ପିପିଲି : କାଳବୈଶାଖୀ ପବନରେ ପିପିଲି ମିଶନ ୟୁପି ସ୍କୁଲର ଆଲୁମିନିୟମ ଆଜବେଷ୍ଟସ ସିଟ୍ ଉଡିଯାଇଛି । ବୁଧବାର ସଂନ୍ଧ୍ୟାରେ ପିପିଲି ଅଞ୍ଚଳରେ କାଳବୈଶାଖୀ ପ୍ରଭାବରେ ପବନ ବହିବା ସହିତ ବର୍ଷା ହୋଇଥିଲା । ତେବେ ଏହି ପବନରେ ସ୍କୁଲର ପଶ୍ଚିମ ପାର୍ଶ୍ବରେ ଥିବା ଆଲୁମିନିୟମ ଆଜବେଷ୍ଟସ ସିଟ୍ ଉପରକୁ ଉଠି ଯାଇ ସମ୍ମୁଖ ଭାଗ ଆଲୁମିନିୟମ ଆଜବେଷ୍ଟସ ସିଟ୍ ଉପରେ କଚାଡି ହୋଇପଡିଥିଲା । ଏଥି ଯୋଗୁଁ ପ୍ରଚଣ୍ଡ ଶବ୍ଦ ହୋଇଥିବା ବେଳେ ଆଖପାଖ ଅଞ୍ଚଳରେ ବାସ କରୁଥିବା ଲୋକେ ଭୟବୀତ ହୋଇ ପଡିଥିଲେ । ଗତ ବର୍ଷ ସାମୁଦ୍ରିକ ବାତ୍ୟା ଫଣି’ରେ ଏହି ବିଦ୍ୟାଳୟର ସମସ୍ତ ଆଜବେଷ୍ଟସ ଉଡି ଯାଇଥିବା ବେଳେ ବିଦ୍ୟାଳୟର କାନ୍ଥ ଦୁର୍ବଳ ହୋଇଯାଇଥିଲା । ଉକ୍ତ ବିଦ୍ୟାଳୟକୁ ସଂପୂର୍ଣ୍ଣ ଭାବେ ଭାଙ୍ଗି ନୂତନ ଗୃହ ନିର୍ମାଣ କରିବାକୁ ବିଭିନ୍ନ ମହଲରୁ ଦାବି କରାଯାଇଥିଲା । ତେବେ ନୂତନ ଗୃହ ନିର୍ମାଣ କରିବା ପରିବର୍ତ୍ତେ ଗତ ପ୍ରାୟ ମାସକ ତଳେ ସରକାରଙ୍କ ପକ୍ଷରୁ ଲକ୍ଷାଧିକ ଟଙ୍କା ବ୍ୟୟ କରାଯାଇ ଉକ୍ତ ବିଦ୍ୟାଳୟ ଗୃହରେ ନୂତନ ଆଲୁମିନିୟମ ଆଜବେଷ୍ଟସ ସିଟ୍ ପକାଯାଇ ତାହାକୁ ମରାମତି କରାଯାଇଥିଲା । ସ୍କୁଲ ଗୃହର ପୁରୁଣା ଶାଳ କାଠର ଓରା ଓ ବଟମ ଗୁଡିକ ମଜବୁତ୍ ଥିବା ବେଳେ ସେଗୁଡିକୁ ଜାଣିଶୁଣି ବଦଳା ଯାଇ ସେହି ସ୍ଥାନରେ ଶସ୍ତା କାଠ ବ୍ୟବହାର କରାଯାଇଥିବା ନେଇ ସାଧାରଣରେ ଅଭିଯୋଗ ହୋଇଛି । ଆବଶ୍ୟକ ସଂଖ୍ୟକ କାଠର ବଟମ୍ ଲଗାନଯାଇ ଅତି ନିମ୍ନମାନର କାର୍ଯ୍ୟ କରାଯାଇଥିବା ଯୋଗୁଁ ବୁଧବାର ସଂନ୍ଧ୍ୟାରେ ହୋଇଥିବା ସାମାନ୍ୟ ପବନରେ ତାହା ଉଡିଯାଇଥିବା ନେଇ ଅଭିଯୋଗ ହୋଇଛି । ଏହି ଘଟଣାର ଉପଯୁକ୍ତ ତଦନ୍ତ କରାଯିବା ସହ ବିଦ୍ୟାଳୟ ଗୃହର ତୁରନ୍ତ ମରାମତି କରାଯିବାକୁ ଅଞ୍ଚଳବାସୀଙ୍କ ପକ୍ଷରୁ ଦାବି କରାଯାଇଛି ।
Popular Categories
Previous article
Next article