କାବୁଲ/ନୂଆଦିଲ୍ଲୀ: ଆଫଗାନିସ୍ତାନ ରାଜଧାନୀ କାବୁଲରେ ଭାରତୀୟ ଦୂତାବାସ ବନ୍ଦ ଖୋଲା ରହିବା ତାଲିବାନମାନେ ଚାହାନ୍ତି। ଏଥିପାଇଁ ସେମାନେ ଭାରତକୁ ପ୍ରସ୍ତାବ ଦେଇଥିବା ଏବଂ ଦୂତାବାସ କର୍ମଚାରୀଙ୍କୁ ସେମାନେ ଆବଶ୍ୟକ ସୁରକ୍ଷା ଯୋଗାଇଦେକୁ ପ୍ରତିଶ୍ରୁତି ଦେଇଥିବା ସୂଚନା ମିଳିଛି। ବରିଷ୍ଠ ତାଲିବାନ ନେତା ଶେର୍ ମହମ୍ମଦ ଆବାସ୍ ଷ୍ଟାନେକଜାଇ ଏ ନେଇ ଅଣଆନୁଷ୍ଠାନିକ ଭାବେ ଭାରତକୁ ଅବଗତ କରିବା ସହ କୂଟନୈତିକ ସମ୍ପର୍କ ଜାରି ରଖିବାକୁ କହିଥିବା ଗୁଇନ୍ଦା ସୂତ୍ରରୁ ପ୍ରକାଶ। ଭାରତ ସରକାର ଆଫଗାନିସ୍ତାନରୁ ନିଜର ସମସ୍ତ ନାଗରିକ ଓ ଦୂତାବାସ କର୍ମଚାରୀଙ୍କୁ ଫେରାଇ ଆଣୁଥିବାବେଳେ ତାଲିବାନର ଏଭଳି ମନୋଭାବ ଆଶା ସଞ୍ଚାର କରିଛି। ଗତ ସପ୍ତାହରେ ଦୋହାରେ ଚାଲିଥିବା ଆଲୋଚନା ସମୟରେ ମଧ୍ୟ ତାଲିବାନ ନେତାମାନେ ଭାରତୀୟ ପ୍ରତିନିଧିଙ୍କୁ ଏହି ମର୍ମରେ ନିବେଦନ କରିଥିଲେ। ତାଲିବାନ ଶାସନକୁ ନେଇ ଭାରତ କୌଣସିମତେ ଆତଙ୍କିତ ହେବାର ନାହିଁ ବୋଲି ଆବାସ୍ ଭରସା ଦେଇଥିଲେ। ଏମିତି କି ଲସ୍କର କିମ୍ବା ଜୈସ୍ ପକ୍ଷରୁ ମଧ୍ୟ ଭୟ ନ ଥିବା ସେ କହିଥିଲେ। ଗୁରୁବାର ତାଲିବାନ ମୁଖପାତ୍ର ଏମ୍. ନଇମ୍ ଏକ ଭିଡିଓ ବାର୍ତ୍ତାରେ କହିଥିଲେ ଯେ ଗୁରୁଦ୍ବାର ଓ ଅନ୍ୟ ସ୍ଥାନରେ ଆଶ୍ରୟ ନେଇଥିବା ଭାରତୀୟଙ୍କ ସୁରକ୍ଷା ପ୍ରତି ଧ୍ୟାନ ଦିଆଯିବ। ସେମାନଙ୍କ ପ୍ରତି ବିପଦ ନାହିଁ। ଏହା ସତ୍ତ୍ବେ ଭାରତୀୟଙ୍କ ପ୍ରତ୍ୟାବର୍ତ୍ତନ ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚିଛି।
Popular Categories
Previous article
Next article