ନୂଆଦିଲ୍ଲୀ: ଦକ୍ଷିଣ ପଶ୍ଚିମ ମୌସୁମୀ ୨୦୨୦ ଋତୁରେ ବନ୍ୟା ଓ ଭୂସ୍କଳନ ଏବଂ ୨୦୧୯-୨୦ ରବି ଋତୁରେ କୁଆପଥର ମାଡ଼ରେ ଫସଲ ନଷ୍ଟ କ୍ଷତିପୂରଣ ବାବଦରେ କେନ୍ଦ୍ର ସରକାର ଓଡ଼ିଶା ସମେତ ପାଞ୍ଚଟି ରାଜ୍ୟକୁ ଜାତୀୟ ବିପର୍ୟ୍ୟୟ ପ୍ରଶମନ ପାଣ୍ଠି (ଏନଡିଆରଏଫ)ରୁ ୧୭୫୧.୦୫ କୋଟି ଅତିରିକ୍ତ ସହାୟତା ମଞ୍ଜୁର କରିଛନ୍ତି। ଗତକାଲି କେନ୍ଦ୍ର ଗୃହମନ୍ତ୍ରୀ ଅମିତ ଶାହଙ୍କ ଅଧ୍ୟକ୍ଷତାରେ ଅନୁଷ୍ଠିତ ଉଚ୍ଚସ୍ତରୀୟ ବୈଠକରେ ଓଡ଼ିଶା, ଆସାମ, ଉତ୍ତରପ୍ରଦେଶ, ଅରୁଣାଚଳ ପ୍ରଦେଶ ଓ ତେଲେଙ୍ଗାନା ରାଜ୍ୟ ଲାଗି ଅତିରିକ୍ତ ସହାୟତା ପ୍ରଦାନ ଲାଗି ନିଷ୍ପତ୍ତି ନିଆଯାଇଥିଲା।
ବନ୍ୟା ଓ ଭୂସ୍କଳନରେ କ୍ଷତିଗ୍ରସ୍ତ ଓଡ଼ିଶାକୁ ୩୨୦.୯୪ କୋଟି, ଆସାମକୁ ୪୩୭.୧୫ କୋଟି, ଅରୁଣାଚଳ ପ୍ରଦେଶକୁ ୭୫.୮୬ କୋଟି, ତେଲେଙ୍ଗାନାକୁ ୨୪୫.୯୬ କୋଟି ଓ ଉତ୍ତରପ୍ରଦେଶକୁ ୩୮୬.୦୬ କୋଟି ଏବଂ କୁଆପଥର ମାଡ଼ରେ ଫସଲ କ୍ଷତିଗ୍ରସ୍ତ ଯୋଗୁଁ ଉତ୍ତରପ୍ରଦେଶକୁ ୨୮୫.୦୮ କୋଟି ଟଙ୍କାର ଆର୍ଥିକ ସହାୟତା ମିଳିଛି।
