ଭୁବନେଶ୍ବର – ଉତ୍କଳ ବିଶ୍ବ ବିଦ୍ୟାଳୟ ବା ବାଣୀ ବିହାରରେ ପୁଣି ଛାତ୍ର ଉତ୍ତେଜନା । ମଙ୍ଗଳବାର ରାତି ପ୍ରାୟ ଆଠ ପର ଠାରୁ ଏହି ଉତ୍ତେଜନା ବୃଦ୍ଧି ପାଇଥିଲା । ପରେ ଏହା ଉଗ୍ର ରୂପ ନେଇଥିଲା । ଖବର ଅନୁସାରେ ସ୍ଥିତି ଏପରି ହୋଇଥିଲା ଯେ ଅଣଛାତ୍ରମାନେ ଏକ ନମ୍ବର ହଷ୍ଟେଲ ବା ‘ଗୋପବନ୍ଧୁ ଛାତ୍ରବାସ’ରେ ଫାଟକରେ ତାଲା ପକାଇ ଦେଇଥିଲେ । ଏମିତି କି ହଷ୍ଟେଲ ୱାର୍ଡେନଙ୍କୁ ହଷ୍ଟେଲ ଭିତରକୁ ପ୍ରବେଶ କରିବା ପାଇଁ ଦେଇ ନଥିଲେ l ଟେକା ପଥର ମାଡ଼ ହୋଇଥିବା ବି ଖବର ଆସିଛି । ହେଲେ ପୋଲିସ ଏନେଇ କୌଣସି ସୂଚନା ଦେଇ ନାହିଁ । ଘଟଣାସ୍ଥଳରେ ପରିସ୍ଥିତି ଉତ୍ତେଜନାପୂର୍ଣ୍ଣ ଥିବାରୁ ପୁଲିସ ଫୋର୍ସ ମୁତୟନ କରାଯାଇଛି । ବୁଧବାର ଏହି ସମସ୍ୟା ଉପରେ ଆଲୋଚନା ହେବ ବୋଲି କିଛି ଛାତ୍ର କହିଛନ୍ତି । ମିଳିଥିବା ଖବର ଅନୁସାରେ ବିଶ୍ବ ବିଦ୍ୟାଳୟ କର୍ତ୍ତୃପକ୍ଷ ଏକ ନିର୍ଦ୍ଦିଷ୍ଟ ହଷ୍ଟେଲରୁ ଅଣଛାତ୍ର କାଢିବା ପାଇଁ ନୋଟିସ ଜାରି କରିଥିଲେ । ହେଲେ ଅନ୍ୟ ତିନୋଟି ହଷ୍ଟେଲ୍ ଏହି ନୋଟିସରୁ ବାଦ୍ ପଡିଥିଲା । ଏପରି ପାତର ଅନ୍ତର କାହିଁକି କରାଯାଉଛି ପ୍ରତିବାଦ କରି ଏହି ଉତ୍ତେଜନା ପ୍ରକାଶ ପାଇଛି ବୋଲି ଜଣା ପଡ଼ିଛି । କିନ୍ତୁ ବିଶ୍ବ ବିଦ୍ୟାଳୟ କର୍ତ୍ତୃପକ୍ଷ ଏ ନେଇ ଆନୁଷ୍ଠାନିକ ଭାବେ କୌଣସି ପ୍ରତିକ୍ରିୟା ରଖି ନାହାନ୍ତି ।
