ନୂଆଦିଲ୍ଲୀ : ଅହମଦାବାଦରେ ଏକ ଛାତିଥରା ଓ ଭୟଙ୍କର ଦୃଶ୍ୟ ସାମ୍ନାକୁ ଆସିଛି । ଘଟଣାଟି ହଇଚଇ ସହ ଭୟର ବାତାବରଣ ଖେଳାଇଛି । ଏଠାରେ ଏକ ପୋଷା ରଟ୍ୱିଲର୍ କୁକୁର ଆକ୍ରମଣ କରିବା ପରେ ୪ ମାସର ଏକ ଶିଶୁର ମୃତ୍ୟୁ ଘଟିଛି । ଘଟଣା ପରେ କୁକୁର ମାଲିକକୁ ପୁଲିସ ଗିରଫ କରିଛି । ଉକ୍ତ ବ୍ୟକ୍ତିଙ୍କ ନିକଟରେ ଅସାବଧାନତା କାରଣରୁ ମୃତ୍ୟୁ ଓ ହିଂସ୍ର ଜନ୍ତୁକୁ ଅସାବଧାନତା ସହ ରଖିବା ନେଇ ମାମଲା ରୁଜୁ ହୋଇଛି ।
ଏହି ଘଟଣାର ଭିଡିଓ ଏବେ ସୋସିଆଲ ମିଡିଆରେ ଦ୍ରୁତ ଗତିରେ ଭାଇରାଲ୍ ହେବା ସହ ସଭିଁଙ୍କ ଧ୍ୟାନକୁ ଆକର୍ଷିତ କରୁଛି । ମେ’ ୨୦ରେ ଏକ୍ସରେ ଏହି ଭିଡିଓ ଶେୟାର କରାଯାଇଛି । ଏଥିରେ ସୂଚନା ମିଳିଛି, ରଟ୍ୱିଲର୍ କୁକୁର ଆକ୍ରମଣରେ ଏକ ୪ ମାସ ଶିଶୁର ମୃତ୍ୟୁ ଘଟିଛି । ଭିଡିଓକୁ ଲକ୍ଷ ଲକ୍ଷ ଲୋକେ ଦେଖିବା ସହ ନିଜର ଭିନ୍ନ ଭିନ୍ନ ମତ ଦେଇଛନ୍ତି । ଦୋଷୀକୁ ଉପଯୁକ୍ତ ଦଣ୍ଡ ଦେବାକୁ ଅନୁରୋଧ କରିଛନ୍ତି।
Rotweiller Dog k!lled 4 month old baby girl in Ahmedabad💔
pic.twitter.com/mvnhpRRbwJ— Ghar Ke Kalesh (@gharkekalesh) May 20, 2025
ଏହି ଅଘଟଣ ମଙ୍ଗଳବାର ସନ୍ଧ୍ୟାରେ ଘଟିଛି । ଶିଶୁର ମାଉସୀ ତା’କୁ କଲୋନୀକୁ ବୁଲାଇବାକୁ ଆଣିଥିଲେ । ସେଠାରେ ଅନ୍ୟାନ୍ୟ ଲୋକେ ମଧ୍ୟ କଥାବାର୍ତ୍ତା ହେଉଥିବା ଭିଡିଓରେ ଦେଖିପାରିବେ । ସେହି ସମୟରେ ମାଲିକ କୁକୁରର ପଟିକୁ ହାତରେ ଧରିଥିବା ଦେଖାଯାଉଛି। ମାତ୍ର କୁକୁରଟି ହଠାତ୍ ଦୌଡି ଯାଇ ଶିଶୁକୁ ଆକ୍ରମଣ କରୁଛି । ଏହାପରେ କୁକୁର ଶିଶୁକୁ ଆକ୍ରମଣ କରି ତଳେ ପକାଇ ଦେଇଥିଲା । ଫଳରେ ଶିଶୁ ଗୁରୁତର ଆହତ ହୋଇଥିଲା । ଶିଶୁଟିର ମୁଣ୍ଡରେ ଗଭୀର ଆଘାତ ଲାଗିଥିଲା । ହସ୍ପିଟାଲ ନେବା ପରେ ଶିଶୁକୁ କିଛି ସମୟ ପରେ ଡାକ୍ତର ମୃତ ଘୋଷଣା କରିଥିଲେ । ଶିଶୁର ମାଉସୀଙ୍କ ପେଟ ଓ ଅଣ୍ଟାରେ ଗଭୀର ଆଘାତ ଲାଗିବା ସହ ତାଙ୍କର ମଧ୍ୟ ଚିକିତ୍ସା ଜାରି ରହିଛି । ଶିଶୁର ପରିବାର ଲୋକଙ୍କ ଅଭିଯୋଗ ପରେ କୁକୁର ମାଲିକଙ୍କୁ ଗିରଫ କରାଯାଇ ଘଟଣାର ତଦନ୍ତ କରାଯାଉଛି ।
ସ୍ଥାନୀୟ ଲୋକଙ୍କ ଅଭିଯୋଗ ଅନୁଯାୟୀ ପୂର୍ବରୁ ମଧ୍ୟ କୁକୁର ଅନେକ ଶିଶୁ ଓ ଲୋକଙ୍କୁ ଆକ୍ରମଣ କରିବାକୁ ଚେଷ୍ଟା କରିଥିଲା । ମାତ୍ର କୌଣସି ପଦକ୍ଷେପ ଗ୍ରହଣ କରାଯାଇନଥିଲା ।
