ଉତ୍ତରକାଶୀ : ଉତ୍ତରାଖଣ୍ଡରେ ରବିବାର ଏକ ମର୍ମନ୍ତୁଦ ସଡ଼କ ଦୁର୍ଘଟଣାରେ ୧୨ଜଣଙ୍କ ମୃତ୍ୟୁ ହୋଇଥିବା ବେଳେ ୧୩ ଜଣ ଆହତ ହୋଇଛନ୍ତି । ଉତ୍ତରକାଶୀରୁ ବିକାଶନଗର ଯାଉଥିବା ଏକ ବସ୍ ଖାଇରେ ଓଲଟି ପଡିବାରୁ ଏହି ଦୁର୍ଘଟଣା ଘଟିଛି। ଆହତମାନଙ୍କୁ ଡାମଟା ହସ୍ପିଟାଲରେ ଭର୍ତି କରାଯାଇଛି । ସେଠାରେ ୫ଜଣଙ୍କ ଅବସ୍ଥା ଗୁରୁତର ରହିଛି ।
ଆଜି ଯମୁନେତ୍ରୀ ହାଇୱେ ଉପରେ ଡାମଟା ନିକଟରେ ଏହି ଦୁର୍ଘଟଣା ଘଟିଛି । ଏକ ଘରୋଇ ବସ ଜାନକିଚଟ୍ଟୀରୁ ବିକାଶନଗର ଯାଉଥିଲା । ଡାମଟା ପହଂଚିବା ପୂର୍ବରୁ ବସ୍ ଡ୍ରାଇଭର ନିୟନ୍ତ୍ରଣ ହରାଇବାରୁ ପ୍ରାୟ ୧୫୦ ମିଟର ଗଭୀର ଖାଇରେ ବସ୍ ଖସିପଡିଥିଲା ।
ଡାମଟା ପୋଲିସ ଘଟଣାସ୍ଥଳରେ ପହଂଚିଥିଲେ ଓ ସ୍ଥାନୀୟ ଲୋକଙ୍କ ସାହାଯ୍ୟରେ ଉଦ୍ଧାର କାର୍ଯ୍ୟ ଆରମ୍ଭ କରିଦେଇଥିଲେ । ଏସଡିଆରଏଫର ୧୮ ଜଣିଆ ଏକ ଦଳ ଘଟଣାସ୍ଥଳକୁ ଆସିବା ସହିତ ଚାରି ଜଣ ଜବାନଙ୍କୁ ମଧ୍ୟ ହେଲିକ୍ୟାପଟରରେ ଉଦ୍ଧାର କାର୍ଯ୍ୟ ପାଇଁ ପଠାଯାଇଥିଲା ।
ଖାଇରୁ ୧୦ ଜଣଙ୍କ ମୃତଦେହ ବାହାର କରାଯାଇଥିବା ବେଳେ, ହସ୍ପିଟାଲ ଯିବା ବାଟରେ ୨ଜଣଙ୍କର ମୃତ୍ୟୁ ହୋଇଥିଲା । ଏହା ସହିତ ୧୩ ଜଣଙ୍କୁ ଆହତ ଅବସ୍ଥାରେ ଡାମଟା ହସ୍ପିଟାଲରେ ଭର୍ତି କରାଯାଇଥିବା ବେଳ ୫ ଜଣଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ ଡେରାଡୁନ ନେବାକୁ ବ୍ୟବସ୍ଥା କରାଯାଇଥିଲା । ଦୁର୍ଘଟଣାର ଭୟାବହତାକୁ ଲକ୍ଷ୍ୟ କଲେ ମୃତକଙ୍କ ସଂଖ୍ୟା ବୃଦ୍ଧି ପାଇବାର ସମ୍ଭାବନା ରହିଛି।
