ସମାଜ ଡିଜିଟାଲ ଡେସ୍କ: ନୋଟାରୀରେ ସ୍ୱାମୀଙ୍କ ଦ୍ୱିତୀୟ ବିବାହ ଉଦ୍ୟମବେଳେ ପହଞ୍ଚିଲେ ପ୍ରଥମ ସ୍ତ୍ରୀ, ଆଉ ତା’ପରେ ରାସ୍ତା ଉପରେ ଚାଲିଲା ହାଇଡ୍ରାମା। ସ୍ଵାମୀର ସାର୍ଟ କୋଲାର ଧରି ଥାନାରେ ପହଞ୍ଚିଛନ୍ତି ସ୍ତ୍ରୀ। ଏଭଳି ଦୃଶ୍ୟ ଦେଖିବାକୁ ମିଳିଛି ବାଙ୍କୀ ଥାନା କୋର୍ଟ ରୋଡ଼ ଉପରେ, ଯାହାର ଭିଡିଓ ଏବେ ସାମାଜିକ ଗଣମାଧ୍ୟମରେ ଘୁରି ବୁଲୁଛି। ସ୍ୱାମୀ-ସ୍ତ୍ରୀଙ୍କ ଏହି ହାଇଡ୍ରାମା ପହଞ୍ଚିଛି ଏବେ ବାଙ୍କୀ ଥାନାରେ।
ସୂଚନା ଅନୁଯାୟୀ, ଗୋଳାଗଣ୍ଡ ପଂଚାୟତ ରଜୀବ ଗାଁର ଅର୍ଜୁନ ଧଳ ତାଙ୍କ ଝିଅ ବର୍ଷାରାଣୀ ଧଳଙ୍କୁ ବୈଦିକ ରୀତିନୀତିରେ ୨୦୨୨ ମସିହାରେ ବାଙ୍କୀ ଥାନା ଅନ୍ତର୍ଗତ କିଆପଲ୍ଲା ପଂଚାୟତ ନୂଆଗାଁ କମଳପୁର ଗାଁର ମଦନ ରାଉତଙ୍କ ପୁଅ ସନ୍ତୋଷ କୁମାର ରାଉତଙ୍କ ସହ ବିବାହ କରାଇଥିଲେ। ବର୍ଷାରାଣୀଙ୍କ ଅଭିଯୋଗ ଯେ, ବିଭିନ୍ନ ସମୟରେ ତାଙ୍କୁ ଯୌତୁକ ଦାବି କରି ଶାଶୁଘର ଲୋକେ ନିର୍ଯାତନା ଦେଇ ଆସୁଥିଲେ। ଏଭଳିକି ଜୀବନରୁ ମାରିଦେବାର ଧମକ ମଧ୍ୟ ଦେଇଛନ୍ତି। ଏନେଇ ସେ ଆଜି ଥାନାରେ ଦେଇଥିବା ଏକ ଲିଖିତ ଅଭିଯୋଗ ପତ୍ରରେ ସ୍ପଷ୍ଟ କରିଛନ୍ତି। ଅଭିଯୋଗ ଅନୁଯାୟୀ, ସ୍ୱାମୀ ସନ୍ତୋଷ ବର୍ଷାରାଣୀଙ୍କୁ କୌଣସି ସୂଚନା ନ ଦେଇ ନୋଟାରୀରେ ଗତକାଲି ଅନ୍ୟ ଏକ ଝିଅକୁ ଦ୍ୱିତୀୟ ବିବାହ କରିବାକୁ ଉଦ୍ୟମ କରିଥିଲେ। ଖବର ପାଇ ସ୍ୱାମୀଙ୍କ ଏଭଳି ନିଷ୍ପତ୍ତିକୁ ରାସ୍ତା ଉପରେ ବିରୋଧ କରିଥିଲେ ବର୍ଷାରାଣୀ। ସ୍ୱାମୀ ସନ୍ତୋଷଙ୍କ କୋଲାର ଭିଡ଼ି ଗାଁ ଲୋକଙ୍କ ସହାୟତାରେ ସେ ଥାନାରେ ପହଞ୍ଚିଥିଲେ। ଘଟଣାର ଭିଡିଓ ଏବେ ସାମାଜିକ ଗଣମାଧ୍ୟମରେ ଘୁରି ବୁଲୁଛି। ଅନ୍ୟପଟେ ସ୍ୱାମୀ ସ୍ତ୍ରୀଙ୍କ ହାଇଡ୍ରାମା ଏବେ ଥାନାରେ ପହଞ୍ଚିଛି। ନ୍ୟାୟ ପାଇଁ ବାଙ୍କୀ ଥାନାର ଦ୍ୱାରସ୍ଥ ହୋଇଛନ୍ତି ବର୍ଷାରାଣୀ। ଅଭିଯୋଗ ଉପରେ ସ୍ୱାମୀ ସନ୍ତୋଷଙ୍କର କୌଣସି ପ୍ରତିକ୍ରିୟା ମିଳିପାରିନାହିଁ।
