ମସ୍କୋ: ୨୮ ଜଣଙ୍କୁ ନେଇ ଯାଉଥିବା ରୁଷିଆର ଏକ ଯାତ୍ରୀବାହୀ ବିମାନ ନିଖୋଜ ହୋଇଯାଇଛି । ରୁଷିଆର ସୁଦୂର ପୂର୍ବ ଭାଗରେ ଏହି ଘଟଣା ଘଟିଥିବା ଜଣାଯାଇଛି । ଏହି ଏଏନ-୨୬ ବିମାନଟି ପେତ୍ରୋପାଓଲୋଭସ୍କ-କାନଚାସ୍କିରୁ ପାଲାନା ଅଭିମୁଖେ ମଙ୍ଗଳବାର ଉଡାଣ କରିଥିଲା । କିନ୍ତୁ ତାହା ଧାର୍ଯ୍ୟ ସମୟରେ ଲକ୍ଷ୍ୟ ସ୍ଥଳରେ ପହଞ୍ଚିନଥିବା ଜରୁରିକାଳୀନ ମନ୍ତ୍ରଣାଳୟ ସୂଚନାକୁ ଆଧାର କରି ଇଣ୍ଟରଫାକ୍ସ ଏବଂ ଆରଆଇଏ ନେଭୋସ୍ତି ଖବର ସରବରାହ ସଂସ୍ଥା କହିଛନ୍ତି ।
ବିମାନଟି ଅବତରଣ କରିବାକୁ ଉଦ୍ୟମ କରୁଥିବାବେଳେ ଏୟାର ଟ୍ରାଫିକ କଂଟ୍ରୋଲ ସହିତ ଏହାର ଯୋଗାଯୋଗ ବିଚ୍ଛିନ୍ନ ହୋଇଯାଇଥିଲା । ଏହାପରେ ବିମାନକୁ ଖୋଜିବା ପାଇଁ ତୁରନ୍ତ ଉଦ୍ୟମ ଆରମ୍ଭ ହୋଇଛି । ଦୁଇଟି ହେଲିକପ୍ଟରକୁ ଏଥିପାଇଁ ନିୟୋଜିତ କରାଯାଇଥିବାବେଳେ ଉଦ୍ଧାରକାରୀ ଦଳଙ୍କୁ ପ୍ରସ୍ତୁତ ରଖାଯାଇଛି । ବିମାନରେ ୬ ଜଣ ବିମାନ କର୍ମଚାରୀ ଏବଂ ଜଣେ ଅଥବା ଦୁଇଜଣ ପିଲାଙ୍କ ସମେତ ମୋଟ ୨୮ ଜଣ ରହିଥିବା ରିପୋର୍ଟରୁ ଜଣାଯାଇଛି ।
ଏହା ପୂର୍ବରୁ ୨୦୧୯ରେ ରୁଷିଆରେ ବଡ ଧରଣ ବିମାନ ଦୁର୍ଘଟଣା ଘଟିଥିଲା । ଏକ ସୁଖୋଇ ସୁପରଜେଟ୍ ବିମାନ ମସ୍କୋ ବିମାନ ବନ୍ଦର ରନୱେରେ ଦୁର୍ଘଟଣାଗ୍ରସ୍ତ ହୋଇ ସେଥିରେ ନିଆଁ ଲାଗିଯିବାରୁ ୪୧ ଜଣଙ୍କର ପ୍ରାଣହାନି ଘଟିଥିଲା । ତାହା ପୂର୍ବରୁ ୨୦୧୮ ଫେବ୍ରୁଆରୀରେ ସାରାତୋଭ ଏୟାରଲାଇନ୍ସର ଏଏନ-୧୮ ବିମାନ ଉଡାଣ ଆରମ୍ଭ କରିବାର ଅଳ୍ପ ସମୟ ମଧ୍ୟରେ ମସ୍କୋ ନିକଟରେ ଦୁର୍ଘଟଣାଗ୍ରସ୍ତ ହୋଇ ଖସିପଡିଥିଲା । ଫଳରେ ସେଥିରେ ଥିବା ସମସ୍ତ ୭୧ ଜଣଙ୍କର ମୃତ୍ୟୁ ଘଟିଥିବା କୁହାଯାଇଥିଲା ।
Comments are closed.