ରେଙ୍ଗାଲି: ରେଙ୍ଗାଲି ବ୍ଳକର ଖିଣ୍ଡା ପଞ୍ଚାୟତରେ ଥିବା ଏନଏଲସି କମ୍ପାନୀର କୋଇଲା ପରିବହନ ରେ ୱେ ବ୍ରିଜ୍ ଅଚଳର ଆଳ ଦେଖାଇ ପରିବହନକାରୀମାନଙ୍କୁ ଉଦ୍ଦେଶ୍ୟମୂଳକ ଭାବରେ ହଇରାଣ କରାଯାଉଥିବା ଏବଂ କମ୍ପାନୀ କୋଇଲା ପରିବହନ ପାଇଁ ଆସୁଥିବା ଭାରିଯାନର ପାର୍କିଂ ବ୍ୟବସ୍ଥା କରୁ ନଥିବା ପ୍ରତିବାଦରେ ଆଜି ପଶ୍ଚିମ ଓଡିଶା ମଲ୍ଟି ୟୁଟିଲିଟି ଭେକିଲ୍ସ ଏସୋସିଏସନ୍ ପକ୍ଷରୁ ସକାଲ ୮ଟାରୁ ଅପରାହ୍ନ ୨ଟା ପର୍ଯ୍ୟନ୍ତ ଖଣି ଫାଟକ ସାମ୍ନାରେ ଆନ୍ଦୋଳନ ଏବଂ ବିକ୍ଷୋଭ ପ୍ରଦର୍ଶନ କରାଯାଇଥିଲା।
ସୂଚନା ପାଇ ଏସଡିପିଓ ପ୍ରଦୀପ କୁମାର ସାହୁ ଠେଲକୁଲି ଆଇଆଇସି ଜୟରଶ୍ମୀ ସେଠି, ରେଙ୍ଗାଲି ଆଇଆଇସି ଧବଳେଶ୍ୱର ସାହୁ, କତରବଗା ଆଇଆଇସି ପ୍ରତାପ କୁମାର ରଣା ଶାସନ ଆଇଆଇସି ଲୋକନାଥ ସାହୁ ପ୍ରମୁଖ ସଦଳବଳେ ଘଟଣାସ୍ଥଳକୁ ପହଞ୍ଚି ପରିସ୍ଥିତିକୁ ନିୟନ୍ତ୍ରଣ କରି ଆନ୍ଦୋଳନକାରୀମାନଙ୍କୁ ବୁଝାସୁଝା କରି କମ୍ପାନୀ କର୍ତ୍ତୃପକ୍ଷଙ୍କ ସହିତ ତ୍ରିପାକ୍ଷିକ ଆଲୋଚନା କରାଇଥିଲେ। ଅପରାହ୍ନ ୨ଟା ରେ ୱେବ୍ରିଜ୍ ସ୍ୱାଭାବିକ ଭାବରେ ଚାଲିଲା ପରେ ଏବଂ ପାର୍କିଂ ଜୋନ୍ ପାଇଁ ପ୍ରତିଶ୍ରୁତି ଦିଆଗଲା ପରେ ଆନ୍ଦୋଳନ ପ୍ରତ୍ୟାହୃତ ହୋଇଥିଲା। ଆଲୋଚନାରେ ପଶ୍ଚିମ ଓଡିଶା ମଲ୍ଟି ୟୁଟିଲିଟି ଭେକିଲ୍ସଦ ଏସୋସିଏସନର ସଭାପତି ଦେବନ ପତି, ପଦ୍ମଲୋଚନ ଧର, ପିତାମ୍ବର ବିଶ୍ୱାଲ, ପ୍ରହଲ୍ଲାଦ ପ୍ରଧାନ, ଡୋଲାମଣି ରାଉତ, ସୁଶାନ୍ତ ପ୍ରଧାନ, ସମିତି ସଭ୍ୟା କମଳିନି ରାଏ ସମେତ ଖଣି କ୍ଷତିଗ୍ରସ୍ତ ପରିବାର ବହୁ ସଂଖ୍ୟକ ବ୍ୟକ୍ତି ଯୋଗ ଦେଇଥିଲେ।
