ନୂଆଦିଲ୍ଲୀ: ଉପସାଗରୀୟ ରାଷ୍ଟ୍ରରୁ ପ୍ରବାସୀ ଭାରତୀୟ ଶ୍ରମିକଙ୍କୁ ଫେରାଇ ଆଣିବା ପାଇଁ ଭାରତୀୟ ନୌବାହିନୀ, ବିମାନବାହିନୀ ଓ ଏୟାର ଇଣ୍ଡିଆ ସର୍ବବୃହତ୍ ଅଭିଯାନ ହାତକୁ ନେଇଛନ୍ତି। ଏହାର ପ୍ରସ୍ତୁତି ଏବେ ଶେଷ ପର୍ଯ୍ୟାୟରେ ପହଞ୍ଚିଛି। ନୌବାହିନୀର ଦ୍ବିତୀୟ ବୃହତ୍ତମ ନୌବହର ‘ଆଇଏନ୍ଏସ୍ ଜଲସ୍ବ’ ସମେତ ତିନିଟି ବଡ଼ ଜାହାଜକୁ ଏଥିପାଇଁ ପ୍ରସ୍ତୁତ କରାଯାଇଛି। ଯୁଦ୍ଧ ସରଞ୍ଜାମ ପରିବହନ କରୁଥିବା ଏହି ଜାହାଜରେ ଯାତ୍ରୀ ପରିବହନ ପାଇଁ ସ୍ବତନ୍ତ୍ର ବ୍ୟବସ୍ଥା ହୋଇଛି। ପ୍ରତି ଜାହାଜରେ ଡାକ୍ତରୀ ଦଳ ପଠାଯିବା ସହିତ କ୍ବାରେଣ୍ଟାଇନ୍ ବ୍ୟବସ୍ଥା କରାଯାଇଛି। ସାମାଜିକ ଦୂରତ୍ବ ରକ୍ଷା ସହିତ ପ୍ରତ୍ୟେକ ଜାହାଜରେ ପ୍ରାୟ ୫୦୦ ଭାରତୀୟଙ୍କୁ ଆଣିବା ବ୍ୟବସ୍ଥା କରାଯାଇଛି। ଯେଉଁମାନଙ୍କ ବିଦେଶରେ କାର୍ଯ୍ୟ ଅନୁମତି ଅବଧି ଶେଷ ହେବାକୁ ଯାଉଛି, ଆଗେ ସେମାନଙ୍କୁ ଫେରାଇ ଅଣାଯିବ। ଆମେରିକା ଓ ଫ୍ରାନ୍ସ ଜାହଜରେ ଯେମିତି ଅବସ୍ଥା ହୋଇଥିଲା ତାହାର ଯେମିତି ପୁନରାବୃତ୍ତି ନ ଘଟେ ସେଥିପ୍ରତି ଧ୍ୟାନ ଦିଆଯାଉଥିବା କହିଛନ୍ତି ନୌବାହିନୀର ଜଣେ ଅଧିକାରୀ। କୋଚି, ଭାଇଜାଗ୍ ଓ କରୱରରୁ ଏହି ଜାହାଜଗୁଡ଼ିକ ଉପସାଗରୀୟ ରାଷ୍ଟ୍ର ଅଭିମୁଖେ ଖୁବ୍ ଶୀଘ୍ର ବାହାରିବ ବୋଲି ସେ କହିଛନ୍ତି।
ସେହିଭଳି ଏୟାର ଇଣ୍ଡିଆ ମଧ୍ୟ ଏହି ଅଭିଯାନରେ ସାମିଲ ହୋଇଛି। ଏତଦ୍ବ୍ୟତୀତ ବିମାନବାହିନୀ ପକ୍ଷରୁ ଏକାଦିକ୍ରମେ ୧୦୦ ଯାତ୍ରୀଙ୍କୁ ଆଣିବା ଭଳି ବୃହତ୍ ସି-୧୭ ଗ୍ଲୋବମାଷ୍ଟର ବିମାନ ପଠାଇବା ବ୍ୟବସ୍ଥା କରିଛି। ସେଠାରୁ ଫେରିବାକୁ ଥିବା ଶ୍ରମିକଙ୍କୁ ୧୪ ଦିନ କ୍ବାରେଣ୍ଟାଇନ୍ରେ ରଖିବା ପାଇଁ କେରଳ ସରକାର ପ୍ରସ୍ତୁତି ଚଳାଇଛନ୍ତି। ବିଦେଶରେ ଥିବା ୧୨.୬ ନିୟୁତ ଶ୍ରମଶକ୍ତି ମଧ୍ୟରୁ ୭୦ପ୍ରତିଶତ କେବଳ ୬ ଉପ-ସାଗରୀୟ ରାଷ୍ଟ୍ରରେ ଅଛନ୍ତି। ୟୁନାଇଟେଡ ଆରବ ଏମିରେଟ୍ସରେ ସାଢ଼େ ୩ ନିୟୁତ ଥିଲାବେଳେ ସାଉଦିଆରବରେ ଅଢ଼େଇ ନିୟୁତ ଏବଂ କୁଏତ୍, ଓମାନ, କାତାର ଓ ବାହାରିନ୍ରେ ପ୍ରୟାୟ ୩ ନିୟୁତ ଭାରତୀୟ କାର୍ଯ୍ୟ କରୁଛନ୍ତି।
