ସମାଜ ପୋର୍ଟାଲ ଡେସ୍କ: କରୋନା ସଂକ୍ରମଣ ଦୃଷ୍ଟିରୁ ସାରା ଦେଶରେ ଲକଡାଉନ ଘୋଷଣା ପରେ ଯଦିଓ ବିଭିନ୍ନ ଅଂଚଳକୁ ନିତ୍ୟ ବ୍ୟବହାର ଯୋଗ୍ୟ ଦ୍ରବ୍ୟ ପଠାଇଆବ କ୍ଷେତ୍ରରେ ସରକାର ଅନେକ ଗୁଡିଏ ପଦକ୍ଷେପ ଗ୍ରହଣ କରିଛନ୍ତି କିନ୍ତୁ ବାହାରେ ବୁଲୁଥିବା ଜୀବଜନ୍ତୁମାନଙ୍କ ପାଇଁ ନିଆଯାଇଥିବା ପଦକ୍ଷେପ ଯଥେଷ୍ଟ ହେଉନଥିବା ଜଣାପଡିଛି। ଗୃହପାଳିତ ପଶୁମାନଙ୍କ କ୍ଷେତ୍ରରେ ଯଦିଓ କୌଣସି ସମସ୍ୟା ନାହିଁ କିନ୍ତୁ ବାହାରେ ଏଣେତେଣେ ବୁଲୁଥିବା ଗାଈ, ଷଣ୍ଢ, କୁକୁର ଓ ବିଶେଷ କରି ମାଙ୍କଡ଼ ଭଳି ଜୀବଙ୍କ ଅବସ୍ଥା ଦିନକୁ ଦିନ ଅସମ୍ଭାଳ ହେବାରେ ଲାଗିଛି। ଲୋକମାନଙ୍କ ଚଳପ୍ରଚଳ ନ ଥିବାରୁ ଓ ବଜାରଘାଟ ବନ୍ଦ ଥିବାରୁ ସେହିଭଳି ପଶୁମାନେ ଖାଦ୍ୟ ନ ପାଇ ବିକଳରେ ଛଟପଟ ହେଉଛନ୍ତି।
ତେବେ ପାଟି ଫିଟୁ ନ ଥିବା ସେହି ଜନ୍ତୁମାନଙ୍କୁ ଖାଇବାକୁ ଯୋଗାଇ ଦେବାକୁ ଆଗେଇ ଆସିଛନ୍ତି ପିଉପୁଲ ଫର ଆନିମଲସ ସଂସ୍ଥାର କର୍ମକର୍ତ୍ତା। ସେମାନେ ଭୁବନେଶ୍ୱର ବିଭିନ୍ନଅଂଚଳ ଗସ୍ତ କରି ନିରାଶ୍ରୟା ପଶୁମାନଙ୍କୁ ଖାଦ୍ୟ ଯୋଗାଇ ଦେଉଛନ୍ତି। ଆଜି ସମ୍ପୃକ୍ତ ସଂସ୍ଥାର କର୍ମକର୍ତ୍ତାମାନେ ପଟିଆ, ଜୟଦେବ ବିହାର, ସହିଦ ନଗର, ଇନ୍ଫୋସିଟି, କଳ୍ପନା ଓ ଖଣ୍ଡଗିରି ଅଂଚଳରେ ଭୋକିଲା ଜୀବଙ୍କୁ ଖାଦ୍ୟ ଯୋଗାଇଛନ୍ତି। କୁକୁରମାନଙ୍କ ପାଇଁ ରନ୍ଧା ଖାଦ୍ୟ, ଗାଈ ଓ ଷଣ୍ଢଙ୍କ ପାଇଁ ସେମାନେ ତରଭୁଜ, ଅନ୍ୟାନ୍ୟ ଫଳ ଓ ପନିପରିବା ଯୋଗାଇ ଦେଇଥିବା ବେଳେ ମାଙ୍କଡଙ୍କ ପାଇଁ ଆଳୁ, ବାଇଗଣ ଓ କଦଳୀ ଯୋଗାଇ ଦେଇଛନ୍ତି।
