ନୂଆଦିଲ୍ଲୀ: ଇଶା ଫାଉଣ୍ଡେସନ ମାମଲାରେ ଏହାର ପ୍ରତିଷ୍ଠାତା ସଦ୍ଗୁରୁଙ୍କୁ ସୁପ୍ରିମକୋର୍ଟରେ ଆଶ୍ବସ୍ତି ମିଳିଛି। ଇଶା ଫାଉଣ୍ଡେସନ ବିରୋଧରେ ମାଡ୍ରାସ ହାଇକୋର୍ଟରେ ଯେଉଁ ମାମଲା ଦାଏର କରାଯାଇଥିଲା, ତାହାକୁ ପ୍ରଧାନ ବିଚାରପତି ଜଷ୍ଟିସ ଡି.ୱାଇ.ଚନ୍ଦ୍ରଚୂଡଙ୍କ ଅଧ୍ୟକ୍ଷତାରେ ଗଠିତ ସୁପ୍ରିମକୋର୍ଟ ପୀଠ ଶୁକ୍ରବାର ଖାରଜ କରିଦେଇଛନ୍ତି। ସୂଚନାଯୋଗ୍ୟ ତାମିଲନାଡୁର କୋଏମ୍ବାଟୁର ସହରରେ ଇଶା ଫାଉଣ୍ଡେସନର ଆଶ୍ରମ ରହିଛି। ତେବେ ଏହି ଆଶ୍ରମରେ ଦୁଇ ଜଣ ଯୁବତୀଙ୍କୁ ଜବରଦସ୍ତ ଅଟକ ରଖାଯାଇଛି ବୋଲି ଅଭିଯୋଗ କରି ସେମାନଙ୍କ ପିତା ମାଡ୍ରାସ ହାଇକୋର୍ଟରେ ଏକ ପିଟିସନ ଦାଏର କରିଥିଲେ। ଏହାର ଶୁଣାଣି କରି ହାଇକୋର୍ଟ ଆଶ୍ରମ ଉପରେ ଚଢଉ କରି ତଦନ୍ତ କରିବାକୁ କିଛି ମାସ ପୂର୍ବେ ତାମିଲନାଡୁ ପୁଲିସକୁ ନିର୍ଦେଶ ଦେଇଥିଲେ। ଅପରପକ୍ଷରେ ଗୀତା ଓ ଲତା ନାମ୍ନୀ ଏହି ଭଉଣୀ ସାବାଳିକା ହୋଇଥିବାବେଳେ ସ୍ବଇଚ୍ଛାରେ ଆଶ୍ରମରେ ବାସ କରୁଛନ୍ତି ବୋଲି ଇଶା ଫାଉଣ୍ଡେସନ ପକ୍ଷରୁ ସଫେଇ ଦିଆଯାଇଥିଲା। ଏପରିକି ଗୀତା ଓ ଲତା ହାଇକୋର୍ଟରେ ହାଜର ହୋଇ ଜବରଦସ୍ତ ଅଟକ ଅଭିଯୋଗକୁ ଖଣ୍ଡନ କରିଥିଲେ। ଏହାପରେ ମାଡ୍ରାସ ହାଇକୋର୍ଟଙ୍କ ନିର୍ଦେଶ ପ୍ରତିବାଦରେ ଇଶା ଫାଉଣ୍ଡେସନ ପକ୍ଷରୁ ସୁପ୍ରିମକୋର୍ଟରେ ଏକ ପିଟିସନ ମଧ୍ୟ ଦାଏର କରାଯାଇଥିଲା।
Popular Categories
Previous article
Next article