ଖୋର୍ଦ୍ଧା : ରଥଯାତ୍ରା ଆସିଲେ ଶ୍ରୀକ୍ଷେତ୍ର ହୁଏ ଚଳଚଞ୍ଚଳ। ଏବର୍ଷକୁ ମିଶାଇ ଦୁଇବର୍ଷ ହେଲା ବଡ଼ଦାଣ୍ଡରେ ଆଉ ସେ ଗହଳି ନାହିଁ। କରୋନା ଭୂତାଣୁ ଭୟରେ କଟକଣାରେ ହେଉଛି ଶ୍ରୀଜଗନ୍ନାଥଙ୍କ ଘୋଷଯାତ୍ରା। ରଥ ଯାତ୍ରା ସମୟରେ ପୁରୀଙ୍କୁ ଶ୍ରଦ୍ଧାଳୁଙ୍କୁ ବାରଣ କରାଯାଇଛି। ମହାମାରୀ ଯୋଗୁଁ ଏଭଳି ପରିସ୍ଥିତି। ଶ୍ରୀଜଗନ୍ନାଥପ୍ରେମୀଙ୍କୁ ରଥ ଛୁଇଁବା ବ୍ୟଥିତ କରୁଛି। ଏପରି ଏକ କରୋନା କାଳରେ କିନ୍ତୁ ଶ୍ରୀଜଗନ୍ନାଥଙ୍କ ଭକ୍ତ ଜଟଣୀ ହାଟବଜାର(ଗୋପୀନାଥପୁର) ର ଶିଳ୍ପୀ ଈଶ୍ୱର ରାଓ ନିଜ ସୂକ୍ଷ୍ମ କାରୁକାର୍ଯ୍ୟରେ ନିର୍ମାଣ କରିଛନ୍ତି ତିନି କୁନିରଥ। ୪୩୫ ଖଣ୍ଡ ଦିଆସିଲ କାଠିରେ ତିନିରଥ ତିଆରି କରିଛନ୍ତି। କାଠିକୁ କାଠି ଯୋଡି ତିଆରି କରାଯାଇଥିବା ରଥର ଉଚ୍ଚତା ୪.୫ ଇଞ୍ଚ। ସରୁ ତୂଳୀରେ ରଥକୁ ରଙ୍ଗ ଦିଆଯାଇଛି। ନାଲି,ହଳଦିଆ ଓ ସବୁଜ ରଙ୍ଗରେ ଠିକ ନନ୍ଦିଘୋଷ, ଦେବଦଳନ ଓ ତାଳଧ୍ୱଜ ରଥ ପରି ସଜାଯାଇଛି। ତିନି ରଥରେ ବିରାଜମାନ ହେବେ ଶ୍ରୀଜଗନ୍ନାଥ,ଶ୍ରୀବଳଭଦ୍ର ଓ ମା’ସୁଭଦ୍ରା ଦେବୀ। ଈଶ୍ୱର ନିଜ ନିଖୁଣ କାମରେ ଏକ ଇଞ୍ଚ ଉଚ୍ଚତାରେ ତିନି ଠାକୁରଙ୍କ ମୂର୍ତ୍ତି ନିର୍ମାଣ କରିଛନ୍ତି। ଏହି ରଥ ନିର୍ମାଣ କରି ସେ ଜଗତର ନାଥ ଶ୍ରୀଜଗନ୍ନାଥଙ୍କୁ ପ୍ରାର୍ଥନା କରିଛନ୍ତି ଜଗତକୁ କରୋନା ମୁକ୍ତ ପାଇଁ। ଈଶ୍ୱରଙ୍କ ଏହି କଳାକୃତିକୁ ସାମାଜିକ ଗଣମାଧ୍ୟମରେ ବେଶ ପ୍ରଶଂସା ମିଳୁଛି।
