ଉତ୍ତରାଖଣ୍ଡର ନୂଆ ମୁଖ୍ୟମନ୍ତ୍ରୀ ଭାବେ ପୁଷ୍କର ସିଂହ ଧାମୀ ଆଜି ଶପଥ ନେବେ। ଗତକାଲି ପୁଷ୍କରଙ୍କୁ ବିଧାୟକ ଦଳ ନେତା ନିର୍ବାଚିତ କରାଯାଇଥିଲା। ସାମ୍ବିଧାନିକ ସଙ୍କଟ ଏଡ଼ାଇବା ପାଇଁ ମାତ୍ର ୧୧୫ ଦିନ ମୁଖ୍ୟମନ୍ତ୍ରୀ ପାଦରେ ରହିବା ପରେ ତିରଥ ସିଂହ ରାୱତ ଶୁକ୍ରବାର ରାତିରେ ରାଜ୍ୟପାଳ ବେବି ରାଣୀ ମୌର୍ଯ୍ୟଙ୍କୁ ଇସ୍ତଫା ପ୍ରଦାନ କରିଥିଲେ। ଗତକାଲି ବିଧାୟକ ଦଳ ବୈଠକ ପରେ ଧାମୀ ରାଜ୍ୟପାଳଙ୍କୁ ଭେଟି ଦାବି ଉପସ୍ଥାପନ କରିଥିଲେ।
୪୫ ବର୍ଷୀୟ ପୁଷ୍କର ସିଂହ ଧାମୀ କୁମାଓଁ ଅଞ୍ଚଳ ସ୍ଥିତ ଖତିମା ନିର୍ବାଚନମଣ୍ଡଳୀକୁ ପ୍ରତିନିଧିତ୍ବ କରୁଥିବା ବେଳେ ୨ ଥର ବିଧାୟକ ନିର୍ବାଚିତ ହୋଇଛନ୍ତି। ଆଜି ସନ୍ଧ୍ୟାରେ ସେ ଉତ୍ତରାଖଣ୍ଡ ରାଜଭବନରେ ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିବେ। ପୁଷ୍କର ସିଂହଙ୍କ ପୂର୍ବରୁ ତିରଥ ସିଂହ ରାୱତ ଗତ ମାର୍ଚ୍ଚ ୧୦ରେ ମୁଖ୍ୟମନ୍ତ୍ରୀ ଭାବେ ଶପଥ ନେଇଥିଲେ ଏବଂ ତାଙ୍କ ପୂର୍ବରୁ ତ୍ରିବେନ୍ଦ ସିଂହ ରାୱତ ମୁଖ୍ୟମନ୍ତ୍ରୀ ଥିଲେ।
