ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କର ଫ୍ରାନ୍ସର ରାଷ୍ଟ୍ରପତି ଇମାନ୍ୱେଲ୍ ମାକ୍ରନ୍ଙ୍କ ସହ ୯୦ମିନିଟ୍ ପର୍ଯ୍ୟନ୍ତ ସଫଳ ଆଲୋଚନା ହୋଇଛି। ଶୁକ୍ରବାର ପ୍ୟାରିସରେ ବୈଦେଶିକ ସଚିବ ବିଜୟ ଗୋଖଲେ ସାମ୍ବାଦିକମାନଙ୍କୁ କହିଛନ୍ତି, ବିଶ୍ୱସ୍ତରୀୟ ଗୁରୁତ୍ୱପୂର୍ଣ୍ଣ ଅନେକ ବିଷୟରେ ଭାରତ ଓ ଫ୍ରାନ୍ସ ମଧ୍ୟରେ ଭାଗିଦାରୀ ସହଯୋଗ ରହିଥିବା ଏହି କଥାବାର୍ତ୍ତାରୁ ସ୍ପଷ୍ଟ ପ୍ରମାଣିତ ହୋଇଛି। ଆଗାମୀ ଜି-୭ ବୈଠକ ସଂକ୍ରାନ୍ତରେ ଉଭୟ ନେତା ବିସ୍ତୃତ ଆଲୋଚନା କରିଛନ୍ତି। ଜି-୭ ବୈଠକରେ ପରିବେଶ ସଂକଟ, ବାୟୁ ମଣ୍ଡଳରେ ଉତ୍ତାପ ବୃଦ୍ଧି ଆଦି ଗୁରୁତ୍ୱପୂର୍ଣ୍ଣ ପ୍ରସଙ୍ଗଗୁଡ଼ିକ ସ୍ଥାନ ପାଇବ। ଭାରତ ଓ ଫ୍ରାନ୍ସ ମଧ୍ୟରେ ଆପୋଷ କଥାବାର୍ତ୍ତା ଜରିଆରେ ମତପାର୍ଥକ୍ୟ ଦୂର କରାଯିବ ବୋଲି ଫ୍ରାନ୍ସ ରାଷ୍ଟ୍ରପତି ସ୍ପଷ୍ଟ ଭାବେ କହିଥିବା ଗୋଖଲେ କହିଛନ୍ତି।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଫ୍ରାନ୍ସ ପ୍ରଧାନମନ୍ତ୍ରୀ ଆଡୱାର୍ଡ୍ ଫିଲିପେଙ୍କ ସହ କଥାବାର୍ତ୍ତା କରିଛନ୍ତି। କଥାବାର୍ତ୍ତା ପରେ ପ୍ରଧାନମନ୍ତ୍ରୀ ମୋଦୀ ପ୍ୟାରିସ ସ୍ଥିତ ୟୁନେସ୍କୋ ସଭାଗାରକୁ ଯାଇଥିଲେ ଏବଂ ସେଠାରେ ସେ ପ୍ରବାସୀ ଭାରତୀୟମାନଙ୍କୁ ଉଦ୍ବୋଧନ ଦେବା ସଙ୍ଗେ ସଙ୍ଗେ ୧୯୫୦ ଓ ୧୯୬୬ ମସିହାରେ ଫ୍ରାନ୍ସରେ ଦୁର୍ଘଟଣା ଗ୍ରସ୍ତ ଏଆର୍ ଇଣ୍ଡିଆ ବିମାନର ମୃତକମାନଙ୍କ ପାଇଁ ଏକ ସ୍ମାରକୀକୁ ଉଦ୍ଘାଟନ କରିଥିଲେ। ମୋଦୀ କହିଥିଲେ, ଫ୍ରାନ୍ସର ବିକାଶ କ୍ଷେତ୍ରରେ ଭାରତୀୟମାନଙ୍କର ଯଥେଷ୍ଟ ଅବଦାନ ରହିଛି।
