ସମାଜ ପୋର୍ଟାଲ ଡେସ୍କ: ଡାକ୍ତର, ନର୍ସ ଓ ସ୍ବାସ୍ଥ୍ୟକର୍ମୀଙ୍କ ପାଇଁ ଖୁସି ଖବର। ଏଣିକି ରୋବର୍ଟ ସହାୟତାରେ କୋଭିଡ୍-୧୯ ଆକ୍ରାନ୍ତଙ୍କୁ ଖାଦ୍ୟ ଓ ଔଷଧ ଯୋଗାଇ ଦିଆଯାଇ ପାରିବ। ଦେଶର ବିଭିନ୍ନ ହସ୍ପିଟାଲ୍ରେ କରୋନା ଦ୍ବାରା ଆକ୍ରାନ୍ତ ହେଉଥିବା ରୋଗୀମାନଙ୍କୁ ଚିକିତ୍ସା କରି ଡାକ୍ତର ଓ ସ୍ବାସ୍ଥ୍ୟକର୍ମୀ ସଂକ୍ରମିତ ହୋଇଥିବା ଉଦାହରଣ ରହିଛି। ତେଣୁ ରୋବୋର୍ଟ ଦ୍ବାରା ଖାଦ୍ୟ ଓ ଔଷଧ ପରିବେଷଣ କରାଯିବା ପରେ ଏହି ମହାମାରି ସଂକ୍ରମଣରୁ ସେମାନେ ରକ୍ଷା ପାଇପାରିବେ ବୋଲି ଆଶା କରାଯାଉଛି।
‘କୋଭିଡ୍-୧୯’ ତଥା କରୋନା ଭୂତାଣୁ ସଂକ୍ରମିତ ବ୍ୟକ୍ତିଙ୍କୁ ଚିକିତ୍ସା କରୁଥିବା ଡାକ୍ତର, ନର୍ସ ଓ ସ୍ବାସ୍ଥ୍ୟକର୍ମୀଙ୍କୁ ମଧ୍ୟ କରୋନା ଆକ୍ରାନ୍ତ ହେବା ସମ୍ଭାବନା ରହିଛି। ଏପରିକି ଭାରତ ସମେତ ବିଭିନ୍ନ ଦେଶରେ କରୋନା ଭୂତାଣୁ ଆକ୍ରାନ୍ତ ରୋଗୀଙ୍କୁ ଚିକିତ୍ସା କରୁଥିବା ଡାକ୍ତର ଓ ନର୍ସ ଏଥିରେ ଆକ୍ରାନ୍ତ ହୋଇ ମୃତ୍ୟୁ ହୋଇଥିବା ଦେଖାଯାଇଛି। ତେଣୁ ସେମାନେ ଭୟ ଓ ଆଶଙ୍କାରେ କରୋନା ଆକ୍ରାନ୍ତ ରୋଗୀଙ୍କୁ ଚିକିତ୍ସା ସେବା ଯୋଗାଇ ଦେଉଛନ୍ତି। ତେବେ ରୋବୋର୍ଟ ଦ୍ବାରା ଖାଦ୍ୟ ଓ ଔଷଧ ଯୋଗାଇ ଦିଆଯାଇପାରିବ ବୋଲି ଜଣାପଡ଼ିବା ପରେ ସେମାନଙ୍କ ମନରେ ନୂତନ ଆଶା ସଞ୍ଚାର ହୋଇଛି।
ଝାଡ଼ଖଣ୍ଡର ଦକ୍ଷିଣ ସିଂହଭୂମ ଜିଲ୍ଲାର ଦୁଇଟି ହସ୍ପିଟାଲ୍ରେ କୋଭିଡ୍-୧୯ ଆକ୍ରାନ୍ତକୁ ରୋବର୍ଟ ଦ୍ବାରା ଔଷଧ ଓ ଖାଦ୍ୟ ପରଷିବ। ଫଳରେ ଡାକ୍ତର ନର୍ସ, ଓ ସ୍ବାସ୍ଥ୍ୟକର୍ମୀମାନେ କରୋନା ଭୂତାଣୁ ଦ୍ବାରା ଆକ୍ରାନ୍ତ ନହୁଅନ୍ତୁ ବୋଲି ହସ୍ପିଟାଲ୍ ପକ୍ଷରୁ ଏପରି ପଦକ୍ଷେପ ନିଆଯାଇଛି। କରୋନା ଭୂତାଣୁ ସଂକ୍ରମିତ ରୋଗୀଙ୍କୁ ଖାଦ୍ୟ ଓ ଔଷଧ ପରିବେଷଣ କରିବାକୁ ଥିବା ରିମୋର୍ଟ କଣ୍ଟ୍ରୋଲ୍ ରୋବର୍ଟଟିକୁ ଡେପୁଟି ଡେଭ୍ଲପ୍ମେଣ୍ଟ କମିସନର୍(ଡିଡିସି) ଆଦିତ୍ୟ ରଞ୍ଜନ ବାହାର କରିଛନ୍ତି। ଏହି ରିମୋର୍ଟ କଣ୍ଟ୍ରୋଲ୍ କୋବଟ-ରୋବଟିକ୍ସ ବିନା ମଣିଷର ସଂପୃକ୍ତିରେ କୋଭିଡ୍ ଆକ୍ରାନ୍ତଙ୍କୁ ଖାଦ୍ୟ ଓ ଔଷଧ ପ୍ରଦାନ କରିବା ଦକ୍ଷତା ରଖିଛି। ଏହା ହାଇଟେକ୍-ଆଇସୋଲେସନ୍ ୱାର୍ଡ, ଏଏନ୍ଏମ୍ ସ୍କିଲ୍ ସେଣ୍ଟର୍, ଚାଇଁବସା ସଦର ହସ୍ପିଟାଲ୍, କୋଭିଡ-୧୯ ରେଲ୍ୱେ ହସ୍ପିଟାଲ୍ ଓ ଚକ୍ରଧରପୁରଠାରେ ଉନ୍ମୋଚିତ ହେବ। ୱାର୍ଡର ପ୍ରତ୍ୟେକ ବେଡ୍କୁ ଏକ ଘର ଢଙ୍ଗରେ ଡିଜାଇନ୍ କରାଯାଇଛି। ସେଠାରେ ଆକ୍ରାନ୍ତମାନଙ୍କୁ ଔଷଧ ଓ ଖାଦ୍ୟ ପରଷା ଯିବାକୁ ଯୋଜନା ପ୍ରସ୍ତୁତ ହୋଇଛି। କୋବଟ-ରୋବଟିକ୍ସ ଦ୍ବାରା ଏହି ଖାଦ୍ୟ ଓ ଔଷଧ ପରଷା ଯିବ ବୋଲି ସୂଚନା ଦିଆଯାଇଛି।
