ପୁଜ୍ୟପୂଜାକୁ ସିଏମସିର ଇଏ କି ସମ୍ମାନ – ଆବର୍ଜନା ମଧ୍ୟରେ ଭଜନ ସମ୍ରାଟଙ୍କ ପ୍ରତିମୂର୍ତ୍ତି

ଡେସ୍କ: କଟକ ମହାନଗର ନିଗମର ପୁଜ୍ୟପୂଜାକୁ ସମ୍ମାନ ଦେଖିଲେ ଯେ କେହି ଘଡ଼ିଏ ଚିନ୍ତା କରିବ। ବର୍ଷ ବର୍ଷ ଧରି ଭଜନ ସମ୍ରାଟଙ୍କ ପ୍ରତିମୂର୍ତ୍ତୀଙ୍କୁ ଜରି ଘୋଡେ଼ଇ ମୁହଁ ବାନ୍ଧି ରଖିଛି ପ୍ରଶାସନ। ନେତାଜୀ ବସ ଟର୍ମିନାଲ ସମ୍ପ୍ରସାରଣ ସମୟରେ ଭିକାରୀ ବଳଙ୍କ ପ୍ରତିମୂର୍ତ୍ତିକୁ ଖାନନଗର ବୁରୁଜ ନିକଟରୁ ଉଠାଇ ଦିଆଯାଇଥିଲା ହେଲେ ଦୀର୍ଘ ଦିନ ବିତିଯାଇଥିଲେ ମଧ୍ୟ ପ୍ରଶାସନ ସତେ ଯେମିତି ଭିକାରୀ ବଳଙ୍କୁ ଭୁଲି ଯାଇଛି। ଯାହାକୁ ନେଇ ତାଙ୍କ ପୁଅ ଏବଂ ଭିକାରୀ ବଳ ସ୍ମୃତି ସଂସଦ ଅସନ୍ତୋଷ ପ୍ରକାଶ କରିବା ସହ ସିଏମସିକୁ ଦାୟୀ କରିଛନ୍ତି। ଅନ୍ୟପଟେ ସିଏମସି ମେୟର କହିଛନ୍ତି ଖୁବଶିଘ୍ର ଭିକାରୀ ବଳଙ୍କ ପ୍ରତିମୂର୍ତ୍ତି ପୁନଃସ୍ଥାପନ କରାଯିବ।

ପୁଜ୍ୟପୂଜାକୁ ସିଏମସିର ଇଏ କି ସମ୍ମାନ – ଆବର୍ଜନା ମଧ୍ୟରେ ଭଜନ ସମ୍ରାଟଙ୍କ ପ୍ରତିମୂର୍ତ୍ତି pic.twitter.com/QQBDI6i8jj

— Samaja Live (@samajalive) October 19, 2024

ଓଡିଆ ଅସ୍ମିତାକୁ ନେଇ ସାରା ରାଜ୍ୟରେ ଆଲୋଚନା ପର୍ଯ୍ୟାଲୋଚନା ଚାଲିଥିବା ବେଳେ ଲୁହା ଖୁଣ୍ଟିରେ ଭିକାରୀ ବଳଙ୍କ ପ୍ରତିମୂର୍ତ୍ତିର ଗୋଡ ବନ୍ଧା ହୋଇଥିବା ଓ ହାତ ମୁଁହ ଜରିପାଲରେ ବନ୍ଧାଯାଇଥିବା ଦେଖିବା ପରେ ଅନେକ ପ୍ରଶ୍ନବାଚୀ ସୃଷ୍ଟି ହୋଇଛି। ସିଏମସିର‌ ଅଳିଆ ଆବର୍ଜନା ରହୁଥିବା ସ୍ଥାନରେ ପଡ଼ିରହିଛି ଭଜନ ସମ୍ରାଟଙ୍କ ପ୍ରତିମୂର୍ତ୍ତି। ଶହ ଶହ ଜଗନ୍ନାଥ ଭଜନ ଗାଇ ଓଡ଼ିଶାକୁ ଗୌରବାନ୍ୱିତ କରିଥିବା ଭଜନ ସମ୍ରାଟଙ୍କୁ ଏ କେମିତି ସମ୍ମାନ। ଖାନନଗର ପାର୍କ ନିକଟରୁ ଏହି ପ୍ରତିମୂର୍ତ୍ତି ଉଚ୍ଛେଦ ହେବା ପରେ ବର୍ଷେରୁ ଅଧିକ ସମୟ ଧରି ଏହି ସ୍ଥାନରେ ଖୋଲା ଆକାଶ ତଳେ ପଡିରହିଛି। ମୁହଁରେ କଳା ଜରି ବନ୍ଧା ହୋଇଛି। ଗୋଡରେ ପ୍ଲାଷ୍ଟିକ୍ ଦଉଡି ବନ୍ଧା ହୋଇଛି। ଭିକାରୀ ବଳଙ୍କ ପ୍ରତିମୂର୍ତ୍ତିକୁ ଏପରି ଅବସ୍ଥାରେ ରଖାଯିବାକୁ ନେଇ ତାଙ୍କ ବଡ ପୁଅ ଏବଂ ସ୍ମୃତି ସଂସଦ ପକ୍ଷରୁ ଅସନ୍ତୋଷ ପ୍ରକାଶ କରାଯାଇଛି। ଏ ନେଇ ସିଏମସିକୁ ବାରମ୍ବାର ଅବଗତ କରାଇବା ପରେ ମଧ୍ୟ ସିଏମସି ଧ୍ୟାନ ଦେଇନଥିବା ଅଭିଯୋଗ କରିଛନ୍ତି।

ପୁଜ୍ୟପୂଜାକୁ ସିଏମସିର ଇଏ କି ସମ୍ମାନ – ଆବର୍ଜନା ମଧ୍ୟରେ ଭଜନ ସମ୍ରାଟଙ୍କ ପ୍ରତିମୂର୍ତ୍ତି pic.twitter.com/XgewIXpnru

— Samaja Live (@samajalive) October 19, 2024

ଭିକାରୀ ବଳଙ୍କ ଦେହାନ୍ତ ପରେ ତାଙ୍କୁ ସମ୍ମାନ ଜଣାଇ କାଠଯୋଡ଼ି ରିଙ୍ଗ ବନ୍ଧ ପାର୍ଶ୍ୱ ପାର୍କ ନିକଟରେ ୨୦୧୮ ମସିହାରେ ଏହି ପ୍ରତିମୂର୍ତ୍ତି ସ୍ଥାପନ କରାଯାଇଥିଲା। କିନ୍ତୁ ରାସ୍ତା ପ୍ରଶସ୍ତିକରଣ ପାଇଁ ୨୦୨୩ ମସିହାରେ ସିଏମସି ଏହି ପ୍ରତିମୂର୍ତ୍ତିକୁ ଉଚ୍ଛେଦ କରି ଅନ୍ୟତ୍ର ପ୍ରତିଷ୍ଠା କରିବା ପାଇଁ ଯୋଜନା କରିଥିଲା। ତେବେ ଏପର୍ଯ୍ୟନ୍ତ ଏହି ପ୍ରତିମୂର୍ତ୍ତି ପ୍ରତିଷ୍ଠା ନହୋଇ ଏପରି ପରିତ୍ୟକ୍ତ ସ୍ଥାନରେ ପଡିରହିଛି। ଏ ସମ୍ପର୍କରେ କଟକ ମେୟର କହିଛନ୍ତି କଟକ ମହାନଗର ନିଗମ କୌଣସି ବ୍ୟକ୍ତିଙ୍କ ପ୍ରତିମୂର୍ତ୍ତିକୁ ଅସମ୍ମାନ କରିନାହିଁ। ଭିକାରୀ ବଳ ସ୍ମୁତି କମିଟି ସେହି ସ୍ଥାନରେ ପ୍ରତିମୂର୍ତ୍ତି ସ୍ଥାପନ କରିବାକୁ କହୁଛନ୍ତି। ମାତ୍ର ରାସ୍ତା କାର୍ଯ୍ୟ ସରିନଥିବାରୁ ସେହି ସ୍ଥାନରେ ସ୍ଥାପନ କରାଯାଇ ପାରୁନାହିଁ। ତେବେ କମିଟି ସଦସ୍ୟଙ୍କ ସହ ଆଲୋଚନା କରି ଖୁବଶୀଘ୍ର ପ୍ରତିମୂର୍ତ୍ତିକୁ ଭଲ ସ୍ଥାନରେ ସ୍ଥାପନ କରାଯିବ ବୋଲି କହିଛନ୍ତି ମେୟର।

ପୁଜ୍ୟପୂଜାକୁ ସିଏମସିର ଇଏ କି ସମ୍ମାନ – ଆବର୍ଜନା ମଧ୍ୟରେ ଭଜନ ସମ୍ରାଟଙ୍କ ପ୍ରତିମୂର୍ତ୍ତି pic.twitter.com/beELYFpwRE

— Samaja Live (@samajalive) October 19, 2024