ସହାରନପୁର: ହରିଦ୍ୱାରରୁ ପୁରୀ ଯାଉଥିବା ୧୮୪୭୮ କଳିଙ୍ଗ- ଉତ୍କଳ ଏକ୍ସପ୍ରେସରେ ବୋମା ଥିବା ନେଇ ଖବର ମିଳିବା ପରେ ଯାତ୍ରୀଙ୍କ ମଧ୍ୟରେ ଆତଙ୍କ ଖେଳିଯାଇଛି । ଟ୍ରେନକୁ ଟପରୀ ଜଙ୍କଶନରେ ରୋକା ଯାଇ ତଲାସି ନିଆଯାଇଥିଲା । ଘଟଣାସ୍ଥଳରେ ବୋମା ନିଷ୍କ୍ରିୟକାରୀ ଦଳ, ଜିଆରପି ଓ ପୁଲିସ ପହଞ୍ଚି ଟ୍ରେନର ତଲାସି ନେଇଥିଲେ । ପ୍ରାୟ ଅଧ ଘଣ୍ଟା ତଲାସି ନେବା ପରେ ଟ୍ରେନକୁ ଛଡାଯାଇଥିଲା।
ମିଳିଥିବା ସୂଚନା ଅନୁସାରେ, ଉତ୍ତରାଖଣ୍ଡର ହରିଦ୍ୱାରରୁ ଓଡିଶା ଆସୁଥିବା ଉତ୍କଳ ଏକ୍ସପ୍ରେସ ଟପରି ଷ୍ଟେସନରେ ଥିବା ବେଳେ ଟ୍ରେନରେ ବୋମା ଥିବା ନେଇ ସୂଚନା ମିଳିଥିଲା । ପରେ ସେହି ଷ୍ଟେସନରେ ଟ୍ରେନକୁ ରୋକାଯାଇ ପ୍ରଶାସନ ପକ୍ଷରୁ ତଲାସି ଅଭିଯାନ ଆରମ୍ଭ ହୋଇଥିଲା । ଟ୍ରେନ ମଧ୍ୟରୁ ସନ୍ଦେହଜନକ ଅବସ୍ଥାରେ ଏକ ବ୍ୟାଗ ଜବତ ହୋଇଛି । ତେବେ ଏହି ବ୍ୟାଗ୍ କାହାର ଏବଂ କିଏ ରଖିଛି ସେନେଇ କୌଣସି ତଥ୍ୟ ମିଳିପାରିନାହିଁ ।
