେ ସେମାନେ ବିବାହ ପାଇଁ ନିଷ୍ପତ୍ତି ନେଇଥିଲେ। ବିବାହ ପାଇଁ ଗତ ୬ ତାରିଖ ଦିନଧାର୍ଯ୍ୟ ହୋଇଥିଲା। ସେହି ଦିନ ଦୀପକ ନିଜର ୧୫୦ ବରଯାତ୍ରୀଙ୍କ ସହ ମୋଗା ସହରରେ ପହଞ୍ଚି ଥିଲେ। ତେବେ ବିବାହ ମଣ୍ଡପଟି କେଉଁଠାରେ ରହିଛି ତାହା ଦୀପକ ଜାଣି ନ ଥିଲେ। ମୋଗା ସହରରେ ପହଞ୍ଚିବା ପରେ ମନପ୍ରୀତଙ୍କୁ ଫୋନ୍ କରିଥିଲେ। ବିବାହ ‘ରୋଜ୍ ଗାର୍ଡେନ ପାଲେସ୍’ ନାମକ ଏକ ମଣ୍ଡପରେ ହେଉଥିବା ମନପ୍ରୀତ କହିବା ସହ ତାଙ୍କ ସମ୍ପର୍କୀୟ ଯାଇ ଦୀପକଙ୍କୁ ମଣ୍ଡପ ପର୍ୟ୍ୟନ୍ତ ପାଛୋଟି ଆଣିବେ ବୋଲି କହିଥିଲେ। କିଛି ସମୟ ଅପେକ୍ଷା ପରେ ମନପ୍ରୀତଙ୍କ କୌଣସି ସମ୍ପର୍କୀୟ ନ ପହଞ୍ଚିବାରୁ ଦୀପକ ପୁନର୍ବାର ତାଙ୍କୁ ଫୋନ କରିଥିଲେ। ତେବେ ସେତେବେଳକୁ ମନପ୍ରୀତଙ୍କ ମୋବାଇଲ ଫୋନ୍ ବନ୍ଦ ହୋଇଯାଇଥିଲା। ସନ୍ଧ୍ୟା ପର୍ଯ୍ୟନ୍ତ ଅପେକ୍ଷା କରିବା ସତ୍ତ୍ବେ କେହି ନ ଆସିବାରୁ ରୋଜ୍ ଗାର୍ଡେନ ପାଲେସ୍ଟି କେଉଁଠି ବୋଲି ଦୀପକଙ୍କ ସମ୍ପର୍କୀୟ ସ୍ଥାନୀୟ ଲୋକଙ୍କୁ ପଚାରିଥିଲେ। ତେବେ ମୋଗା ସହରରେ ଏପରି କୌଣସି ମଣ୍ଡପ ନ ଥିବା ସ୍ଥାନୀୟ ବାସିନ୍ଦା କହିବା ପରେ ଠକାମିର ଶିକାର ହୋଇଥିବା ଜାଣି ପାରି ଦୀପକ ସ୍ଥାନୀୟ ଥାନାରେ ଅଭିଯୋଗ କରିଛନ୍ତି।
