ପରଜଙ୍ଗ: ୧୪୯ନମ୍ବର ଜାତୀୟ ରାଜପଥର କୁଲେଇ ଛକ ନିକଟରେ ଶନିବାର ରାତିରେ ଏକ ମର୍ମନ୍ତୁଦ ଦୁର୍ଘଟଣା ଘଟିଛି। ଏକ ଅଜଣା ଗାଡି ଧକ୍କାରେ ବାଇକରେ ଯାଉଥିବା ୩ଜଣ ଯୁବକଙ୍କ ଶୋଚନୀୟ ମୃତ୍ୟୁ ହୋଇଛି। ଏହାକୁ ନେଇ ସେଠାରେ ତୀବ୍ର ଉତ୍ତେଜନା ପ୍ରକାଶ ପାଇଥିଲା। ସ୍ଥାନୀୟ ଲୋକେ ରାସ୍ତାରୋକ କରିବା ସହିତ ମୃତକଙ୍କ ପରିବାରକୁ କ୍ଷତିପୂରଣ ଦେବା ସହିତ ରାସ୍ତାରେ ଆଲୋକ ବ୍ୟବସ୍ଥା କରିବାକୁ ଦାବି କରିଥିଲେ। ପ୍ରାୟ ଏକ ଘଣ୍ଟା ପରେ ପୁଲିସ ପହଞ୍ଚି ଉତ୍ତ୍ୟକ୍ତଙ୍କୁ ବୁଝାସୁଝା କରିବା ପରେ ରାସ୍ତାରୋକ ପ୍ରତ୍ୟାହାର ହୋଇଥିଲା।
ମିଳିଥିବା ସୂଚନା ଅନୁଯାୟୀ, ଶନିବାର ରାତି ପ୍ରାୟ ୧୦ଟାରେ ପରଜଙ୍ଗ ଥାନା ଅନ୍ତର୍ଗତ ପାଲପାଳର ଟୁଟୁ ମଲ୍ଲିକ, କୁଲେଇ ଗ୍ରାମର ସନ୍ତୋଷ ମଲ୍ଲିକ ଓ ମହାବୀର ଥାନା ଅନ୍ତର୍ଗତ କଟୁମଣ୍ଡ ଗ୍ରାମର ଗୋପବନ୍ଧୁ ମଲ୍ଲିକ ଏକ ବାଇକରେ ଦଦରାଘାଟିରୁ ତିତିରି ଅଭିମୁଖେ ଯାତ୍ରା କରୁଥିଲେ। ସେମାନେ ୧୪୯ନମ୍ବର ଜାତୀୟ ରାଜପଥର କୁଲେଇଛକ ନିକଟରେ ହୋଇଥିବାବେଳେ ଦ୍ରୁତଗତିରେ ଆସୁଥିବା ଏକ ଅଜଣା ଗାଡି ବାଇକକୁ ଧକ୍କା ଦେଇ ପଳାଇଯାଇଥିଲା। ବାଇକରେ ବସିଥିବା ୩ଜଣ ଯୁବକଙ୍କ ଉପରେ ଗାଡି ଚଢିଯିବାରୁ ଘଟଣାସ୍ଥଳରେ ଟୁଟୁ, ସନ୍ତୋଷ ଓ ଗୋପବନ୍ଧୁଙ୍କ ମୃତ୍ୟୁ ଘଟିଥିଲା। ଏହି ଖବର ପ୍ରଚାରିତ ହୋଇଯିବା ପରେ ସ୍ଥାନୀୟ ଅଞ୍ଚଳର ଶହଶହ ଲୋକ ରାଜପଥରେ ପହଞ୍ଚି ରାସ୍ତାରୋକ କରିଥିଲେ। ଜାତୀୟ ରାଜପଥ ଜଙ୍ଗଲ ଦେଇ ଯାଇଥିବାବେଳେ ଗଛ ଯୋଗୁଁ ରାସ୍ତାରେ ଯାନବାହନ ଚଳାଚଳରେ ଅସୁବିଧା ହେଉଛି। ଏହାସହିତ ଉକ୍ତ ରାସ୍ତାରେ ଆଲୋକ ବ୍ୟବସ୍ଥା ନଥିବାରୁ ରାତିରେ ଅନ୍ଧାର ଯୋଗୁଁ ଗାଡି ଚାଳକମାନେ ବିଶେଷ ସମସ୍ୟାର ସମ୍ମୁଖୀନ ହେଉଥିବା ପୁରମହଂସପୁର ଓ କୁଲେଇ ଗ୍ରାମବାସୀ ଅଭିଯୋଗ କରିଛନ୍ତି। ତୁରନ୍ତ ଆଲୋକ ବ୍ୟବସ୍ଥା ସହିତ ରାସ୍ତା ପାର୍ଶ୍ବରୁ ଗଛଗୁଡିକ କାଟି ସଫା କରିବାକୁ ଉତ୍ତ୍ୟକ୍ତ ଲୋକେ ଦାବି କରି ରାସ୍ତାରୋକ କରିଥିଲେ।
