ମାଲକାନଗିରି : ମାଲକାନଗିରି ବ୍ଲକରେ ଅଫିସର ଓ କର୍ମଚାରୀ ମରୁଡି ଦେଖାଦେଇଛି । ଫଳରେ ସମସ୍ତ ବିଭାଗ ଅଚଳ ହୋଇ ପଡିଛି । ବିଭିନ୍ନ ବିଭାଗରେ ପଦ ପଦବୀ ଗୁଡିକ ଅତିରିକ୍ତ ଦାୟିତ୍ୱରେ ଚାଲିଛି । ଗ୍ରାମ ପଂଚାୟତ ସଂପ୍ରସାରଣ ଅଧିକାରୀ, ମନରେଗା ଅତିରିକ୍ତ କାର୍ଯ୍ୟକ୍ରମ ଅଧିକାରୀ, ମୁଖ୍ୟ କିରାଣୀ ଓ କୋଷାଧ୍ୟକ୍ଷ ପଦବୀ ଗୁଡିକ ଖାଲି ପଡିଥିବା ବେଳେ ଅତିରିକ୍ତ ଦାୟିତ୍ୱରେ ଚାଲିଛି ।
ମୁଖ୍ୟ କିରାଣୀ ମଇଉଦ୍ଦିନ ଗାଉସଙ୍କ ବଦଳି ପରେ ଦୀର୍ଘ ଦିନ ଧରି ସେହି ସ୍ଥାନ ଖାଲି ପଡିଥିଲ।। ବର୍ତମାନ ନୂତନ ଭାବେ ଯୋଗ ଦେଇଥିବା ବରିଷ୍ଠ ରାଜସ୍ୱ କିରାଣୀ ରବିନ୍ଦ୍ର ପାତ୍ରଙ୍କୁ ଅତିରିକ୍ତ ଭାବେ ମୁଖ୍ୟ କିରାଣୀ ଦାୟିତ୍ୱ ଦିଆଯାଇଛି । ସେହିପରି କୋଷାଧ୍ୟକ୍ଷ ସ୍ଥାନରୁ ଅଜିତ ପାତ୍ରଙ୍କ ଖଇରପୁଟ ତହସିଲକୁ ବଦଳି ପରେ ସେହି ସ୍ଥାନ ମଧ୍ୟ ଖାଲି ରହିଛି । ବର୍ତମାନ ସେଠାରେ ଏଷ୍ଟାବ୍ଲିସମେଂଟ ବରିଷ୍ଠ କିରାଣୀ ମୁନା ପାତ୍ରଙ୍କୁ ଅତିରିକ୍ତ ଦାୟିତ୍ୱ ଦିଆ ଯାଇଛି । ସେହିପରି ଉନ୍ନୟନ କିରାଣୀ ସ୍ଥାନ ଖାଲିଥିବାରୁ ସେଠାରେ କନିଷ୍ଠ କିରାଣୀ ପ୍ରଦ୍ୟୁମ୍ନ ପରିଡାଙ୍କୁ ଅତିରିକ୍ତ ଦାୟିତ୍ୱ ଦିଆଯାଇଛି ।
ଗ୍ରାମ ପଂଚାୟତ ସଂପ୍ରସାରଣ ଅଧିକାରୀ ଶଙ୍କର୍ଶନ ଖଣ୍ଡୁଆଳଙ୍କ ବଦଳି ପରେ ସେହି ସ୍ଥାନ ମଧ୍ୟ ଖାଲି ରହିଛିା ସେଠାରେ ଗ୍ରାମ ପଂଚାୟତ ନିର୍ୱାହୀ ଅଧିକାରୀ ବିଷ୍ଣୁ ଚରଣ ତ୍ରିପାଠୀଙ୍କୁ ଅତିରିକ୍ତ ଦାୟିତ୍ୱ ଦିଆଯାଇଛି । ତ୍ରିପାଠୀଙ୍କ ଉଡୁପା ଗ୍ରାମ ପଂଚାୟତ ଓ ପେଡାକୋଣ୍ଡା ଗ୍ରାମ ପଂଚାୟତ ଦୁଇଟି ଦାୟିତ୍ୱରେ ଥିବା ସତ୍ୱେ ଗ୍ରାମ ପଂଚାୟତ ସଂପ୍ରସାରଣ ଅଧିକାରୀ ଦାୟିତ୍ୱରେ ସେ ରହିଛନ୍ତି । ଫଳରେ ମାସ ମାସ ଧରି ବିଭିନ୍ନ ବିଭାଗରୁ ଫାଇଲ ପତ୍ର ଚଳାଚଳ ହେଉ ନଥିବା ଜନସାଧାରଣ ଅଭିଯୋଗ କରିଛନ୍ତି । ଏହି ବ୍ଲକରେ ୧୯ଗୋଟି ଗ୍ରାମ ପଂଚାୟତ ଥିବା ବେଳେ ମାତ୍ର ୧୦ ଜଣ ଗ୍ରାମ ପଂଚାୟତ ନିର୍ବାହୀ ଅଧିକାରୀ ରହିଛନ୍ତି । ଏ ସମ୍ପର୍କରେ ମାଲକାନଗିରି ଅତିରିକ୍ତ ଗୋଷ୍ଠୀ ଉନ୍ନୟନ ଅଧିକାରୀ କସମସ ତିର୍କିଙ୍କୁ ପଚାରିବାରୁ ଖୁବ ଶୀଘ୍ର ଉକ୍ତ ସମସ୍ୟାର ସମାଧାନ ହେବ ବୋଲି ସେ ପ୍ରକାଶ କରିଛନ୍ତି ।
