ଆଠଗଡ : ଆଠଗଡ ବନାଞ୍ଚଳ ଅନ୍ତର୍ଗତ କଟକିଆସାହି ପଞ୍ଚାୟତ ଅଧିନ ବଳରାମପୁରସ୍ଥିତ ସର୍ପେଶ୍ୱର ମନ୍ଦିର ସମ୍ମୁଖରୁ ବନବିଭାଗ ପକ୍ଷରୁ ପ୍ରାୟ ୨ ଲକ୍ଷ ଟଙ୍କା ମୂଲ୍ଯର ସାଗୁଆନ କାଠ ଜବତ କରାଯାଇଛି । ମଙ୍ଗଳବାର ସକାଳେ କୌଣସି ସୂତ୍ରରୁ ଖବର ପାଇଥିବା ଡିଏଫଓ ଡାକ୍ତର ଯଜ୍ଞଦତ୍ତ ପତିଙ୍କ ନିର୍ଦ୍ଦେଶକ୍ରମେ ବନବିଭାଗ ପକ୍ଷରୁ ଏହି ଚଢାଉ କରାଯାଇଥିଲା । ସର୍ପେଶ୍ୱର ମନ୍ଦିର ସମ୍ମୁଖରେ ଥିବା ସ୍ଥାନରେ ଏକ ମିନିଟ୍ରକରେ ୧୮ ଖଣ୍ଡ ବଡ ଶାଗୁଆନ ଲଗ୍ ବୋଝେଇ ହେଉଥିବାବେଳେ ବନବିଭାଗ ସ୍କ୍ୱାର୍ଡ ଅତର୍କିତ ଚଢାଉ କରିଥିଲେ। ବୋଝେଇ କରୁଥିବା ଶ୍ରମିକ ଓ ଗାଡି ଚାଳକ ବନ କର୍ମଚାରୀଙ୍କୁ ଦେଖି ସେଠାରୁ ଦୌଡି ଚମ୍ପଟ ମାରିଥିଲେ। ବନବିଭାଗ ସ୍କ୍ୱାର୍ଡ ୬୨.୭୪ ଘନଫୁଟର ୧୮ ଟି ସାଗୁଆନ ଲଗ୍ ସହିତ ଉକ୍ତ ମିନି ଟ୍ରକଟିକୁ ଜବତ କରି ଆଠଗଡ ବନାଞ୍ଚଳ କାର୍ଯ୍ୟାଳୟକୁ ଆଣିଥିଲେ । ଏ ବାବଦରେ ଏକ ମାମଲା ରୁଜୁ କରି ତଦନ୍ତ ଜାରି ରହିଛି । ଜବତ ହୋଇଥିବା କାଠ କେଉଁଠାରୁ କଟାଯାଇଛି, ଜବତ ହୋଇଥିବା ଉକ୍ତ ଜମି କାହାର ଏବଂ କାଠ କେଉଁଠିକୁ ଯାଉଥିଲା ତାହା ତଦନ୍ତ ପରେ ଜଣାପଡିବ ବୋଲି ଆଠଗଡ ରେଞ୍ଜର ରବିନ୍ଦ୍ର କୁମାର ନାୟକ କହିଛନ୍ତି । ବନପାଳ ଆଶିଷ କୁମାର ନାୟକ ଓ ସୁଶୀଲ କୁମାର ଜେନା, ବନରକ୍ଷୀ ପ୍ରଶାନ୍ତ କୁମାର ବେହେରା, ଝୁନୁଲତା ବେହେରାଙ୍କ ସମେତ ଅନ୍ଯ ସ୍କ୍ୱାର୍ଡ ସଦସ୍ଯ ଏହି ଚଢାଉରେ ଅଂଶଗ୍ରହଣ କରିଥିଲେ ।
Popular Categories
Previous article
Next article