ନଗରକୁର୍ଣ୍ଣୁଲ୍ (ତେଲେଙ୍ଗାନା): ଫେବୃଆରୀ ୨୨ ତାରିଖରୁ ଆଂଶିକ ଭାବରେ ଭୁଶୁଡ଼ି ପଡ଼ିଥିବା ଏସଏଲବିସି ସୁଡ଼ଙ୍ଗ ଭିତରେ ଫସି ରହିଥିବା ସାତ ଜଣଙ୍କୁ ଖୋଜିବା ପାଇଁ ରୋବୋଟ୍ ସାମିଲ ହୋଇଛି । ଏହାସହିତ ହାଇଦ୍ରାବାଦର ଜାତୀୟ ଭୂଭୌତିକ ଗବେଷଣା ପ୍ରତିଷ୍ଠାନର ବୈଜ୍ଞାନିକମାନଙ୍କ ଦ୍ୱାରା ଭୂମି ପେନେଟ୍ରେଟିଂ ରାଡାର ସର୍ଭେ ଅନୁଯାୟୀ ଚିହ୍ନଟ ହୋଇଥିବା ସନ୍ଦିଗ୍ଧ ସ୍ଥାନଗୁଡ଼ିକରେ ମୃତଦେହ ଠାବ ପାଇଁ ଉଦ୍ଧାରକାରୀ ଦଳ ପ୍ରୟାସ ଜାରି ରଖିଛନ୍ତି।
ହାଇଦ୍ରାବାଦର ଏକ ରୋବୋଟିକ୍ସ କମ୍ପାନୀର ଦଳ ମଙ୍ଗଳବାର ସକାଳେ ଏକ ରୋବୋଟ୍ ସହିତ ସୁଡ଼ଙ୍ଗ ଭିତରକୁ ଯାଇଛନ୍ତି। କୌଣସି ଅଘଟଣକୁ ଏଡାଇବା ପାଇଁ ସେମାନଙ୍କ ସହିତ ୧୧୦ ଜଣ ଉଦ୍ଧାରକାରୀ ମଧ୍ୟ ସୁଡ଼ଙ୍ଗ ଭିତରକୁ ଯାଇଛନ୍ତି।
ତେଲେଙ୍ଗାନା ସରକାର ଉଦ୍ଧାରକାରୀଙ୍କ ପାଇଁ କୌଣସି ବିପଦ ଏଡାଇବା ପାଇଁ ରୋବୋଟ୍ ନିୟୋଜିତ କରିବାକୁ ନିଷ୍ପତ୍ତି ନେଇଥିଲେ। କାରଣ ସୁଡ଼ଙ୍ଗ ଭିତରେ ପାଣି ଏବଂ ପଙ୍କ ରହିଥିବାବେଳେ ଏହି ପରିସ୍ଥିତିର ମୁକାବିଲା କରିବା ଉଦ୍ଧାରକାରୀ ଦଳ ପାଇଁ ଏକ ଚ୍ୟାଲେଞ୍ଜ ସୃଷ୍ଟି କରିଥିଲା।
ରାଜ୍ୟ ଜଳସେଚନ ମନ୍ତ୍ରୀ ଏନ. ଉତ୍ତମ କୁମାର ରେଡ୍ଡି ମାର୍ଚ୍ଚ ୮ ତାରିଖରେ କହିଥିଲେ ଯେ ସରକାର ରୋବୋଟ୍ ବିଶେଷଜ୍ଞଙ୍କ ସେବା ବ୍ୟବହାର କରି ଏହି କାର୍ଯ୍ୟ କରିବା ପାଇଁ ଚାରି କୋଟି ଟଙ୍କା ଖର୍ଚ୍ଚ କରିବେ। ବିଶାଳ ଟନେଲ୍ ବୋରିଂ ମେସିନର ଖଣ୍ଡଗୁଡ଼ିକ ପାଣି ତଳେ ବୁଡ଼ି ଯାଇଥିବାବେଳେ ସୁଡ଼ଙ୍ଗ ଭିତରେ ମାଟି ଏବଂ ପଥର ଉଦ୍ଧାରକାରୀ ଦଳ ପାଇଁ ବିପଦ ସୃଷ୍ଟି କରିଥିଲା। ତେଣୁ ଶ୍ରମିକମାନଙ୍କୁ ଠାବ କରିବା ସମ୍ଭବ ହୋଇନଥିଲା। ତେବେ ରୋବୋଟ୍ ବ୍ୟବହାର କରି ଶ୍ରମିକମାନଙ୍କୁ ଉଦ୍ଧାର ପାଇଁ ରୋବୋଟ୍ ବିଶେଷଜ୍ଞଙ୍କ ସେବା ବ୍ୟବହାର କରିବାକୁ ରାଜ୍ୟ ସରକାର ନିଷ୍ପତ୍ତି ନେଇଛି।
ମାର୍ଚ୍ଚ ୨ ତାରିଖରେ ସୁଡ଼ଙ୍ଗ ପରିଦର୍ଶନ କରିଥିବା ମୁଖ୍ୟମନ୍ତ୍ରୀ ଏ ରେବନ୍ତ ରେଡ୍ଡି, ଉଦ୍ଧାରକାରୀଙ୍କ ପାଇଁ କୌଣସି ବିପଦ ଏଡାଇବା ପାଇଁ ଆବଶ୍ୟକ ହେଲେ ସୁଡ଼ଙ୍ଗ ଭିତରେ ରୋବୋଟ୍ ବ୍ୟବହାର କରିବାକୁ ଅଭିଯାନର ନେତୃତ୍ୱ ନେଉଥିବା ଅଧିକାରୀମାନଙ୍କୁ ପରାମର୍ଶ ଦେଇଥିଲେ।
ସାତ ଜଣଙ୍କୁ ଠାବ କରିବା ପାଇଁ ଏଡିଆରଏଫ, ସରକାରୀ ଖଣି ସଂସ୍ଥା ସିଙ୍ଗାରେନି କୋଲିୟାରିଜ୍, ମୂଷା ଖଣି କର୍ମଚାରୀ ଏବଂ ଅନ୍ୟ ଉଦ୍ଧାରକାରୀ ଦଳ ନିୟୋଜିତ ହୋଇଛନ୍ତି। କୁକୁର ଦ୍ୱାରା ସୂଚିତ ନିର୍ଦ୍ଦିଷ୍ଟ ସ୍ଥାନରେ ମୃତଦେହ ଠାବ କରିବା ପାଇଁ ଉଦ୍ୟମ ଜାରି ରଖିଛନ୍ତି । ଗତକାଲି ଉଦ୍ଧାରକାରୀ ଦଳ ଜଣେ ଶ୍ରମିକଙ୍କ ମୃତଦେହ ମେସିନରେ ଚାପି ହୋଇ ରହିତିବା ଅବସ୍ଥାରେ ଉଦ୍ଧାର କରାଯାଇଥିଲା।
