ନୂଆଦିଲ୍ଲୀ : ଦୁଇଚକିଆ ଗାଡିର ଚାହିଦା ଲଗାତର ବଢିବାରେ ଲାଗିଛି । ଭାରତୀୟ ଗ୍ରାହକ ଦୁଇଚକିଆ ଯାନକୁ ଅଧିକ ପସନ୍ଦ କରୁଛନ୍ତି । ଗତ ମାସରେ ହିରୋ ମୋଟୋକର୍ପ ବିକ୍ରିରେ ସର୍ବୋଚ୍ଚ ସ୍ଥାନ ହାସଲ କରିଛି । ରିପୋର୍ଟ ଅନୁସାରେ ଅକ୍ଟୋବର ୨୦୨୪ରେ ହିରୋ ମୋଟୋକର୍ପ ସମୁଦାୟ ୫,୭୬,୫୩୨ ୟୁନିଟ୍ ଦୁଇଚକିଆ ଯାନ ବିକ୍ରି କରିଛି । ଗତ ବର୍ଷ ଅର୍ଥାତ୍ ୨୦୨୩ ମସିହା ଅକ୍ଟୋବର ମାସରେ ହିରୋ ସମୁଦାୟ ୪,୧୮,୬୭୨ ୟୁନିଟ୍ ଦୁଇଚକିଆ ଯାନ ବିକ୍ରି କରିଥିଲା । ବାର୍ଷିକ ଆଧାରରେ କମ୍ପାନୀର ଗାଡି ବିକ୍ରିରେ ୩୭.୭୦ ପ୍ରତିଶତ ବୃଦ୍ଧି ଦେଖିବାକୁ ମିଳିଛି ।
ଦ୍ବିତୀୟ ସ୍ଥାନରେ ହୋଣ୍ଡା ରହିଛି । ହୋଣ୍ଡା ସମୁଦାୟ ୫,୫୪,୨୪୯ ୟୁନିଟ୍ ଗାଡି ବିକ୍ରି କରିଛି । ତୃତୀୟ ସ୍ଥାନରେ ଟିଭିଏସ୍ ୩,୫୧,୯୫୦ ଗାଡି ବିକ୍ରି କରିଛି । ଚତୁର୍ଥ ସ୍ଥାନରେ ବଜାଜ ସମୁଦାୟ ୨,୩୩,୨୫୪ ୟୁନିଟ୍ ଦୁଇଚକିଆ ଗାଡି ବିକ୍ରି କରିଛି । ସେହିଭଳି ୫ମ ସ୍ଥାନରେ ସୁଜୁକି ରହିଛି । କମ୍ପାନୀ ଅକ୍ଟୋବର ମାସରେ ୧,୦୬,୩୬୨ ଦୁଇଚକିଆ ଗାଡି ବିକ୍ରି କରିଛି ଯାହା କମ୍ପାନୀର ଗତ ବର୍ଷ ଅକ୍ଟୋବର ମାସ ତୁଳନାରେ ୩୨.୪୯ ପ୍ରତିଶତ ଅଧିକ । ୬ଷ୍ଠ ସ୍ଥାନରେ ରୟାଲ ଏନଫିଲ୍ଡ ରହିଛି । କମ୍ପାନୀ ୯୫,୧୧୩ ଟି ବାଇକ୍ ଅକ୍ଟୋବର ମାସରେ ବିକ୍ରି କରିଛି । ସପ୍ତମ ସ୍ଥାନରେ ୟାମାହା ୬୮,୧୫୩ ଗାଡି ବିକ୍ରି କରିଥିବାବେଳେ ଅଷ୍ଟମ ସ୍ଥାନରେ ଓଲା ରହିଛି ।
