ପାଟଣା: ୭୮ ତମ ସ୍ବାଧୀନତା ଦିବସ ଅବ୍ୟବିହିତ ପୂର୍ବରୁ ଆଜି ପାଟଣା ବ୍ଲକ ମୁଖ୍ୟାଳୟ ସ୍ୱାମ ପାଟଣା ଆଞ୍ଚଳିକ ମହାବିଦ୍ୟାଳୟ ପରିସରରେ ଜାତିର ପିତା ମହାତ୍ମାଗାନ୍ଧୀ, ଉତ୍କଳମଣି ଗୋପବନ୍ଧୁ ଦାସ ଏବଂ ଉତ୍କଳ ଗୌରବ ମଧୁସୂଦନ ଦାସଙ୍କ ଆବକ୍ଷ ପ୍ରତିମୂର୍ତ୍ତି ଉନ୍ମୋଚିତ ହୋଇଛି। ଏହାକୁ ଗାନ୍ଧିବାଦୀ ସମାଜସେବୀ ପୂର୍ବତନ ପାଟଣା ବ୍ଲକ ଅଧ୍ୟକ୍ଷ ତଥା ମହାବିଦ୍ୟାଳୟର ପ୍ରତିଷ୍ଠାତା ସମ୍ପାଦକ ଇଂ ବିଦ୍ୟାଧର ଦାଶ ଉନ୍ମୋଚନ କରିବା ସହ ସମବେତ ଅଧ୍ୟାପକ ଅଧ୍ୟାପିକା ଓ ଛାତ୍ରଛାତ୍ରୀଙ୍କୁ ଦେଶକୁ ସ୍ବାଧୀନତା ଦେଇଥିବାଗାନ୍ଧୀଙ୍କ ଜୀବନାଦର୍ଶ ଓ ବିଚାର ଧାରା ଯୁଗେଯୁଗେ ଭାରତବାସୀଙ୍କୁ ଅନୁପ୍ରାଣିତ କରିବ ବୋଲି ମତ ରଖିବା ସହ ଏହି ବିଦ୍ୟାଳୟ ଜିଲ୍ଲାର ଅନ୍ୟତମ ପ୍ରତିଷ୍ଠିତ ମହାବିଦ୍ୟାଳୟ ହୋଇଥିବାରୁ ଛାତ୍ରଛାତ୍ରୀ ମାନେ ଏହାର ଗାରିମା ବୃଦ୍ଧି କରିବାକୁ ପରାମର୍ଶ ଦେଇଥିଲେ। ଏନସିସି ଅଧିକାରୀ କ୍ୟାପଟେନ ଧର୍ମେନ୍ଦ୍ର କୁମାର ସାହୁଙ୍କ ସଂଯୋଜନାରେ ଅନୁଷ୍ଠିତ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଇଂ ଦାଶଙ୍କ ସହ ସମ୍ମାନୀତ ଅତିଥି ଭାବେ ମହାବିଦ୍ୟାଳୟ ପରିଚାଳନା ସମିତିର ସଭାପତି ଯୁଧିଷ୍ଠିର ମହାନ୍ତ, ଅଧ୍ୟକ୍ଷ ବିରେନ୍ଦ୍ର କୁମାର ସାହୁ, ଅଧ୍ୟାପିକା ନୈଲାନି କାର୍ଜି, ଅଧ୍ୟାପିକା ବିନୋଦିନି ମହାନ୍ତ ଓ ରଜତ କୁମାର ଦାଶ ପ୍ରମୁଖ ସାମିଲ ଥିଲେ।
Comments are closed.