ଜମ୍ମୁ : ଉଛୁଳା ନଦୀ ଗର୍ଭରୁ ଦୁଇ ଜଣ ମତ୍ସ୍ୟଜୀବୀଙ୍କୁ ଉଦ୍ଧାର କରି ପ୍ରଶଂସା ସାଉଁଟିଛି ଭାରତୀୟ ବାୟୁସେନା । ସୋମବାର ଜମ୍ମୁର ତବୀ ନଦୀରେ ଜଳସ୍ତର ଚାହୁଁ ଚାହୁଁ ଆକସ୍ମିକ ଭାବେ ବୃଦ୍ଧି ପାଇଥିଲା । ଜଳ ସ୍ରୋତରେ ଦୁଇ ଜଣ ମତ୍ସ୍ୟଜୀବୀ ଭାସି ଯାଇଛନ୍ତି । ସ୍ଥାନୀୟଲୋକ ସେମାନଙ୍କୁ ଉଦ୍ଧାର କରିବାକୁ ଚେଷ୍ଟା କରିଥିଲେ ମଧ୍ୟ ସଫଳ ହୋଇନଥିଲେ । ସେମାନଙ୍କ ଉଦ୍ଧାର ପାଇଁ ବାୟୁସେନାକୁ ସୂଚନା ଦିଆଯାଇଥିଲା। କିଛି ଦୂରତା ଭାସି ଯିବା ପରେ ସେମାନେ ଏକ ବ୍ୟାରଜରେ ଅଟକି ଯାଇଥିଲେ ।
ବାୟୁସେନା ଯବାନମାନେ ପହଞ୍ଚି ହେଲିକପ୍ଟରେ ଆକାଶମାର୍ଗରୁ ପ୍ରଥମେ ସେମାନଙ୍କୁ ନୀରିକ୍ଷଣ କରିଥିଲେ । ପରେ ଜଣେ ଯବାନ ତଳକୁ ଓହ୍ଲାଇ ସେମାନଙ୍କ ନିକଟରେ ପହଞ୍ଚିଥିଲେ ଏବଂ ଉଭୟଙ୍କୁ ଉଦ୍ଧାର ପାଇଁ ପ୍ରସ୍ତୁତି କରିଥିଲେ । ଜଣ ଜଣ କରି ଦୁଇ ଜଣଙ୍କୁ ସୁରକ୍ଷିତ ଭାବରେ ହେଲିକପ୍ଟରେ ପହଞ୍ଚଇବା ପରେ ଯବାନ ଜଣଙ୍କ ନିଜେ ମଧ୍ୟ ଚାଲି ଆସିଥିଲେ । ଏହି ଉଦ୍ଧାରକାର୍ଯ୍ୟ ପାଇଁ ଯବାନମାନଙ୍କୁ ୪୦ ମିନିଟ୍ ସମୟ ଲାଗିଥିଲା। ଯବାନଙ୍କ ଏହି ସାହସିକ ପଦକ୍ଷେପ ପାଇଁ ସ୍ଥାନୀୟଲୋକେ ସେମାନଙ୍କୁ ଭୁରି ଭୁରି ପ୍ରଶଂସା କରିଥିଲେ । ‘ଭାରତ ମାତା କି ଜୟ’ , ‘ଭାରତୀୟ ସେନା କି ଜୟ’ ଧ୍ବନିରେ ସ୍ଥାନୀୟ ଅଞ୍ଚଳ କମ୍ପି ଉଠିଥିଲା ।
#UPDATE Jammu & Kashmir: Two more persons have been rescued after they got stuck near a bridge in JAMMU following a sudden increase in the water level of Tawi river. pic.twitter.com/JI6oWRtR5B
— ANI (@ANI) 19 August 2019
ସୂଚନାଯୋଗ୍ୟ, ଶୁକ୍ରବାର ଓ ଶନିବାର ଦିନ ହୋଇଥିବା ପ୍ରବଳ ବର୍ଷା ଯୋଗୁଁ ତବୀ ଓ ଚିନାମ ସମେତ ଅନ୍ୟ ନଦୀ ଗୁଡିକରେ ବନ୍ୟା ପରିସ୍ଥିତି ସୃଷ୍ଟି ହୋଇଛି । ନଦୀ ନିକଟକୁ ନଯିବା ପାଇଁ ପ୍ରଶାସନ ପକ୍ଷରୁ ମେସାନଙ୍କୁ ବାରଣ କରାଯାଇଥିଲା।
