ରାୟଗଡ଼ା: ରାୟଗଡ଼ା ଜିଲା ଟିକିରି ପୁଲିସକୁ ସଫଳତା । ଗତ ମାର୍ଚ୍ଚ ମାସରେ ହୋଇଥିବା ଏକ ଡକାୟତି ଘଟଣାର ପର୍ଦ୍ଦଫାସ କରିଛି ପୁଲିସ । ଘଟଣାରେ ସଂପୃକ୍ତ ୩ ଜଣଙ୍କୁ ଗିରଫ କରିବା ସହ ସେମାନଙ୍କ ପାଖରୁ ୪ ତୋଳାର ମଙ୍ଗଳସୂତ୍ର, କାନ ଫୁଲ ସହ ୫ ମୋବାଇଲ ଫୋନ, ଟାବଲେଟ୍ ଆଦି ଜବତ କରିଛି। ତେବେ ଚୋରି ହୋଇଥିବା ୧.୮ ଲକ୍ଷ ଟଙ୍କା ଜବତ କରିପାରିନି ପୁଲିସ। ଏହି ଘଟଣାରେ ସଂପୃକ୍ତ ଥିବା ଜଣେ ନାବାଳକୁ ପୁଲିସ ସ୍ବଧାର ଗୃହକୁ ପଠାଯାଇଥିବା ରାୟଗଡ଼ା ଏସପି ସ୍ବାତି ଏସ.କୁମାର ସୂଚନା ଦେଇଛନ୍ତି।
ମିଳିଥିବା ସୂଚନା ପ୍ରକାରେ, ଗତ ମାର୍ଚ୍ଚ ୧୫ ତାରିଖ ରାତିରେ କାଶୀପୁର ବ୍ଲକର ଟିକିରି ସୁନାମୁଦି ସାହିରେ ରହୁଥିବା ସୁଶାନ୍ତ ନାଗଙ୍କ ପରିବାର ଲିଲାବାଡି ଯାତ୍ରା ଦେଖିବାକୁ ଯାଇଥିଲେ। ଦୁର୍ବୃତ୍ତମାନେ ତାଙ୍କ ଘରର କବାଟ ଭାଙ୍ଗି ଘରେ ଥିବା ୧.୮ ଲକ୍ଷ ଟଙ୍କା, ୪ ତୋଳାର ଗୋଟିଏ ମଙ୍ଗଳସୂତ୍ର, ଗୋଟିଏ କାନଫୁଲ, ମୋବାଇଲ ଫୋନ, ଟାବଲେଟ୍, ଗୋଟିଏ ଆଇରନ ଲକର ନେଇ ଚାଲିଯାଇଥିଲେ। ଘଟଣାରେ ଜଣେ ନାବାଳକଙ୍କ ସମେତ ୩ ଜଣ ସଂପୃକ୍ତ ଥିଲେ । ସେମାନେ ଧରାପଡିବା ଭୟରେ ସିସିଟିଭିର ତାର ମଧ୍ୟ କାଟି ଦେଇଥିଲେ। ଆଇରନ ଲକରରୁ କିଛି ନମିଳିବାରୁ ତାକୁ ନିକଟସ୍ଥ ଏକ କେନାଲରେ ଫିଙ୍ଗି ଦେଇ ଫେରାର ହୋଇଯାଇଥିଲେ। ଏ ନେଇ ୧୬ ତାରିଖ ରାତିରେ ସୁଶାନ୍ତ ଟିକିରି ଥାନାରେ ଏତଲା ଦେବା ପରେ ପୁଲିସ ଏକ ମାମଲା ରୁଜୁ କରି ଥାନା ଅଧିକାରୀ ବିଶ୍ବବନ୍ଦିନୀ ବାଗଙ୍କ ନେତୃତ୍ବରେ ଏହାର ତଦନ୍ତ ଆରମ୍ଭ କରିଥିଲେ।
