କଲକାତା : ଦେଶର ଅର୍ଥନୀତିକୁ ତ୍ବରିତ କରିବା ଲକ୍ଷ୍ୟ ନେଇ କୋଲ୍ ଇଣ୍ଡିଆ ଚଳିତବର୍ଷ ୬୬୦୦ ନୂଆ ନିଯୁକ୍ତି ଦେବାକୁ ଯାଉଛି । କମ୍ପାନୀ ଉପରୋକ୍ତ ନିଯୁକ୍ତି ଏହାର କାର୍ଯ୍ୟନିର୍ବାହୀ ଏବଂ ଅଣକାର୍ଯ୍ୟନିର୍ବାହୀ କ୍ୟାଡରରେ ଦେବ । ଚଳିତବର୍ଷ ଚାହିଦା ଏବଂ ବିକ୍ରିରେ ହ୍ରାସ ସତ୍ତ୍ବେ ଏହି ନିଯୁକ୍ତି କୋଲ ଇଣ୍ଡିଆ ଏବଂ ଏହାର ସହଯୋଗୀ ସଂସ୍ଥାଗୁଡିକ ଦ୍ବାରା କରାଯିବ । ଲକ୍ଡାଉନ୍ ଖୋଲିବା ପରେ ପରିସ୍ଥିତି ସ୍ବାଭାବିକ ହେବା ପରେ ଏହି ଖାଲି ପଦବୀଗୁଡିକରେ ନିଯୁକ୍ତି ଦିଆଯିବ । କୋଲ ଇଣ୍ଡିଆରେ ଚଳିତବର୍ଷ ବହୁ ସଂଖ୍ୟାରେ ପଦବୀ ଖାଲିପଡିଛି । ଆହୁରି ଅନେକ ପଦପଦବୀ ପୂରଣ କରାଯିବ ବୋଲି କମ୍ପାନୀର ଜଣେ ବରିଷ୍ଠ କାର୍ଯ୍ୟନିର୍ବାହୀ ସୂଚନା ଦେଇଛନ୍ତି । ଗତବର୍ଷ କମ୍ପାନୀ ଉଭୟ କାର୍ଯ୍ୟନିର୍ବାହୀ ଏବଂ ଅଣକାର୍ଯ୍ୟନିର୍ବାହୀ କ୍ୟାଡରରେ ପାଖାପାଖି ୮୦୦୦ ପଦବୀ ପୂରଣ କରିଛନ୍ତି । ୧୩୨୬ ଜଣ କାର୍ଯ୍ୟନିର୍ବାହୀଙ୍କୁ ନିଯୁକ୍ତି ଦେବା ପାଇଁ କମ୍ପାନୀ ଇତି ମଧ୍ୟରେ ଲିଖିତ ପରୀକ୍ଷା କରାଇସାରିଛି, କିନ୍ତୁ ଲକ୍ ଡାଉନ୍ ପାଇଁ ଏହାର ସାକ୍ଷାତକାର ସ୍ଥଗିତ ରଖାଯାଇଛି । ଲକ୍ ଡାଉନ୍ ଉଠିବାର କିଛି ସପ୍ତାହରେ ଏ ନେଇ ପ୍ରକ୍ରିୟା ଆରମ୍ଭ କରାଯିବ । ଆହୁରିମଧ୍ୟ କୋଲ ଇଣ୍ଡିଆ ଚଳିତବର୍ଷ ୧୦୦୦ ଶ୍ରମିକଙ୍କୁ ନିଯୁକ୍ତି ଦେବାକୁ ଯୋଜନା କରୁଛି ।
ସୂଚନାଯୋଗ୍ୟ, କୋଲ ଇଣ୍ଡିଆରେ ୨.୮ ଲକ୍ଷ କର୍ମଚାରୀ ନିଯୁକ୍ତି ପାଇଛନ୍ତି । ଏଥିରୁ ୧୯୦୦୦ ହେଉଛନ୍ତି କାର୍ଯ୍ୟନିର୍ବାହୀ ।
