ସମ୍ବଲପୁର : ଆଜି ହେଉଛି ପବିତ୍ର ଶୀତଳଷଷ୍ଠୀ ଯାତ୍ରା ଦେବଦେବ ମହାଦେବ ଓ ମା’ପାର୍ବତୀଙ୍କ ବିବାହ। ପୂର୍ବ ବର୍ଷ ଭଳି ଚଳିତ ବର୍ଷ ମଧ୍ୟ କରୋନା କଟକଣା ମଧ୍ୟରେ ବିନା ଭକ୍ତରେ କେବଳ ସେବାୟତଙ୍କ ଦ୍ୱାରା ଦେବ ଦମ୍ପତିଙ୍କ ବିବାହ ଅନୁଷ୍ଠିତ ହେବ। ଏଥିପାଇଁ ସମସ୍ତ ପ୍ରକାର ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚିଛି। କେବଳ ନୀତିକାନ୍ତି ମଧ୍ୟରେ ଦେବ ଦମ୍ପତିଙ୍କ ବିବାହ ଅନୁଷ୍ଠିତ ହେବ। ଆଜି ରାତିରେ ଦେବଦେବ ମହାଦେବ, ମା’ ପାର୍ବତୀଙ୍କ ସହ ବିବାହ ପାଇଁ ବର ବେଶରେ ବାହାରିବେ। ମଙ୍ଗଳ ରାତି ବୁଧ ପାହାନ୍ତିର ମାହେନ୍ଦ୍ର ବେଳାରେ ବିବାହ ଅନୁଷ୍ଠିତ ହେବ। ଏଥିପାଇଁ ବିଭିନ୍ନ ଯାତ୍ରା କମିଟି ଓ ମା’ ପାର୍ବତୀଙ୍କୁ କନ୍ୟା ରୂପରେ ପାଇଥିବା ପରିବାର ଗୁଡିକରେ ସମସ୍ତ ପ୍ରସ୍ତୁତି କରାଯାଇଛି। ନନ୍ଦପଡା,ଝାଡୁଆପଡା, ମୁଦିପଡା ସମେତ ବଡବଜାର,ଠାକୁରପଡା,ବାଲିବନ୍ଧା ଆଦି ଯାତ୍ରା କମିଟି ପକ୍ଷରୁ ଏଥିପାଇଁ ସ୍ୱତନ୍ତ୍ର ପ୍ରସ୍ତୁତି କରାଯାଇଛି।
ଏହାସହ ବିଭିନ୍ନ ଶୈବପୀଠରେ ମଧ୍ୟ ଏଥିପାଇଁ ପ୍ରସ୍ତୁତି କରାଯାଇଛି।
