ରେଙ୍ଗାଲିକେମ୍ପ : ଗୋଡ଼ଭଗରୁ ରେଙ୍ଗାଲିକେମ୍ପ୍ ଛକ ମଧ୍ୟରେ ଦୁର୍ଘଟଣା ନିତିଦିନିଆ ଘଟି ଚାଲିଛି। ଛୋଟରୁ ବଡ ଧରଣର ଦୁର୍ଘଟଣାରେ ଗଡିଚଳିଛି ମୁଣ୍ଡ ପରେ ମୁଣ୍ଡ। ଆଜି ପୁଣି ଗୋଟିଏ ଅମୂଲ୍ୟ ଜୀବନ ଚାଲିଯାଇଛି ଏକ ମର୍ମନ୍ତୁଦ ଦୁର୍ଘଟଣାରେ। ଘଟଣାଟି ଘଟିଛି ୫୩ ନଂ ଜାତୀୟ ରାଜପଥରୁ ଅତାବିରା ବ୍ଲକ ଏନଏସିର ୧୧ ନଂ ୱାର୍ଡକୁ ଯାଇଥିବା ରେଙ୍ଗାଲିପାଲି ରାସ୍ତାରେ।ସକାଳ ପ୍ରାୟ ୧୧ ଟା ୪୫ ମିନିଟରେ ଏକ କ୍ରୁଜର ଗୋଟିଏ ବାଇକକୁ ଧକ୍କା ଦେବା ଫଳରେ ବାଇକ୍ ଆରୋହିଙ୍କ ମୃତ୍ୟୁ ଘଟିଛି। ଘଟଣା ସୂତ୍ରରୁ ଜଣା ପଡ଼ିଛି ଯେ ବରଗଡ଼ ଥାନା ଅନ୍ତର୍ଗତ ଅଡଗା ଗ୍ରାମରୁ ରେଙ୍ଗlଲିପାଲିକୁ ଦେଖିନି ମାଗିନି କରିବାକୁ ଏକ କୃଜର ଗାଡ଼ି ନଂ.ଓଆର୦୨ଏଡବ୍ଲ୍ୟୁ୬୭୭୭ରେ କିଛି ଲୋକ ଆସୁଥିବା ବେଳେ ରେଙ୍ଗlଲିପାଲି ଗାଆଁ ରାସ୍ତାରେ ଅପର ପାର୍ଶ୍ୱରୁ ଆସୁଥିବା ରେଙ୍ଗାଲିପାଳିର ଏକ ବାଇକ୍ ନଂ ଓଆର୧୭ଜି୮୬୬୮କୁ ଧକ୍କା ଦେବା ଫଳରେ ବାଇକ୍ ଆରୋହି ଶଙ୍କର ପ୍ରଧାନ ଛିଟିକି ପଡ଼ି ରକ୍ତାକ୍ତ ହୋଇଯାଇଥିଲେ। ଧକ୍କା ଦେଇ ଉକ୍ତ କ୍ରୁଜର ଚାଲକ ଘଟଣା ସ୍ଥଳରୁ ଚମ୍ପଟ ମାରିଥିଲେ। ଏହା ଦେଖି ସ୍ଥାନୀୟ ଲୋକେ ଶଙ୍କରଙ୍କୁ ଆମ୍ବୁଲାନ୍ସରେ ଅତାବିରା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ଆଣିଥିଲେ।
ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଏହି ଘଟଣାର ସୂଚନା ପାଇଁ ଅତାବିରା ପୋଲିସ ଘଟଣା ସ୍ଥଳରେ ପହଞ୍ଚି ଶବକୁ ଜବତ କରି ବ୍ୟବଚ୍ଛେଦ ପାଇଁ ବରଗଡକୁ ପଠେଇ ଥିବା ସହ କୃଜରକୁ ଜବତ କରିଛି ଓ ତଦନ୍ତ ଜାରି ରଖିଛି। ମୃତ ଶଙ୍କରର ସମ୍ପର୍କୀୟ ପୁତୁରା ଆର୍ତ୍ତତ୍ରାଣ ପ୍ରଧାନ ଅତାବିରା ଥାନାରେ କୃଜର୍ ଗାଡ଼ି ଚାଲକର ବେପରୁଆ ଗାଡ଼ି ଚାଳନା ଯୋଗୁଁ ଏହି ଦୁର୍ଘଟଣା ଘଟି ଶଙ୍କରର ମୃତ୍ୟୁ ହୋଇଛି,ଏହାର ବିହିତ ପଦକ୍ଷେପ ନିଆଯାଉ ବୋଲି ଲିଖିତ ଅଭିଯୋଗ କରିଛନ୍ତି। ତାଙ୍କର ଅଭିଯୋଗକୁ ଭିତ୍ତି କରି ପୋଲିସ କେସ ନମ୍ବର ୯୪ ତା ୧୩/୩/୨୨ରେ ଏକ କେସ ରୁଜୁ କରିଛି। ସବ୍ ଇନ୍ସପେକ୍ଟର ବିଏସ ନାଏକ ଏହି ଘଟଣାର ତଦନ୍ତ କରୁଥିବା ଜଣାପଡିଛି।
