ନୂଆଦିଲ୍ଲୀ,୩୦ା୮: ଏଣିକି ଇଲେକ୍ଟ୍ରୋନିକ୍ କାରବାର ଉପରେ ବ୍ୟାଙ୍କଗୁଡିକ ଆଉ ଚାର୍ଜ ଲଗାଇ ପାରିବେନାହିଁ। କାରଣ ଏଭଳି କାରବାର ଉପରେ ଲଗାଯାଇଥିବା ଚାର୍ଜ ତୁରନ୍ତ ଗ୍ରାହକଙ୍କୁ ଫେରସ୍ତ କରିବାକୁ କେନ୍ଦ୍ର ଅର୍ଥ ମନ୍ତ୍ରାଳୟ କହିଛି। କେନ୍ଦ୍ରୀୟ ପ୍ରତ୍ୟକ୍ଷ ଟିକସ ବୋର୍ଡ(ସିବିଡିଟି) ପକ୍ଷରୁ ଜାରି କରାଯାଇଥିବା ଏକ ବିବୃତିରେ ଏ ସମ୍ପର୍କରେ କୁହାଯାଇଛି।
ଇଲେକ୍ଟ୍ରୋନିକ୍ ମାଧ୍ୟମରେ ହେଉଥିବା କାରବାର ଉପରେ ଚାର୍ଜ ନ ଲଗାଇବାକୁ ବ୍ୟାଙ୍କଗୁଡିକୁ ଅର୍ଥ ମନ୍ତ୍ରାଳୟ ଆଜି କଡା ନିର୍ଦେଶ ଦେଇଛି। ଆୟକର ଆଇନ ଅଧୀନରେ ଚଳିତବର୍ଷ ଜାନୁଆରୀ ପହିଲା ପରେ ଆଦାୟ କରାଯାଇଥିବା ଏଭଳି ଚାର୍ଜ ବାବଦ ଅର୍ଥ ଗ୍ରାହକଙ୍କୁ ତୁରନ୍ତ ଫେରସ୍ତ କରାଯାଉ। ୟୁପିଆଇ ଜରିଆରେ ହେଉଥିବା କାରବାର ଉପରେ କେତେକ ଚାର୍ଜ ଲାଗୁ କରୁଥିବା ସିବିଡିଟି ପକ୍ଷରୁ କେତେକ ପ୍ରତିନିଧିଙ୍କ ନିକଟରୁ ଜଣାଯାଇଛି। ତେବେ ସିବିଡିଟି ପକ୍ଷରୁ ଗତବର୍ଷ ଡିସେମ୍ବରରେ ଜାରି କରାଯାଇଥିବା ସର୍କୁଲାରର ଏହା ଉଲ୍ଲଘଂନ ବୋଲି କୁହାଯାଉଛି। ଅର୍ଥ ମନ୍ତ୍ରାଳୟର ନିର୍ଦେଶ ଅନୁଯାୟୀ, ଯଦି ରୂପେ କାର୍ଡ,ଭୀମ୍-ୟୁପିଆଇ, ୟୁପିଆଇ କ୍ୟୁଆର କୋଡ୍ ଜରିଆରେ ଇଲେକ୍ଟ୍ରୋନିକ୍ କାରବାର କରାଯାଇଥାଏ ତେବେ ଏହା ଉପରେ କୌଣସି ବ୍ୟାଙ୍କ କିମ୍ବା ସିଷ୍ଟମ ଯୋଗାଣକାରୀ ଚାର୍ଜ ଲାଗୁ କରିପାରିବେ ନାହିଁ।
