ଭୁବନେଶ୍ୱର:ତୃଣମୂଳସ୍ତରରୁ ଆରମ୍ଭ କରି ଜରୁରିକାଳୀନ ପରିସ୍ଥିତି ଯାଏ, ସବୁକ୍ଷେତ୍ରରେ ଆମ ନର୍ସମାନେ ସେବା ଓ ମାନବିକତାର ପ୍ରମାଣ ଦେଇଆସିଛନ୍ତି। ସୁସ୍ଥ ଓ ଶକ୍ତିଶାଳୀ ନସିଂ କାର୍ଯ୍ୟଶକ୍ତି ଏକ ଦେଶର ସ୍ୱାସ୍ଥ୍ୟ ବ୍ୟବସ୍ଥାରେ ଉନ୍ନତି ଆଣି କେୟାର ଇକୋନୋମି ସୁଦୃଢ଼ କରିବାରେ ସହାୟକ ହେବ ବୋଲି ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା କହିଛନ୍ତି। ସୋମବାର ଅନ୍ତର୍ଜାତୀୟ ସେବିକା ଦିବସ ଅବସରରେ ଦିବ୍ୟଗ୍ରୁପ୍ ଅଫ୍ ଇନଷ୍ଟିଚ୍ୟୁଶନର ଗୀତାଞ୍ଜଳି ସ୍କୁଲ’ ଆଣ୍ଡ କଲେଜ ଅଫ୍ ନସିଂର ବାର୍ଷିକ ଉତ୍ସବ ରେଳ ଅଡିଟୋରିୟମଠାରେ ଅନୁଷ୍ଠିତ ହୋଇଥିଲା।
ଏଥିରେ ମୁଖ୍ୟ ଅତିଥି ଭାବେ ଯୋଗଦେଇ ଉପମୁଖ୍ୟମନ୍ତ୍ରୀ ଗୀତାଞ୍ଜଳି ନସିଂ କଲେଜର ଛାତ୍ରୀଛାତ୍ରଙ୍କୁ ବହୁ ପରାମର୍ଶ ଦେଇଥିଲେ। ସମ୍ମାନିତ ଅତିଥି ଭାବେ ମହାକାଳପଡ଼ା ବିଧାୟକ ଦୁର୍ଗା ପ୍ରସନ୍ନ ନାୟକ, କୋରେଇ ବିଧାୟକ ଆକାଶ ଦାସନାୟକ, ମାହାଙ୍ଗା ବିଧାୟକ ସାରଦା ପ୍ରସାଦ ପ୍ରଧାନ, ପୂର୍ବତନ ବିଧାୟକ ପ୍ରିୟଦର୍ଶୀ ମିଶ୍ର, ଉଚ୍ଚଶିକ୍ଷା ନିର୍ଦ୍ଦେଶକ କାଳୀ ପ୍ରସନ୍ନ ମହାପାତ୍ର, ଓଜେଇଇ ଉପାଧ୍ୟକ୍ଷ ପ୍ରଫେସର ଡି. ଉମାକାନ୍ତ ଶତପଥୀ, ଶିକ୍ଷାବିତ୍ ଡ. ଶିବ ପ୍ରସାଦ ବେହେରା, ଦିବ୍ୟ ଗ୍ରୁପ୍ ଇନଷ୍ଟିଚ୍ୟୁଶନର ଆବାହକ ଆଶିଷ କୁମାର ସାହୁ ପ୍ରମୁଖ ଯୋଗଦେଇଥିଲେ।
ଛାତ୍ରୀଙ୍କ ଦ୍ୱାରା ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିବାବେଳେ ବିଭିନ୍ନ ପ୍ରତିଯୋଗିତାରେ କୃତୀ ପ୍ରତିଯୋଗୀଙ୍କୁ ପୁରସ୍କୃତ କରାଯାଇଥିଲା। ଏହାସହ ଅନୁଷ୍ଠାନର ପତ୍ରିକା ‘ସାଧନା’ ଉନ୍ମୋଚନ କରାଯାଇଥିଲା। ଦିବ୍ୟ ଗ୍ରୁପ୍ ଅଫ୍ ଇନଷ୍ଟିଚ୍ୟୁଶନର ଅଧ୍ୟକ୍ଷ ଦିବ୍ୟଲୋଚନ ନାୟକ, ନିର୍ଦ୍ଦେଶକ ପ୍ରଶାନ୍ତ କୁମାର ନାୟକ ଏବଂ ଗୀତାଞ୍ଜଳିସ୍କୁଲ ଅଫ୍ ନର୍ସିଂର ସଭାପତି ବୈଜୟନ୍ତୀ ନାୟକ ପ୍ରମୁଖ ଉପସ୍ଥିତ ଥିଲେ।
