ବାଙ୍କୀ(ଡମପଡ଼ା): ବାଙ୍କୀ ସ୍ୱୟଂଶାସିତ ମହାବିଦ୍ୟାଳୟ ରାଜ୍ୟର ଏକ ପ୍ରମୁଖ ମହାବିଦ୍ୟାଳୟ ହୋଇଥିବା ବେଳେ ଦୂରଦୂରାନ୍ତରୁ ଛାତ୍ରଛାତ୍ରୀମାନେ ପାଠ ପଢ଼ିବା ପାଇଁ ଆସିଥାନ୍ତି। ଶିକ୍ଷାଦାନ ବ୍ୟବସ୍ଥା ଉନ୍ନତମାନର ହୋଇଥିବା ବେଳେ ବିଭିନ୍ନ ସମୟରେ ଚର୍ଚ୍ଚାରେ ରହିଥାଏ ବାଙ୍କୀ ମହାବିଦ୍ୟାଳୟ। ଚଳିତ କୋଭିଡ କଟକଣା ପାଇଁ ଅନଲାଇନ୍ ମାଧ୍ୟମରେ +୩ ଶେଷ ବର୍ଷ ପରୀକ୍ଷା ଏବଂ ଦୁଇଟି ବିଭାଗର ପିଜି ପରୀକ୍ଷା କରାଯାଇଥିôବା ବେଳେ ଗତ ୨୮ ତାରିଖରେ ପରୀକ୍ଷା ଫଳ ପ୍ରକାଶ ପାଇଥିଲା। କିନ୍ତୁ ପରୀକ୍ଷା ଫଳର ପ୍ରକାଶନର ୫ ଦିନ ପରେ ମଧ୍ୟ ଛାତ୍ରଛାତ୍ରୀମାନେ ସେମାନଙ୍କ ମାର୍କ ଅନଲାଇନରେ ଦେଖିବାରୁ ବଂଚିତ ହୋଇଛନ୍ତି।
ବାଙ୍କୀ ସ୍ୱୟଂଶାସିତ ମହାବିଦ୍ୟାଳୟର ନିଜସ୍ୱ ଅଫିସିଆଲ ୱେବସାଇଟ୍ ରହିଥିବା ବେଳେ ଏହାକୁ କାର୍ଯ୍ୟକ୍ଷମ କରିବା ପାଇଁ ପ୍ରତିବର୍ଷ ମହାବିଦ୍ୟାଳୟ ତରଫରୁ ଲକ୍ଷ ଲକ୍ଷ ଟଙ୍କା ଖର୍ଚ୍ଚ କରାଯାଇ ଏକ ବେସରକାରୀ କମ୍ପାନୀକୁ ଦାୟିତ୍ୱ ଦିଆଯାଇଛି। ନାମକୁ ମାତ୍ର ୱେଭ୍ ସାଇଟ ରହିଥିଲେ ମଧ୍ୟ ବିଭିନ୍ନ ସମୟରେ ଅପଡେଟ୍ ହେଉନଥିବା ଦେଖାଯାଇଛି। ଯାହା ଫଳରେ ପରୀକ୍ଷା ଫଳର ପ୍ରକାଶନର ଏତେ ଦିନ ପରେ ମଧ୍ୟ ବିଦ୍ୟାର୍ଥୀମାନେ ପରୀକ୍ଷା ଫଳ ଦେଖିବାରୁ ବଂଚିତ ହୋଇଛନ୍ତି। ମହାବିଦ୍ୟାଳୟ ତରଫରୁ ଅର୍ଥ ଖର୍ଚ୍ଚ କରଯାଉଥିବା ବେଳେ କେଉଁଥି ପାଇଁ ଏହାକୁ ଅପଡେଟ୍ କରାଯାଉନାହିଁ ଏବଂ ବିଦ୍ୟାର୍ଥୀମାନେ ପରୀକ୍ଷା ଫଳରୁ ବଂଚିତ ହେବା ପରେ ଅଭିଭାବକମାନେ ମହାବିଦ୍ୟାଳୟର କାର୍ଯ୍ୟଦକ୍ଷତାକୁ ନେଇ ପ୍ରଶ୍ନ ଉଠାଇଛନ୍ତି। ନାମକୁ ମାତ୍ର ମହାବିଦ୍ୟାଳୟ ୱେବସାଇଟରେ ପରୀକ୍ଷା ଫଳ ପ୍ରକାଶନର ଫଟୋ ଏବଂ ପାସ୍ ଫେଲ୍ ତାଳିକା ଦିଆଯାଇଥିବା ଦେଖିବାକୁ ମିଳିଛି। ଅନଲାଇନ୍ ଯୁଗରେ ମହାବିଦ୍ୟାଳୟ ତରଫରୁ ଛାତ୍ରଛାତ୍ରୀଙ୍କୁ ସେମାନଙ୍କ ମାର୍କସିଟ୍ ତାଲିକା ଦେଖିବାରୁ ବଂଚିତ ରଖାଯିବା ପରେ ଆମେ ମହାବିଦ୍ୟାଳୟ ଅଧ୍ୟକ୍ଷଙ୍କୁ ଯୋଗଯୋଗ କରିଥିଲେମଧ୍ୟ ଯୋଗାଯୋଗ ସମ୍ଭବପର ହୋଇନାହିଁ।
