ପାଟଣାଗଡ଼: ପାଟଣାଗଡ଼ ବିଧାୟକ ସରୋଜ କୁମାର ମେହେର ସହରରେ ଥିବା ବିଭିନ୍ନ ସରକାରୀ କାର୍ଯ୍ୟାଳୟ ପରିଦର୍ଶନ କରିଛନ୍ତି। ପରିଦର୍ଶନ ସହ କାର୍ଯ୍ୟାଳୟରେ ରହିଥିବା ସମସ୍ୟାର ସମାଧାନ ପାଇଁ ଆବଶ୍ୟକ ପଦକ୍ଷେପ ଗ୍ରହଣ କରାଯିବା ନେଇ ବିଭାଗୀୟ ଅଧିକାରୀଙ୍କ ସହିତ ଆଲୋଚନା କରିଛନ୍ତି। ବିଧାୟକ ଶ୍ରୀ ମେହେର ବ୍ରହ୍ମପୁରା ଉଚ୍ଚ ପ୍ରାଥମିକ ବିଦ୍ୟାଳୟ ପରିଦର୍ଶନ କରିବା ସହ ଶିକ୍ଷକ ଶିକ୍ଷୟିତ୍ରୀଙ୍କ ବିଦ୍ୟାଳୟର ବିଭିନ୍ନ ସମସ୍ୟା ସମ୍ପର୍କରେ ଆଲୋଚନା କରିଥିଲେ । ପରେ ଡାକ୍ତରଖାନାକୁ ଯାଇ ୱାର୍ଡ ୱାର୍ଡ ବୁଲି କିପରି ରୋଗୀ ସେବା ଚାଲିଛି ପଚାରି ବୁଝିଥିଲେ। ଉପଖଣ୍ଡ ଡ଼ାକ୍ତରଖାନାର ସମସ୍ୟା ଉପରେ ଚିକିତ୍ସାଧିକାରୀ ଡା.ପିତବାସ ସାଙ୍କ ସହ ଆଲୋଚନା କରିଥିଲେ। ସ୍ଥାନୀୟ ବଦ୍ୟୁତ ସମସ୍ୟା ଉପରେ ବିଭାଗୀୟ ଅଧିକାରୀ ସହିତ ଆଲୋଚନା କରିଥିଲେ।
ବିଧାୟକ ଉପନିୟୋଜନ କାର୍ଯ୍ୟାଳୟକୁ ପରିଦର୍ଶନ କରିବା ପାଇଁ ପହଞ୍ଚିଥିଲେ। କାର୍ଯ୍ୟାଳୟ ବନ୍ଦ ରହିଥିଲା। ବିଧାୟକ ଶ୍ରୀ ମେହେର କାର୍ଯ୍ୟାଳୟ ବନ୍ଦ ରହିଥିବାରୁ ଅସନ୍ତୋଷ ପ୍ରକାଶ କରିଥିଲେ। ଦୂରଦୂରାନ୍ତରୁ ଆସିଥିବା ଯୁବକ ଯୁବତୀମାନେ ବିଭିନ୍ନ ଚାକିରି ଆବେଦନ ପାଇଁ ନାମ ପଞ୍ଜିକରଣ କରିବା ପାଇଁ ଦାୟିତ୍ଵରେ ଥିବା ଅଧିକାରୀଙ୍କ ଆସିବା ବାଟକୁ ଚାହିଁ ରହିଥିଲେ। ବହୁ ଥର ଉପନିୟୋଜନ କାର୍ଯ୍ୟାଳୟକୁ ଆସି ନିରାଶ ହୋଇ ଫେରୁଛନ୍ତି ବୋଲି ବିଧାୟକଙ୍କ ଆଗରେ ଯୁବକ ଯୁବତୀ କହିଥିଲେ। ବିଧାୟକ ଶ୍ରୀ ମେହେର ଉପନିୟୋଜନ କାର୍ଯ୍ୟାଳୟ ଦାୟିତ୍ଵରେ ଥିବା ଅଧିକାରୀଙ୍କୁ ଡାକି ଏହା ଉପରେ ଆଲୋଚନା କରାଯିବ କହିଥିଲେ। ସନ୍ତୋଷଜନକ ଉତ୍ତର ନମିଳିଲେ ୨ ଦିନ ମଧ୍ୟରେ ଦାୟିତ୍ଵରେ ଥିବା ଅଧିକାରୀଙ୍କ ଉପରେ ଆବଶ୍ୟକ ପଦକ୍ଷେପ ନିଆଯିବ ବୋଲି ପ୍ରତିଶ୍ରୁତି ଦେଇଥିଲେ। ସୂଚନା ଅନସାରେ, କିଛି ଦିନ ପୂର୍ବରୁ ଉପନିୟୋଜନ କାର୍ଯ୍ୟାଳୟ ବନ୍ଦ ରହୁଥିବା ଖବର ପ୍ରକାଶ ପାଇଥିଲା।
