ଡେସ୍କ: ଶ୍ରୀ ଅନ୍ନ ଅଭିଯାନ ଓ ମିଶନ ଶକ୍ତିର ମିଳିତ ଉଦ୍ୟମରେ ଭୁବନେଶ୍ୱରର ୫ଟି ମିଲେଟ୍ ଶକ୍ତି କାଫେ ଏବଂ ୨ଟି ଆଉଟଲେଟର ପରିଚାଳନା ଦାୟିତ୍ୱରେ ଥିବା ସ୍ୱୟଂ ସହାୟକ ଗୋଷ୍ଠୀ ସଦସ୍ୟାମାନଙ୍କର ମାସିକ କାର୍ଯ୍ୟଦକ୍ଷତାର ସମୀକ୍ଷା ବୈଠକ ଅନୁଷ୍ଠିତ ହୋଇଯାଇଛି। ବରମୁଣ୍ଡାସ୍ଥିତ ୱାସନ ଅଫିସର ସମ୍ମିଳନୀ କକ୍ଷରେ ଆୟୋଜିତ ଏହି ସଭାରେ ସେମାନଙ୍କ ଉଦ୍ୟୋଗର ବିକାଶ, ଉତ୍ପାଦର ସ୍ୱଚ୍ଛତା ଏବଂ ଗୁଣବତ୍ତା ବଜାୟ ପାଇଁ ଆବଶ୍ୟକ ପଦକ୍ଷେପ ସମ୍ପର୍କରେ ଆଲୋଚନା କରାଯାଇଥିଲା। ଯେଉଁଥିରେ ୭ଟି ସ୍ୱୟଂ ସହାୟକ ଗୋଷ୍ଠୀର ୧୭ଜଣ ସଦସ୍ୟା ଯୋଗ ଦେଇ ଖାଦ୍ୟର ଗୁଣବତ୍ତା, ପରିଚାଳନାରେ ଦେଖାଦେଉଥିବା ସମସ୍ୟା ଏବଂ ଆଗାମୀ ଦିନରେ କିପରି ଆହୁରି ଅଧିକ ମିଲେଟଭିତ୍ତିକ ଖାଦ୍ୟ ସାମଗ୍ରୀକୁ ସାମିଲ କରାଯିବ ସେ ନେଇ ଆଲୋଚନା କରାଯାଇଥିଲା।
ଏହି ଅବସରରେ ଶ୍ରେଷ୍ଠ ବିବେଚିତ ମିଲେଟ୍ ଶକ୍ତି କାଫେ ପାଇଁ ରାଧାରାଣୀ ସ୍ୱୟଂ ସହାୟକ ଗୋଷ୍ଠୀର ସଦସ୍ୟାମାନଙ୍କୁ ସମ୍ମାନିତ କରାଯାଇଥିଲା। ମିଲେଟ୍ ଶକ୍ତି କାଫେରେ ସାମଗ୍ରୀ ବିକ୍ରି, ଏହାର ଗୁଣାତ୍ମକ ମାନ ଓ ଗ୍ରାହକଙ୍କ ମତାମତକୁ ଆଧାର କରି ଜୁଲାଇ ମାସର ‘ଶ୍ରେଷ୍ଠ କାଫେ’ ଚୟନ କରାଯାଇଥିଲା। କାର୍ଯ୍ୟକ୍ରମରେ ସ୍ୱୟଂ ସହାୟକ ଗୋଷ୍ଠୀର ସଦସ୍ୟାଙ୍କ ସମେତ ଶ୍ରୀ ଅନ୍ନ ଅଭିଯାନ ପ୍ରୋଗ୍ରାମ ସେକ୍ରେଟେରିଏଟର ସହକାରୀ ରାଜ୍ୟ ସଂଯୋଜକ ପ୍ରକାଶ ମଲ୍ଲିକ, ତପନ କୁମାର ବେହେରା (ସମନ୍ବୟ ସହଯୋଗ ୟୁନିଟ୍, ମିଶନ ଶକ୍ତି), ମିଶନ ଶକ୍ତିର ବ୍ଲକ୍ ପ୍ରକଳ୍ପ ସଂଯୋଜକ ଗଙ୍ଗୋତ୍ରୀ ପ୍ରିୟଦର୍ଶନୀ ଏବଂ ନାରାୟଣ ନନ୍ଦ ପ୍ରମୁଖ ଯୋଗ ଦେଇଥିଲେ।
