ଇସଲାମାବାଦ: ୨୦୧୯ ଫେବୃୟାରୀ ୨୬ରେ ପିଓକେର ବାଲାକୋଟରେ ଭାରତୀୟ ବାୟୁସେନା ଦ୍ବାରା କରାଯାଇଥିବା ବିମାନ ଆକ୍ରମଣରେ ୩୦୦ ଆତଙ୍କବାଦୀ ନିହତ ହୋଇଛନ୍ତି। ପୂର୍ବରୁ ପାକିସ୍ତାନ ବାରମ୍ବାର ଏହାକୁ ଖଣ୍ଡନ କରୁଥିବାବେଳେ ଏବେ ଏହାକୁ ସ୍ବୀକାର କରିଛନ୍ତି ପାକ୍ର ଜଣେ ପୂର୍ବତନ ରାଷ୍ଟ୍ରଦୂତ ଆଗା ହିଲାଲୀ।
ହିଲାଲୀ ଅଧିକାଂଶ ସମୟରେ ପାକ୍ ଟେଲିଭିଜନ ନ୍ୟୁଜ ଚ୍ୟାନେଲ ଡିବେଟରେ ଭାଗ ନେବା ସହିତ ସର୍ବଦା ପାକିସ୍ତାନୀ ସେନାର ପକ୍ଷ ରଖିଥାନ୍ତି। ଉଲ୍ଲେଖଯୋଗ୍ୟ, ପାକିସ୍ତାନରେ ଇମ୍ରାନ ଖାନ ସରକାର ବିମାନ ଆକ୍ରମଣକୁ ନେଇ କହିଥିଲେ ଯେ ଏଥିରେ କୌଣସି ବ୍ୟକ୍ତିଙ୍କର ମୃତ୍ୟୁ ହୋଇନାହିଁ।
ସୂଚନାଯୋଗ୍ୟ, ପୁଲୱାମା ଆତଙ୍କବାଦୀ ଆକ୍ରମଣରେ ୪୦ ଯବାନ ଶହୀଦ ହେବା ପରେ ଭାରତ ପକ୍ଷରୁ ପିଓକେର ବାଲାକୋଟରେ ଥିବା ଆତଙ୍କବାଦୀଙ୍କ ଶିବିର ଉପରେ ଆକାଶମାର୍ଗରୁ ଏୟାରଷ୍ଟ୍ରାଇକ୍ କରାଯାଇଥିଲା। ଏଥିରେ ଅତି କମରେ ୩୦୦ ଆତଙ୍କବାଦୀ ନିହତ ହୋଇଥିଲେ। କିନ୍ତୁ ପାକିସ୍ତାନ ଏହାକୁ ବାରମ୍ବାର ଖଣ୍ଡନ କରିଆସୁଥିଲା। ମାତ୍ର ପାକିସ୍ତାନର ଏକ ଊର୍ଦ୍ଦୁ ଟିଭି ଚ୍ୟାନେଲରେ ଡିବେଟ ସମୟରେ ପୂର୍ବତନ ରାଷ୍ଟ୍ରଦୂତ ହିଲାଲୀ ଏହି ରହସ୍ୟ ଉପରେ ପରଦା ହଟାଇଥିଲେ।
