ଇସଲାମାବାଦ: ଆଉ କିଛି ସମୟ ମଧ୍ୟରେ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ଭାଗ୍ୟ ସ୍ଥିର କରିବ ପାକିସ୍ତାନର ଜାତୀୟ ସଭା। ତାଙ୍କ ବିରୋଧରେ ମିଳିତ ବିରୋଧୀଦଳ ଦ୍ୱାରା ଆଗତ ଅନାସ୍ଥା ପ୍ରସ୍ତାବ ଉପରେ ଆଉ କିଛି ସମୟ ମଧ୍ୟରେ ଭୋଟିଂ ଅନୁଷ୍ଠିତ ହେବ। ଆଜି ଦିନ ୧୧ଟା ୩୦ ମିନିଟରେ ଆସ୍ଥା ଭୋଟ ହେବାକୁ ଥିବା ବେଳେ ଏଥିରେ ବିଳମ୍ବ ଘଟୁଛି। ସୂଚନା ଅନୁଯାୟୀ, ପ୍ରଧାନମନ୍ତ୍ରୀ ଇମ୍ରାନ ଖାନ ପୁଣିଥରେ ଦେଶବାସୀଙ୍କୁ ସମ୍ବୋଧନ କରିବାର କାର୍ଯ୍ୟକ୍ରମ ରହିଛି।
୩୪୨ ଆସନ ବିଶିଷ୍ଟ ପାକିସ୍ତାନ ଜାତୀୟ ସଭାରେ ପ୍ରଧାନମନ୍ତ୍ରୀଙ୍କୁ ବହିଷ୍କାର କରିବା ପାଇଁ ଅତି କମରେ ୧୭୨ ଜଣ ସାଂସଦଙ୍କ ସମର୍ଥନ ଆବଶ୍ୟକ। ତେବେ ବିରୋଧୀ ଦଳଗୁଡ଼ିକର ଜାତୀୟ ସଭାରେ ୧୭୭ ସଦସ୍ୟଙ୍କ ସମର୍ଥନ ରହିଛି ଏବଂ ଶାସକ ଦଳର କିଛି ସଦସ୍ୟ ମଧ୍ୟ ଇମ୍ରାନଙ୍କ ସରକାରରୁ ସମର୍ଥନ ପ୍ରତ୍ୟାହାର କରିନେଇଛନ୍ତି। ପାକିସ୍ତାନ ଡେମୋକ୍ରାଟିକ୍ ମୁଭମେଣ୍ଟ ଏବଂ ପିପିପି ମାର୍ଚ୍ଚ ୮ରେ ପ୍ରଧାନମନ୍ତ୍ରୀଙ୍କ ବହିଷ୍କାର ପାଇଁ ଅନାସ୍ଥା ପ୍ରସ୍ତାବ ଆଗତ କରିଥିଲେ।
