ନୂଆଦିଲ୍ଲୀ : ଆମେରିକାରେ, ସମସ୍ତ ୫୦ଟି ରାଜ୍ୟର ହଜାର ହଜାର ଲୋକ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ପ୍ରଶାସନ ଏବଂ ନୀତିକୁ ବିରୋଧ କରି ଆନ୍ଦୋଳନ କରିଛନ୍ତି। ଏହି ‘ନୋ କିଙ୍ଗସ୍’ ପ୍ରତିବାଦ ପାଇଁ ସେଠାକାର ନାଗରିକମାନେ ଅନେକ ସଂଖ୍ୟାରେ ରାଜରାସ୍ତାରେ ବିକ୍ଷୋଭ ପ୍ରଦର୍ଶନ କରିଥିବା ଜଣାପଡ଼ିଛି। ଗଣମାଧ୍ୟମ ରିପୋର୍ଟ ଅନୁଯାୟୀ, ଶନିବାର ଆମେରିକାର ବିଭିନ୍ନ ସହରରେ ପ୍ରାୟ ୭୦ ଲକ୍ଷ ଲୋକ ୨୭୦୦ରୁ ଅଧିକ ସ୍ଥାନରେ ପ୍ରତିବାଦ କରିଥିଲେ।
ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସ୍ୱେଚ୍ଛାଚାରିତାକୁ ପ୍ରତ୍ୟାଖ୍ୟାନ କରିବା ଏବଂ ଆମେରିକୀୟ ଗଣତନ୍ତ୍ରକୁ ରକ୍ଷା କରିବା ଉଦ୍ଦେଶ୍ୟରେ ଏଭଳି ପ୍ରତିବାଦ ଓ ବିକ୍ଷୋଭ ପ୍ରଦର୍ଶନ କରାଯାଇଛି। ପ୍ରଦର୍ଶନକାରୀମାନେ ଗଣତାନ୍ତ୍ରିକ ମୂଲ୍ୟବୋଧର କ୍ଷୟ, କଠୋର ପ୍ରବାସୀ ଆଇନ ପ୍ରବର୍ତ୍ତନ, ସହରଗୁଡ଼ିକରେ ଫେଡେରାଲ୍ ସୈନ୍ୟ ମୁତୟନ ଏବଂ ସ୍ୱାସ୍ଥ୍ୟସେବା ଭଳି ସରକାରୀ ଯୋଜନାରେ କାଟଛାଣ୍ଟ ନେଇ ପ୍ରଦର୍ଶନ କରିଥିବା କହିଛନ୍ତି। ଟ୍ରମ୍ପ ଜଣେ ଗଣତାନ୍ତ୍ରିକ ନେତାଙ୍କ ପରି ବ୍ୟବହାର କରିବା ପରିବର୍ତ୍ତେ ଜଣେ ଏକଛତ୍ରବାଦୀ କିମ୍ବା ରାଜା ପରି ବ୍ୟବହାର କରୁଥିବା ସେମାନେ ଅଭିଯୋଗ କରିଛନ୍ତି। ଏହା ହେଉଛି ଟ୍ରମ୍ପଙ୍କ ଏଜେଣ୍ଡାକୁ ବିରୋଧ କରୁଥିବା ପ୍ରଗତିଶୀଳ ସଂଗଠନଗୁଡ଼ିକ ଦ୍ୱାରା ଆୟୋଜିତ ଦେଶବ୍ୟାପୀ ଦ୍ୱିତୀୟ ନୋ କିଙ୍ଗସ୍ ପ୍ରତିବାଦ।
ସମ୍ପ୍ରତି ଆମେରିକାରେ ପାଣ୍ଠି ବିବାଦ ଯୋଗୁଁ ସରକାରୀ କାର୍ଯ୍ୟକଳାପ ଏକ ପ୍ରକାର ଅଚଳାବସ୍ଥାକୁ ଆସି ଯାଇଥିବା ବେଳେ ଏଭଳି ଟ୍ରମ୍ପ ବିରୋଧୀ ପ୍ରଦର୍ଶନ ରାଜନୈତିକ ସଙ୍କଟ ଭଳି ସ୍ଥିତି ସୃଷ୍ଟି କରିଛି। ଡେମୋକ୍ରାଟିକ୍ ନେତାମାନେ ଏହି ଶାନ୍ତିପୂର୍ଣ୍ଣ ପ୍ରଦର୍ଶନକୁ ଦୃଢ଼ ସମର୍ଥନ ଜଣାଇଛନ୍ତି।
ଏହି ପ୍ରତିବାଦରେ ସଂଗଠନଗୁଡ଼ିକ ହାତ ମିଳାଇବା ପଛରେ ଲକ୍ଷ୍ୟ ହେଉଛି ଟ୍ରମ୍ପଙ୍କ ‘କଠୋରବାଦୀ’ ଏଜେଣ୍ଡାକୁ ବିରୋଧ କରିବା। ତେଣୁ ଆମେରିକାରେ ‘ନୋ କିଙ୍ଗସ୍ ପ୍ରତିବାଦ’ ନୋ ମୋନାର୍କ ଦିବସ ଭାବରେ ମଧ୍ୟ ଜଣାଶୁଣା। ଆମେରିକା ରାଷ୍ଟ୍ରପତି ଭାବରେ ଟ୍ରମ୍ପଙ୍କ ଦ୍ୱିତୀୟ କାର୍ଯ୍ୟକାଳର ପାଞ୍ଚ ମାସ ପରେ ନୋ କିଙ୍ଗସ୍ ପ୍ରତିବାଦର ପ୍ରଥମ ପର୍ଯ୍ୟାୟ ଆୟୋଜନ କରାଯାଇଥିଲା। ଜନ୍ମଗତ ନାଗରିକତା, ସଂଘୀୟ ବିବିଧତା, ଟ୍ରାନ୍ସଜେଣ୍ଡର ଲୋକଙ୍କ ପାଇଁ ସୁରକ୍ଷା, ଅନ୍ତର୍ଭୁକ୍ତିକରଣ ପଦକ୍ଷେପ ଏବଂ ଅନ୍ୟାନ୍ୟ ପ୍ରସଙ୍ଗ ସମ୍ପର୍କରେ ପ୍ରଶାସନର ନିଷ୍ପତ୍ତିକୁ ଏଭଳି ପ୍ରଦର୍ଶନ ମାଧ୍ୟମରେ ଆମେରିକାର ନାଗରିକମାନେ ବିରୋଧ କରୁଛନ୍ତି।
