ଆଠଗଡ: ଆଠଗଡ ଥାନା ଅନ୍ତର୍ଗତ ଖୁଣ୍ଟୁଣୀ-ନରସିଂହପୁର ୬୫ ନଂ ରାଜ୍ୟ ରାଜପଥର ଦର୍ଶନପୁର ନିକଟରେ ମଙ୍ଗଳବାର ଅପରାହ୍ନରେ ଏକ ଅଟୋ ସହିତ କାରର ମୁହାମୁହିଁ ଧକ୍କା ହେବା ଫଳରେ ଜଣେ ଅଟୋ ଯାତ୍ରୀଙ୍କ ମୃତ୍ୟୁ ଘଟିଛି। ଏଥିରେ ଆଉ ଦୁଇଜଣ ଗୁରୁତର ଆହତଙ୍କୁ କଟକ ସ୍ଥାନାନ୍ତର କରାଯାଇଛି। ସଠିଲୋ ଗ୍ରାମର ଶତୃଘ୍ନ ପରିଡା(୬୦) ନିଜ ଝିଆରୀ ଲିପି ବେହେରା (୨୨) ଓ ନାତୁଣୀ ବିଦୁସ୍ମିତା (୩)ଙ୍କୁ ଶାଶୁଘର ବାଙ୍କୀ ବ୍ଲକର ସହଙ୍ଗା-ଗୋପାଳପୁରରେ ଛାଡିବାକୁ ଏକ ଅଟୋରେ ଯାଉଥିଲେ। ଦର୍ଶନପୁର ନିକଟ ବୁଲାଣି ରାସ୍ତାରେ ଅଟୋଟି ଭାରସାମ୍ୟ ହରାଇବାରୁ ତିଗିରିଆ ପଟରୁ ଆସୁଥିବା ଏକ କାର ସହିତ ଧକ୍କା ହୋଇଯାଇଥିଲା। ଏଥିରେ ଅଟୋରେ ଥିବା ଆହତମାନଙ୍କୁ ରୋଗୀବୁହା ଯାନରେ ଆଠଗଡ ଡାକ୍ତରଖାନା ନିଆଯାଇଥିଲା। ସେଠାରେ ଗୁରୁତର ଆହତ ଥିବା ଶତୃଘ୍ନ, ଲିପି ଓ ଅଟୋ ଚାଳକ ପର୍ଶୁରାମ ପଗଡ(୫୦)ଙ୍କୁ ପ୍ରାଥମିକ ଚିକିତ୍ସା ପରେ କଟକ ସ୍ଥାନାନ୍ତର କରାଯାଇଥିଲା। କଟକ ବଡ ଡାକ୍ତରଖାନାରେ ଚିକିତ୍ସାଧୀନ ଅବସ୍ଥାରେ ଶତୃଘ୍ନ ପରିଡାଙ୍କର ମୃତ୍ୟୁ ହୋଇଯାଇଥିବା ଜଣାପଡିଛି। ପୁଲିସ ଦୁର୍ଘଟଣାଗ୍ରସ୍ତ ଗାଡି ଦୁଇଟିକୁ ଜବତ କରି ତଦନ୍ତ ଚଳାଇଛି।
Comments are closed.