ଡେସ୍କ: ଦଳରୁ ନିଲମ୍ବିତ ବିଜେପି ନେତା ନୁପୁର ଶର୍ମା ଓ ନବୀନ ଜିନ୍ଦଲଙ୍କୁ ବିରୋଧ କରି ଆଜି ଦିଲ୍ଲୀର ଜାମା ମସଜିଦରେ ବିରୋଧ ପ୍ରଦର୍ଶନ କରାଯାଇଛି। ଦିଲ୍ଲୀ ପୁଲିସ କହିଛି ଯେ ସେମାନେ ବିରୋଧକାରୀଙ୍କୁ ହଟାଇ ଦେଇଛନ୍ତି ଏବଂ ବର୍ତ୍ତମାନ ପରିସ୍ଥିତି ନିୟନ୍ତ୍ରଣରେ ରହିଛି। ପୂର୍ବରୁ ମସଜିଦ୍ ଦ୍ୱାରା ବିରୋଧ ପ୍ରଦର୍ଶନ କରାଯିବା ନେଇ କୌଣସି ସୂଚନା ଦିଆଯାଇନଥିଲା ବୋଲି ପୁଲିସ କହିଛି। ଜାମା ମସଜିଦ ଶାହି ଇମାମ କହିଛନ୍ତି ଯେ, ବିରୋଧ କରୁଥିବା ବ୍ୟକ୍ତି କିଏ ତାହା ଆମେ ଜାଣି ନାହୁଁ। ସେମାନେ ଅଲ ଇଣ୍ଡିଆ ମଜଲିସ-ଏ-ଇତେହାଦୁଲ ମୁସଲିମ କିମ୍ବା ୱବେସୀଙ୍କ ଲୋକ ତାହା ଜଣାପଡିନାହିଁ। ଆମେ ଏହା ସ୍ପଷ୍ଟ କରିଛୁ ଯେ ଯଦି ସେମାନେ ବିରୋଧ କରିବାକୁ ଚାହାଁନ୍ତି, ସେମାନେ କରିପାରିବେ, କିନ୍ତୁ ଆମେ ସମର୍ଥନ କରିବୁ ନାହିଁ।
ସଂଖ୍ୟାଲଘୁଙ୍କ ବିରୋଧରେ ନୁପୁର ଶର୍ମାଙ୍କ ମନ୍ତବ୍ୟ ପରେ ଏହି ବିବାଦ ଉପୁଜିଥିଲା। କେତେକ ବାହାର ଦେଶ ଏହାର ପ୍ରତିବାଦ କରିଛନ୍ତି। ତେବେ ଗୁରୁବାର ଦିନ ଭାରତ ଦୋହରାଇଛି ଯେ ମହମ୍ମଦଙ୍କ ବିଷୟରେ ବିବାଦୀୟ ମନ୍ତବ୍ୟ ସରକାରଙ୍କ ମତକୁ ପ୍ରତିଫଳିତ କରୁନାହିଁ ଏବଂ ମନ୍ତବ୍ୟ ଦେଇଥିବା ବ୍ୟକ୍ତିଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି।
ବୈଦେଶିକ ଦେଶିକ ବ୍ୟାପାର ମନ୍ତ୍ରଣାଳୟର ମୁଖପାତ୍ର ଅରିନ୍ଦମ ବାଗଚି ଗଣମାଧ୍ୟମକୁ ସୂଚନା ଦେଇ କହିଛନ୍ତି ଯେ ଟ୍ୱିଟ୍ ଏବଂ ମନ୍ତବ୍ୟରେ ସରକାରଙ୍କ ମତ ପ୍ରତିଫଳିତ ହେଉନାହିଁ ବୋଲି ସ୍ପଷ୍ଟ କରିଛୁ। ଯେଉଁମାନେ ମନ୍ତବ୍ୟ ଏବଂ ଟ୍ୱିଟ୍ କରିଛନ୍ତି ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି।
ତେବେ ଏହି ଘଟଣା ନେଇ ଦିଲ୍ଲୀ ପୁଲିସ୍ ଦୁଇଟି ମାମଲା ପଞ୍ଜୀକୃତ କରିଛି। ଗୋଟିଏ ପୂର୍ବତନ ବିଜେପି ମୁଖପାତ୍ର ନୁପୁର ଶର୍ମାଙ୍କ ବିରୁଦ୍ଧରେ ଏବଂ ଅନ୍ୟଟି ୩୧ ଜଣଙ୍କ ବିରୁଦ୍ଧରେ ଯେଉଁଥିରେ ଏଆଇଏମ୍ଆଇଏମ୍ ମୁଖ୍ୟ ଅସଦୁଦ୍ଦିନ ୱେବେସୀ ଓ ବିବାଦୀୟ ପୁରୋହିତ ୟତି ନରସିଂହାନନ୍ଦ ଅଛନ୍ତି।
Comments are closed.