ରାୟଗଡା: ରାୟଗଡା ଜିଲା କାଶୀପୁର ବ୍ଲକର ଟିକିରିରେ ଦୁଇଟି ଫାଇନାନ୍ସ କମ୍ପାନୀର କର୍ମଚାରୀଙ୍କ ୧୨ଟି ମୋଟରସାଇକେଲ ଜାଳି ଦେଲେ ଦୁର୍ବୃତ୍ତ । ଟିକିରିସ୍ଥିତ ପତି କମ୍ପ୍ଲେକ୍ସ ନିକଟରେ ଥିବା ଫ୍ୟୁଜନ ଫାଇନାନ୍ସ ଓ ସ୍ପନ୍ଦନା ଘରୋଇ ଫାଇନାନ୍ସ କମ୍ପାନୀ କର୍ମଚାରୀଙ୍କ ବାଇକ ପୋଡି ଦେଇଛନ୍ତି ଦୁର୍ବୁତ୍ତ । ବୁଧବାର ମଧ୍ୟରାତ୍ରିରେ କାର୍ଯ୍ୟାଳୟ ପରିସରରେ ରଖାଯାଇଥିବା ୧୨ଟି ବାଇକକୁ କେହି ଦୁର୍ବୁତ୍ତ ନିଆଁ ଲଗାଇ ଦେବା ସହ କର୍ମଚାରୀମାନେ ରହୁଥିବା ତଳ ମହଲା ଘରର ମୁଖ୍ୟ କବାଟ ବାହାର ପଟୁ ବନ୍ଦ କରି ଦେଇଥିଲେ । ଉପର ମହଲାରେ ରହୁଥିବା ଫ୍ୟୁଜନ ଫାଇନାନ୍ସ କମ୍ପାନୀର କର୍ମଚାରୀ ମନୁ ନାୟକ ନିଦରୁ ଉଠି ଦେଖିଲା ବେଳକୁ ଘର ବାହାରେ ନିଆଁ ଲାଗିଛି । ଏ ନେଇ ଅନ୍ୟ କର୍ମଚାରୀମାନଙ୍କୁ ଜଣାଇଥିଲେ । ତା’ପରେ ସମସ୍ତେ କବାଟ ଖୋଲି ପଦାକୁ ଆସିବାକୁ ଚେଷ୍ଟା କରିଥିଲେ ।
ହେଲେ କବାଟ ବାହାର ପଟୁ ବନ୍ଦ ଥିବାରୁ ବାହାରକୁ କେହି ବାହାରି ପାରିନଥିଲେ । ମୁହଁରେ ଗାମୁଛା ବାନ୍ଧି ବହୁକଷ୍ଟରେ ସେମାନେ ଛାତ ଉପରକୁ ଉଠିଥିଲେ । ଦେଖିଲା ବେଳକୁ ତଳେ ହୁତୁ ହୁତୁ ହୋଇ ବାଇକ ସବୁ ଜଳୁଛି । ଏହି ସମୟରେ ତଳ ଘରେ ଶୋଇଥିବା ସ୍ପନ୍ଦନ ଫାଇନାନ୍ସ କମ୍ପାନୀର ୫ କର୍ମଚାରୀ ନିଆଁ ଓ ଧୂଆଁ ଧାସରେ ଅଣନିଶ୍ୱସୀ ହୋଇ ଚିତ୍କାର କରୁଥିଲେ । ସେମାନଙ୍କୁ ଅନ୍ୟ କର୍ମଚାରୀମାନେ କବାଟ ଖୋଲି ଉଦ୍ଧାର କରିଥିଲେ । ଫଳରେ ସେମାନେ ଏକ ବଡ଼ ଅଘଟଣରୁ ବର୍ତ୍ତି ଯାଇଥିଲେ। ଏ ସଂପର୍କରେ ଖବର ପାଇ କାଶିପୁର ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲେ। ଘଟଣା ସମ୍ପର୍କରେ ସ୍ପନ୍ଦନ ଫାଇନାନ୍ସ ବ୍ରାଞ୍ଚ ମ୍ୟାନେଜର ବିକ୍ରମ ପୁରୋହିତ ଟିକିରି ଥାନାରେ ଅଭିଯୋଗ କରିଛନ୍ତି । ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ନିକଟରେ ଥିବା ସିସିଟିଭି ଫୁଟେଜ ଆଧାରରେ ପୁଲିସ ଅନୁସନ୍ଧାନ ଚଳାଇଥିବା ସୂଚନା ମିଳିଛି।
