ଇସଲାମାବାଦ: ପୁଲୱାମା ଆକ୍ରମଣରେ ଜୈଶ-ଏ-ମହମ୍ମଦ(ଜେଇଏମ) ଆତଙ୍କାବାଦୀ ସଂଗଠନର ସମ୍ପୃକ୍ତି ରହିଛି। ଖୋଦ ଜୈଶ ସଂଗଠନ ଏହି ଘୋଷଣା କରୁଥିବାବେଳେ ପାକିସ୍ତାନ ସରକାର ଏହା ମାନିବାକୁ ନାରାଜ। ଏହା ଭିତରେ ଜୈଶ ସଂଗଠନ ପୁଣି ଥରେ ପୁଲୱାମା ଆକମ୍ରଣରେ ନିଜର ସମ୍ପୃକ୍ତି ଥିବା ନେଇ ଏକ ଗଣମାଧ୍ୟମକୁ ସୂଚନା ଦେଇଛି। ଫଳରେ ପାକିସ୍ତାନ ଜୈଶ ସଂଗଠନ ଏବଂ ଏହାର ମୁଖ୍ୟ ମାସୁଦ ଆଝାରଙ୍କୁ ସୁରକ୍ଷା ଦେଉଥିବା ଏଥିରୁ ସ୍ପଷ୍ଟ ହେଉଛି।
ଅନ୍ୟ ଏକ ଘଟଣାକ୍ରମରେ ପାକ୍ ସରକାର ଜୈଶକୁ ସୁରକ୍ଷା ଦେଉଥିବା ସାମ୍ନାକୁ ଆସିଛି। କହୁ କହୁ ସତ ଓଗାଳି ଦେଇଛନ୍ତି ପାକ୍ ବୈଦେଶିକ ମନ୍ତ୍ରୀ ଶାହ ମେହମ୍ମୁଦ କ୍ୟୁରେଶୀ। ଜୈଶ ସଂଗଠନ ସହ ପାକିସ୍ତାନର ସମ୍ପର୍କ ରହିଥିବା ବିବିସିକୁ ସାକ୍ଷାତକାର ଦେବା ଅବସରରେ କ୍ୟୁରେଶୀ ସ୍ବୀକାର କରିଛନ୍ତି।
ସାକ୍ଷାତକାର ସମୟରେ କ୍ୟୁରେଶୀ କହିଥିଲେ ଯେ, ପୁଲୱାମା ଆକ୍ରମଣରେ ଜୈଶର ସମ୍ପୃକ୍ତି ନେଇ ଆମେ ଦ୍ବନ୍ଦ୍ବରେ ଅଛୁ। ଯେତେବେଳେ ତାଙ୍କୁ ପ୍ରଶ୍ନ କରାଯାଇଥିଲା ଯେ କ’ଣ ପାଇଁ ଦ୍ବନ୍ଦ୍ବରେ ଅଛନ୍ତି, କ୍ୟୁରେଶୀ ଉତ୍ତର ଦେଇ କହିଥିଲେ ଯେ, ଆମେ ଜୈଶ ସହ ସମ୍ପର୍କରେ ଅଛୁ। ଆମେ ଏ ବିଷୟରେ ପଚାରିଥିଲୁ, କିନ୍ତୁ ସେମାନେ ମନା କରିଥିଲେ। ତେବେ ଏଭଳି ଉତ୍ତର ଦେବା ପରେ ସେ ସମ୍ପୂର୍ଣ୍ଣ ହଡ଼ବଡ଼େଇ ଯାଇଥିଲେ ଏବଂ ତାଙ୍କ ମତ ପରିବର୍ତ୍ତନ କରିବାକୁ ଉଦ୍ୟମ କରିଥିଲେ ବୋଳି ଟାଇମ୍ସନାଓ ଏକ ରିପୋର୍ଟ ପ୍ରକାଶ କରିଛି। ଜେଇଏମ ଆନୁଷ୍ଠାନିକ ଭାବେ ଆକ୍ରମଣ ପାଇଁ ନିଜକୁ ଦାୟୀ କରିବା ପରେ ମଧ୍ୟ କ୍ୟୁରେଶୀଙ୍କ ଏଭଳି ମନ୍ତବ୍ୟ ପାକିସ୍ତାନର ଆଭିମୁଖ୍ୟ ଉପରେ ପ୍ରଶ୍ନବାଚୀ ସୃଷ୍ଟି କରିଛି।
