ପୁରୀ: ଶ୍ରୀଜଗନ୍ନାଥ ମହାପ୍ରଭୁଙ୍କ ସୁଖିଲା ମହାପ୍ରସାଦ ‘ନିର୍ମାଲ୍ୟ’ ଅନ୍ଲାଇନରେ ଏବଂ ଅନଧିକାର ଭାବେ ବିକ୍ରି କରିବା ଆମାଜନ୍କୁ ବିବାଦ ଭିତରକୁ ଟାଣି ନେଇଛି। ଶ୍ରୀମନ୍ଦିର ପ୍ରଶାସନ ପକ୍ଷରୁ ଶୁକ୍ରବାର ଆମାଜନ୍ ବିରୋଧରେ ସିଂହଦ୍ବାର ଥାନାରେ ଲିଖିତ ଅଭିଯୋଗ କରାଯାଇଛି। ମନ୍ଦିର ପ୍ରଶାସନ ଅନୁମତି ବିନା ଆମାଜନ୍ ନିର୍ମାଲ୍ୟ ବିକ୍ରି କରୁଥିବା ପ୍ରଶାସକ (ନୀତି) ଜିତେନ୍ଦ୍ରକୁମାର ସାହୁ ଏତଲାରେ ଉଲ୍ଲେଖ କରିଛନ୍ତି। ଏହି ଘଟଣାର ତୁରନ୍ତ ତଦନ୍ତ ଏବଂ କାର୍ଯ୍ୟାନୁଷ୍ଠାନ ପାଇଁ ପ୍ରଶାସନ ପକ୍ଷରୁ ଅନୁରୋଧ କରାଯାଇଛି। ତାହାକୁ ଭିତ୍ତିକରି ସିଂହଦ୍ବାର ଥାନା ପୁଲିସ ମୋକଦ୍ଦମା ରୁଜୁ କରିଛି।
ଥାନାରେ ହାଜର ହୋଇ ଶ୍ରୀଜଗନ୍ନାଥଙ୍କ ନିର୍ମାଲ୍ୟ ବିକ୍ରି ସମ୍ପର୍କିତ କାଗଜପତ୍ର ଦାଖଲ ନିମନ୍ତେ ଆମାଜନ୍ କର୍ତ୍ତୃପକ୍ଷଙ୍କୁ ନୋଟିସ୍ ଜାରି କରାଯିବ ବୋଲି ଜଣେ ପୁଲିସ ଅଧିକାରୀ ସୂଚନା ଦେଇଛନ୍ତି। ଅନ୍ଲାଇନରେ ଶ୍ରୀଜଗନ୍ନାଥ ମହାପ୍ରଭୁଙ୍କ ନିର୍ମାଲ୍ୟ ବିକ୍ରି ପାଇଁ ଶ୍ରୀମନ୍ଦିର ପ୍ରଶାସନ କାହାରିକୁ ଅନୁମତି ଦେଇ ନଥିବା ପ୍ରଶାସକ ଶ୍ରୀ ସାହୁ ପ୍ରକାଶ କରିଛନ୍ତି। ଶ୍ରୀମନ୍ଦିର ସ୍ବତ୍ତ୍ବଲିପି ଅନୁଯାୟୀ ଶ୍ରୀମନ୍ଦିର ସିଂହଦ୍ବାର ସମ୍ମୁଖ ଅରୁଣସ୍ତମ୍ଭ ନିକଟରେ ନିର୍ମାଲ୍ୟ ବିକ୍ରି ଅଧିକାର କେବଳ ସୁଆର ମହାସୁଆର ସେବକଙ୍କର ରହିଛି।
