କଟକ: କେର୍ଚ ଷ୍ଟ୍ରେଟ୍ର ଗଭୀର ସମୁଦ୍ରରେ ଦୁଇଟି ଜାହାଜରେ ନିଆଁ ଲାଗିବା ଘଟଣାରେ ୬ ଜଣଙ୍କ ମୃତ୍ୟୁ ଘଟିଥିବା ସୂଚନା ମିଳିଛଇ । ଏହା ସହ ବର୍ତ୍ତମାନ ସୁଦ୍ଧା ଅନ୍ୟ ୬ ଜଣ ନିଖୋଜ ଅଛନ୍ତି । ଏ ନେଇ ବୈଦେଶିକ ବ୍ୟାପାର ମନ୍ତ୍ରାଳୟ ପକ୍ଷରୁ ବୁଧବାର ସୂଚନା ଦିଆଯାଇଥିଲା । ନିଖୋଜଙ୍କ ମଧ୍ୟରେ ଜଣେ ଓଡ଼ିଆ ଯୁବକ ଥିବା ଜଣାପଡିଛି । ସେ ହେଉଛନ୍ତି ସମ୍ବଲପୁର ଜିଲାର ସିଦ୍ଧାର୍ଥ ମେହେର । ଦୁର୍ଘଟଣାଗ୍ରସ୍ତ ଜାହାଜରେ ସିଦ୍ଧାର୍ଥ କାର୍ଯ୍ୟରତ ଥିଲେ ବୋଲି ତାଙ୍କ ପରିବାର ଲୋକେ କହିଛନ୍ତି । ସିଦ୍ଧାର୍ଥ ଯେଉଁ ଜାହାଜରେ ଥିଲା ସେଥିରେ ନିଆଁ ଲାଗିଯାଇଛି ବୋଲି ଗତ ୨୧ ତାରିଖ ରାତିରେ ଆମେ ଖବର ପାଇଥିଲୁ । ଏନେଇ ବୈଦେଶିକ ବ୍ୟାପାର ମନ୍ତ୍ରାଳୟକୁ ମେଲ୍ ଆସିଥିଲା ବୋଲି ସିଦ୍ଧାର୍ଥଙ୍କ ବାପା ସତ୍ୟନାରାୟଣ ମେହେର କହିଛନ୍ତି ।
ଜାହାଜର ବିସ୍ଫୋରଣ ହୋଇ ନିଆଁ ଲାଗିବା ସମୟରେ ୩ଜଣ ସାଙ୍ଗଙ୍କ ସହ ସିଦ୍ଧାର୍ଥ ସମୁଦ୍ରକୁ ଡେଇଁ ପଡ଼ିଥିଲେ। ସେମାନଙ୍କ ମଧ୍ୟରୁ ଦୁଇ ଜଣଙ୍କୁ ଉଦ୍ଧାର କରାଯାଇଥିବା ବେଳେ ଏପଯ୍ୟନ୍ତ ସିଦ୍ଧାର୍ଥଙ୍କର ପତ୍ତା ମିଳୁନାହିଁ । ସିଦ୍ଧାର୍ଥ ଲାଇଫ୍ ଜ୍ୟାକେଟ୍ ନେଇ ସମୁଦ୍ରକୁ ଡେଇଁଥିଲେ ବୋଲି ଉଦ୍ଧାର ହୋଇଥିବା ତାଙ୍କ ଦୁଇ ସାଙ୍ଗ କହିଛନ୍ତି ।
ସୂଚନାଯୋଗ୍ୟ, ଗତ ୨୧ ତାରିଖରେ ରୁଷିଆରୁ କ୍ରିମିଆକୁ ଅଲଗା କରୁଥିବା କେର୍ଚ ଷ୍ଟ୍ରେଟ୍ର ଗଭୀର ସମୁଦ୍ରରେ ଦୁଇଟି ଜାହାଜରେ ନିଆଁ ଲାଗିଥିଲା। ଏହି ଦୁଇଟି ଜାହାଜ ମଧ୍ୟରୁ କାଣ୍ଡି ନାମକ ଜାହାଜରେ ୧୭ ଜଣ ଚାଳକ ସଦସ୍ୟ ରହିଥିବା ବେଳେ ୯ ଜଣ ତୁର୍କୀର ଏବଂ ୮ ଜଣ ଭାରତୀୟ ନାବିକ ଥିଲେ । ମାଷ୍ଟ୍ରେଓ ନାମକ ଅନ୍ୟ ଏକ ଜାହାଜରେ ୭ ଜଣ ତୁର୍କୀ ନାଗରିକ, ୭ ଜଣ ଭାରତୀୟ ଓ ଜଣେ ଲିବ୍ୟାର ନାଗରିକ ସମେତ ମୋଟ ୧୫ ଜଣ ନାବିକ ଥିବା ସୂଚନା ମିଳିଥିଲା । ବିସ୍ଫୋରଣ ଘଟି ନିଆଁ ଲାଗିବା ପରେ ଅନେକ ନାବିକ ଜାହାଜରୁ ଡେଇଁ ପଡିଥିଲେ ।
