ଆଜିର ଯୁଗରେ ଯୁବପିଢ଼ି ନିଜ ଭବିଷ୍ୟତ ଗଠନ ଠାରୁ ଅଧିକ ଚିନ୍ତିତ କିଭଳି ଦେଖାଯାଉଛନ୍ତି। ଅଧିକ ମୋଟା ଦେଖାଯାଉଛି କି ? ତ୍ବଚା କିଭଳି ଅଧିକ ଉଜ୍ବଳ ଦେଖାଯିବି? ଅନ୍ୟ ତୁଳନାରେ କିଭଳି ସୁନ୍ଦର ଦେଖାଯିବି ? ଏଭଳି ଚିନ୍ତାରେ ଆଜିର ଯୁବକ ଯୁବତୀ। ସାମାଜିକ ଗଣମାଧ୍ୟମ ଓ ଫେସନ ଟ୍ରେଣ୍ଡ ଯୁବପିଢ଼ିଙ୍କ ମନୋଭାବକୁ ଅଧିକ ମାତ୍ରାରେ ପ୍ରଭାବିତ କରୁଛି। ଅନେକ ଯୁବକ ଯୁବତୀ ନିଜ ଶାରୀରିକ ଛବିକୁ ଅନ୍ୟମାନଙ୍କ ସହିତ ତୁଳନା କରି ଆତ୍ମସମ୍ମାନ ହରାଉଛନ୍ତି। ତ୍ବଚା ରଙ୍ଗ, ଶରୀରର ଆକୃତି ଓ ବାହ୍ୟ ସୁନ୍ଦରତାକୁ ଅଧିକ ଗୁରୁତ୍ବ ଦେବାରୁ ସେମାନଙ୍କ ମଧ୍ୟରେ ଅସନ୍ତୋଷ ଓ ଅନିଶ୍ଚିତତା ସୃଷ୍ଟି ହେଉଛି। ଏହି ପରିସ୍ଥିତିରେ ଯୁବପିଢ଼ି ନିଜର ପ୍ରାକୃତିକ ସୌନ୍ଦର୍ଯ୍ୟକୁ ଗ୍ରହଣ କରିବା, ନିଜ ଶରୀର ପ୍ରତି ସକାରାତ୍ମକ ଭାବନା ରଖିବା ଓ ଆତ୍ମବିଶ୍ବାସ ବଢ଼ାଇବା ଆବଶ୍ୟକ। ନିଜକୁ ଭଲ ପାଇବା ଓ ସ୍ବସ୍ଥ ଜୀବନଶୈଳୀ ଅନୁସରଣ କଲେ ପ୍ରକୃତ ସୁନ୍ଦରତା ଉଦ୍ଭାସିତ ହୋଇପାରିବ। ତେବେ ଆଜିର ଯୁବପିଢ଼ିଙ୍କ କ୍ଷେତ୍ରରେ ନିଜ ଶରୀର ଗଠନ ଓ ଏହାକୁ ନେଇ ଦେଖାଦେଉଥିବା ସମସ୍ୟା ସମାଧାନକୁ ନେଇ ଆମର ସ୍ବତନ୍ତ୍ର ଉପସ୍ଥାପନା।
ଶରୀର ଗଠନ
ଜଣେ ବ୍ୟକ୍ତି ନିଜ ଶରୀରକୁ କେମିତି ଦେଖୁଛନ୍ତି, ଏହାକୁ ନେଇ କଣ ଭାବନ୍ତି ଓ ଅନୁଭବ କରନ୍ତି ତାହାକୁ ଶରୀର ପ୍ରତିଛବି କୁହାଯାଏ। ଯଦି ଜଣେ ବ୍ୟକ୍ତି ନିଜ ଶରୀରକୁ ସ୍ୱୀକାର କରନ୍ତି ଓ ତାହାପ୍ରତି ସକାରାତ୍ମକ ଭାବ ରଖନ୍ତି, ତେବେ ସେଥିରେ ସୁସ୍ଥ ଛବି ପ୍ରକାଶ ପାଏ; କିନ୍ତୁ ଯଦି ଜଣେ ନିଜ ଶରୀର ପ୍ରତି ଅସନ୍ତୋଷ ଅଛନ୍ତି ତେବେ ଏହା ନକାରାତ୍ମକ ଶାରୀରିକ ଛବିକୁ ସୂଚାଏ। ସୋସିଆଲ ମିଡିଆ, ସାଙ୍ଗମାନଙ୍କ ଚାପ ଓ ସାମାଜିକ ସ୍ତରରେ ଏହି ଭାବନା ଅଧିକ ପ୍ରଭାବିତ ହୋଇଥାଏ।
