ନୂଆଦିଲ୍ଲୀ : ଓଡ଼ିଶାରେ ରେଳବାଇର ବିକାଶ ପାଇଁ କେନ୍ଦ୍ର ସରକାର ଅଧିକ ଗୁରୁତ୍ବ ପ୍ରଦାନ କରି ସର୍ବାଧିକ ଅନୁଦାନ ପ୍ରଦାନ କରିଛନ୍ତି । ୨୦୧୯-୨୦ ବଜେଟ୍ରେ ରେଳବାଇ କ୍ଷେତ୍ରରେ ରାଜ୍ୟକୁ ମୋଟ ୫୯୯୩ କୋଟି ଟଙ୍କାର ଅନୁଦାନ ମିଳିଛି । ଯାହା ପୂର୍ବବର୍ଷ ତୁଳନାରେ ୫୪୮କୋଟିରୁ ଅଧିକ ଏବଂ ରେଳବାଇ ବାବଦରେ ଓଡ଼ଶାକୁ ମିଳିଥିବା ସର୍ବାଧିକ ଅନୁଦାନ। ୨୦୧୮-୧୯ ଆର୍ଥିକ ବର୍ଷରେ ଓଡ଼ିଶାକୁ ୫,୨୫୨ କୋଟି ଟଙ୍କାର ରେଳ ଅନୁଦାନ ମିଳିଥିଲା। ସୂଚନାଯୋଗ୍ୟ ମଧ୍ୟବର୍ତ୍ତିକାଳୀନ ବଜେଟରେ ରାଜ୍ୟକୁ ରେଳବାଇ ପାଇଁ ୫୯୪୦ କୋଟି ଟଙ୍କାର ଅନୁଦାନ ମିଳିଥିବା ବେଳେ ୨୦୧୯-୨୦ ପୁର୍ଣ୍ଣାଙ୍ଗ ବଜେଟରେ ୫୯୯୩ କୋଟି ଟଙ୍କାର ଅନୁଦାନ ମିଳିଛି ।
ତେବେ ଚଳିତ ବଜେଟରେ ରାଜ୍ୟରେ ଅଧାରେ ରହିଥିବା ଅବା ନୂଆ ରେଳ ଲାଇନ ପାଇଁ ୧୪ ଶହ କୋଟି ଟଙ୍କା ଅନୁଦାନ ମିଳିଛି । ଖୋର୍ଦ୍ଧା-ବଲାଙ୍ଗୀର ରେଳ ଲାଇନ ପାଇଁ ୩୫୦ କୋଟି, ଅନୁଗୁଳ-ସୁକିନ୍ଦା ଲାଇନ ପାଇଁ ୨୫୦ କୋଟି, ହରିଦାସପୁର-ପାରାଦ୍ୱୀପ ପାଇଁ ୪୦୦ କୋଟି, ତାଳଚେର-ବିମଳାଗଡ଼ ପାଇଁ ୧୫୦ କୋଟି, ଜୟପୁର-ମାଲକାନଗିରି ପାଇଁ ୭୦ କୋଟି, ଜୟପୁର-ନବରଙ୍ଗପୁର ପାଇଁ ୧୦ କୋଟି, ସମ୍ବଲପୁର-ତାଳଚେର ଦୋହରା ରେଳ ଲାଇନ ପାଇଁ ୨୪୯ କୋଟି, ସମ୍ବଲପୁର-ଟିଟିଲାଗଡ଼ ଦୋହରା ରେଳ ଲାଇନ ପାଇଁ ୧୭୦ କୋଟି, ଭଦ୍ରକ-ନିର୍ଗୁଣ୍ଡି ତୃତୀୟ ଲାଇନ ପାଇଁ ୮୬ କୋଟି, ବିଜୟନଗରମ୍-ସମ୍ବଲପୁର ତୃତୀୟ ଲାଇନ ପାଇଁ ୩୫୦ କୋଟି ଓ କୋରାପୁଟ-ସିଙ୍ଗାପୁର ରୋଡ଼୍ ପାଇଁ ୨୦୫ କୋଟି ଟଙ୍କା ପ୍ରଦାନ କରାଯାଇଛି। ଏହା ସହିତ ଫ୍ଲାଇଓଭର୍ ନିର୍ମାଣ ଓ ଇଲେକ୍ଟ୍ରି ଇଂଜିନ୍ ୱାର୍କସପ୍ ପାଇଁ ମଧ୍ୟ ବଜେଟ୍ରେ ଅର୍ଥ ବରାଦ କରାଯାଇଥିବା ଜଣାପଡିଛି। ପାର୍ଲାମେଣ୍ଟରେ ଚାଲିଥିବା ବଜେଟ ଆଳୋଚନାରୁ ଏହି ତଥ୍ୟ ଜଣାପଡିଛି।
