ଭୁବନେଶ୍ୱର : ପିଜିଆଇଏମ୍ଇଆର୍ ଆଣ୍ଡ କ୍ୟାପିଟାଲ ହସ୍ପିଟାଲରେ ବ୍ୟବସ୍ଥିତ ହୋଇପାରୁନି ସୁପର ସ୍ପେଶିଆଲିଷ୍ଟ ସେବା। ତ୍ବରିତ ସେବା ପାଇଁ ଗୋଟିଏ ସ୍ଥାନରେ ସୁପର ସ୍ପେଶିଆଲିଷ୍ଟ କମ୍ପ୍ଲେକ୍ସ କରାଯାଇ ଚାରି ବିଭାଗରେ ସେବା ଯୋଗାଇ ଦିଆଯାଉଛି। ହେଲେ ଏଠାରେ ଡାକ୍ତରଙ୍କ ଅଭାବ ଯୋଗୁଁ ଉପଯୁକ୍ତ ସେବା ପାଇବାରୁ ବଞ୍ଚିତ ହେଉଛନ୍ତି ଗରିବ ରୋଗୀ। କେବଳ ବହିର୍ବିଭାଗରେ ସୀମିତ ରହିଛି ସେବା । ଡାକ୍ତର ୪୦ ରୋଗୀଙ୍କୁ ସେବା ପ୍ରଦାନ କରୁଥିବାବେଳେ ଦୂରଦୂରାନ୍ତରୁ ଆସୁଥିବା ରୋଗୀ ଚିକିତ୍ସା ନପାଇ ଫେରୁଛନ୍ତି। ଏହାସହ ପର୍ଯ୍ୟାପ୍ତ ପରିମାଣର ଔଷଧ ମଧ୍ୟ ମିଳୁନଥିବା ଅଭିଯୋଗ ହୋଇଛି।
କ୍ୟାପିଟାଲ ହସ୍ପିଟାଲରେ ସୁପର ସ୍ପେଶିଆଲିଷ୍ଟ ବ୍ୟବସ୍ଥାରେ ପରିବର୍ତ୍ତନ ହୋଇପାରିଲା ନାହିଁ। ଏଠାରେ ଏଣ୍ଡୋକ୍ରୋନୋଲୋଜି, ୟୁରୋଲୋଜି, ନେଫ୍ରୋଲୋଜି ଏବଂ ନ୍ୟୁରୋଲୋଜି ଆଦି ୪ ବିଭାଗରେ ସେବା ଦିଆଯାଉଛି। ଏଣ୍ଡୋ ଏବଂ ୟୁରୋ ପାଇଁ ହସ୍ପିଟାଲ ଡାକ୍ତର କାର୍ଯ୍ୟ କରୁଥିବାବେଳେ ନେଫ୍ରୋ ଏବଂ ନ୍ୟୁରୋ ନିମନ୍ତେ ସପ୍ତାହରେ ଦିନେ ଲେଖାଏଁ କଟକରୁ ସ୍ବତନ୍ତ୍ରଭାବେ ପ୍ରଫେସର ଆସୁଛନ୍ତି। ଏହାସହିତ କର୍ପସ ପାଣ୍ଠି ଜରିଆରେ ଦୁଇ ଜଣ ଲେଖାଏଁ ଡାକ୍ତର କାର୍ଯ୍ୟ କରୁଛନ୍ତି। ପ୍ରତି ବାରିରେ ୪୦ ରୋଗୀଙ୍କୁ ସେବା ପ୍ରଦାନ କରାଯାଉଛି। ଆଉ କିଛି ଭେଷଜ ବିଭାଗରେ ପରାମର୍ଶ କରି ଫେରିଯାଉଥିବା ଜଣାପଡ଼ିଛି । ସୁପର ସ୍ପେଶିଆଲିଷ୍ଟ ପାଇଁ ରାତିରୁ ରୋଗୀ ଆସୁଛନ୍ତି । ଟିକଟ ପାଇଁ ଲମ୍ବା ଧାଡ଼ି ଲାଗିରହୁଛି।
ବିଶେଷ କରି ଟିକଟ କେନ୍ଦ୍ର ସାମ୍ନାରେ ରାତ୍ରି ବିଶ୍ରାମ କରୁଛନ୍ତି। ଏଠାରେ ପିଜି ପାଠ୍ୟକ୍ରମ ଆରମ୍ଭ ହେବା ପରେ ବର୍ତ୍ତମାନ ରୋଗୀ ସଂଖ୍ୟା ବଢ଼ିଛି। କିନ୍ତୁ ସୁପର ସ୍ପେଶିଆଲିଷ୍ଟ ବିଭାଗରେ ଚିକିତ୍ସା ପାଇବାକୁ ହେଲେ ମାସ ମାସ ଧରି ଅପେକ୍ଷା କରିବାକୁ ପଡୁଛି। ଏହାଦ୍ଵାରା ଅନେକ ରୋଗୀ ସମ୍ପର୍କୀୟ ଅସନ୍ତୋଷ ପ୍ରକାଶ କରିବା ସହିତ ଘରୋଇ ଚିକିତ୍ସାଳୟ ମୁହାଁଉଛନ୍ତି। ସବୁଠୁ ହଟହଟା ଦେଉଛନ୍ତି ନ୍ୟୁରୋଲୋଜି ଚିକିତ୍ସା ପାଇଁ ଆସୁଥିବା ରୋଗୀ। ସ୍ଵାସ୍ଥ୍ୟ ବିଭାଗରୁ ମିଳିଥିବା ସୂଚନା ଅନୁସାରେ ରାଜ୍ୟରେ ଏବେ ସୁପର ସ୍ପେଶିଆଲିଷ୍ଟ ଡାକ୍ତରଙ୍କ ଅଭାବ ରହିଛି। କେବଳ କ୍ୟାପିଟାଲ ହସ୍ପିଟାଲ ନୁହେଁ ବିଭିନ୍ନ ହସ୍ପିଟାଲରେ ମଧ୍ଯ ଏଭଳି ଅଭାବ ଦେଖାଦେଇଛି। ଏନେଇ ସରକାର ପଦକ୍ଷେପ ଗ୍ରହଣ କରୁଛନ୍ତି। ନୂଆ ଭେଷଜ ମହାବିଦ୍ୟାଳୟ ଖୋଲୁଛି, ଏହାଦ୍ଵାରା ରାଜ୍ୟରେ ଡାକ୍ତର ଅଭାବ ଦୂର ହୋଇପାରିବ ଏବଂ ନିକଟରେ ଡାକ୍ତର ପଦ ପୂରଣ ପାଇଁ ସରକାର କ୍ୟାବିନେଟରେ ମଞ୍ଜୁର କରିଛନ୍ତି।
