ନୂଆଦିଲ୍ଲୀ : କଂଗ୍ରେସ ଦଳରେ ଆଦର୍ଶଗତ ମତଭେଦ ମଧ୍ୟରେ ଏପ୍ରିଲରେ କଂଗ୍ରେସ ସଭାପତି ପଦ ପାଇଁ ସାଂଗଠନିକ ନିର୍ବାଚନ କରିବାକୁ ବିଚାର କରୁଛି। ପାର୍ଟି ସୂତ୍ରରୁ ପ୍ରକାଶ ଯେ ଏହା ଏକ ପ୍ରକ୍ରିୟା ହେବ ଯାହା ୨୦୧୯ ଲୋକସଭା ନିର୍ବାଚନରେ ପରାଜୟ ପରେ ହୋଇଥିବା କ୍ଷତିକୁ ହ୍ରାସ କରିବ। ତେବେ ଏହାରି କିଏ କଂଗ୍ରେସର ମଙ୍ଗ ଧରିବ ତାକୁ ନେଇ ଚର୍ଚା ଲାଗି ରହିଛି। 
ସୂତ୍ରରୁ ପ୍ରକାଶ ଯେ ସାଂଗଠନିକ ନିର୍ବାଚନରେ ନେତୃତ୍ୱ ବିଭିନ୍ନ ବିକଳ୍ପ ଉପରେ ବିଚାର କରୁଛନ୍ତି, କିନ୍ତୁ ରାହୁଲ ଗାନ୍ଧୀ ଦଳର ନେତାମାନଙ୍କୁ ସେ ସଭାପତି ପଦ ପାଇଁ ପ୍ରତିଦ୍ୱନ୍ଦ୍ୱିତା କରିବେ କି ନାହିଁ ତାହା ଏପର୍ଯ୍ୟନ୍ତ ସୂଚିତ କରିନାହାଁନ୍ତି। ସୂଚନାଯୋଗ୍ୟ, ଲୋକସଭା ନିର୍ବାଚନରେ ପରାଜୟ ପରେ ରାହୁଲ କଂଗ୍ରେସର ସଭାପତି ପଦରୁ ଇସ୍ତଫା ଦେଇଥିଲେ ଏବଂ ସୋନିଆ ଗାନ୍ଧୀ କଂଗ୍ରେସର ମଧ୍ୟବର୍ତ୍ତୀକାଳୀନ ଅଧ୍ୟକ୍ଷା ହୋଇଥିଲେ। ଦଳର ଜଣେ ବରିଷ୍ଠ ନେତା କହିଛନ୍ତି ଯେ ଯଦି ରାହୁଲ ଗାନ୍ଧୀ ସଭାପତି ପଦ ପାଇଁ ପ୍ରତିଦ୍ୱନ୍ଦ୍ୱିତା କରିବାକୁ ନାରାଜ, ତେବେ ତାଙ୍କ ଭଉଣୀ ପ୍ରିୟଙ୍କା ଗାନ୍ଧୀ ଭଦ୍ରା ଜଣେ ସମ୍ଭାବ୍ୟ ପ୍ରାର୍ଥୀ ହୋଇପାରନ୍ତି।
ଗାନ୍ଧୀ ପରିବାର ବ୍ୟତୀତ କଂଗ୍ରେସର ବରିଷ୍ଠ ନେତାମାନେ ମଧ୍ୟ ପ୍ରାର୍ଥୀ ହେବା ପାଇଁ ପ୍ରସ୍ତୁତ ହୋଇପାରନ୍ତି। ଯଦି ଏହା ଘଟେ, ତେବେ କଂଗ୍ରେସ ସଭାପତି ପଦ ପାଇଁ ନିର୍ବାଚନ ଆକର୍ଷଣୀୟ ହୋଇପାରେ। ତେବେ ଦଳର କିଛି ନେତା ଏହା ପ୍ରତିକୂଳ ପ୍ରଭାବ ପକାଇବେ ବୋଲି ଅନୁଭବ କରୁଛନ୍ତି।
ଏଆଇସିସି ଅଧିକାରୀ ତଥା ରାହୁଲଙ୍କ ଜଣେ ଘନିଷ୍ଠ ସହଯୋଗୀ କହିଛନ୍ତି ଯେ କଂଗ୍ରେସ ପାଇଁ ଏକମାତ୍ର ବିକଳ୍ପ ହେଉଛି ଦଳକୁ ସ୍ଥିର କରିବା ଏବଂ ପୁଣିଥରେ ଯେକୌଣସି ପ୍ରକାରରେ ଦଳକୁ ପୁନଃ ନିର୍ମାଣକୁ କରିବାକୁ ପଡିବ । ଏଥି ସହିତ ଗାନ୍ଧୀ ପରିବାରର ଜଣେ ସଦସ୍ୟଙ୍କୁ କଂଗ୍ରେସର ସଭାପତି ଦାୟିତ୍ବ ଗ୍ରହଣ କରିବାକୁ ପଡିବ। ସୂଚନା ଅନୁସାରେ ପଶ୍ଚିମବଙ୍ଗ, ତାମିଲନାଡୁ, ଆସାମ ଭଳି ପ୍ରମୁଖ ରାଜ୍ୟରେ ଆଗାମୀ ନିର୍ବାଚନ ପରେ କଂଗ୍ରେସ ସଭାପତି ପଦ ପାଇଁ ନିର୍ବାଚନ ଅନୁଷ୍ଠିତ ହେବାର ସମ୍ଭାବନା ରହିଛି। ଆସାମରେ କଂଗ୍ରେସ ମୁଖ୍ୟ ପ୍ରତିଦ୍ୱନ୍ଦ୍ୱୀ ହୋଇଥିବାବେଳେ ତାମିଲନାଡୁରେ କଂଗ୍ରେସ ଡିଏମକେ ସହ ବିରୋଧୀ ଦଳ ରହିଛି । ଏଥି ସହିତ ପଶ୍ଚିମବଙ୍ଗରେ ବାମପନ୍ଥୀ ଦଳ ସହ କଂଗ୍ରେସ ହାତ ମିଳାଇ ପାରିବ, ଯେଉଁଠାରେ ଶାସକ ଟିଏମସି ଏବଂ ବିଜେପି ରାଜ୍ୟରେ ସରକାର ଗଠନ ପାଇଁ ମୁଖ୍ୟ ପ୍ରତିଦ୍ୱନ୍ଦ୍ୱୀ ହୋଇପାରନ୍ତି। ପଶ୍ଚିମବଙ୍ଗରେ ନିର୍ବାଚନ ମଧ୍ୟ ଗୁରୁତ୍ୱପୂର୍ଣ୍ଣ ହୋଇପଡିଛି କାରଣ ବିଜେପି ପ୍ରଥମ ଥର ପାଇଁ ରାଜ୍ୟ ଜିତିବା ପାଇଁ ପ୍ରତିଶ୍ରୁତି ଦେଇଛି। ଏହାକୁ ଦୃଷ୍ଟିରେ ରଖି କଂଗ୍ରେସ ପାଇଁ ଚ୍ୟାଲେଞ୍ଜ ବୃଦ୍ଧି ପାଇଛି।
